1 Ɓakɔlítɔ 11 - Ɔngana á Kɛ̌kɛ

¹ Cɔ, ɓeani tambea ani, ɓíndɔ neoɓea nnde á Kiísito.

Ɔ́lanaga á ɓǒko na ɓake ka mbenɔ á beba á Mokonga

² Nenósegi ka nyɔngɔ nde ɓoomokanisia ka nyɔngɔ bui, phɔtɔ ɓooamba ɓɔphɛi nɛmɔ ɓíndɔ ɗénóphɛí.

³ Nekondi gǎkɛ ɓóúbɛ nyɔngɔ ndee: Kiísito ande mɔ̌ á mǒko buakɛ. Mǒko ande mɔ̌ á nke. Mokonga ande mɔ̌ á Kiísito.

⁴ Kaɓondɔ, mbenɔ nde mǒko aɔmɛma Mokonga, kaɓɛ n'aɔɔ́tɔa nyɔngɔ á Mokonga mosá á ɓakpa, n'aɓumbi mɔ̌ akɛ, ankusi Kiísito na soni.

⁵ A gǎkɛ oɓá nke buakɛ n'aɔmɛma Mokonga, kaɓɛ n'aɔɔ́tɔa nyɔngɔ á Mokonga mosá á ɓakpa na káɓumbi mɔ̌ akɛ, ankusi munyakɛ na soni. Kema ndɔ, a tɔ ɓea nke na ɓánkangaɗu.

⁶ Aoɓá nke na káɓumbi mɔ̌ akɛ, atókeni gǎkɛ ɓánkangaɗuɛ! Ɓî a gǎkɛ soni ka tena sekamɔ̌ á nke, kaɓɛ kangaɗua akɛ, ambe áɓumbɛ mɔ̌ akɛ.

⁷ Kákeni mǒko áɓumbɛ mɔ̌ akɛ ka nyɔngɔ nde, ande iii á ɓoombia ndea Mokonga. Nke a gǎkɛ ɓoombia ndea mǒko.

⁸ Nga, ɓákáncɔnji mǒko n'atóki ka nke, nke ndiu aámbé ɗátóki ka mǒko.

⁹ Goto, ɗáɓákánconji mǒko ka nyɔngɔ á nke, nke aámbé ɗáɓánconji ndiu ka nyɔngɔ á mǒko.

¹⁰ Ka nyɔngɔ índɔ unge, akeni nke áɓɛ na mphangiɔ á kɔkɔta gǔ á mɔ̌ akɛ, ka nyɔngɔ á ɓamalaéka.

¹¹ Cɔ, mosá á Mɔkɔta, nke nnaoika kángá á mǒko, mǒko nna phɔtɔ oika kángá á nke.

¹² Nga, a tɔ ɓíndɔ ɗáɓánconji nke n'atóki ka mǒko, a phɔtɔ ɓó unge nke aomonja mǒko, na kema bui aotóka ka Mokonga.

¹³ Tenani phɔ́ nyɔngɔ nde sasanu: Akeni nke ámɛmɛ Mokonga na káɓumbi mɔ̌ akɛ?

¹⁴ Ka ɓeana na ɓî Mokonga ɗáconji mokonda, ande soni ka mǒko ɓá n'ephuti.

¹⁵ Ephuti ande gǎkɛ ɓoombia ka nke nga, ɓámophi nke ephuti ɓea ngɔ́mbɛ ka nyɔngɔ á ɓumba á mɔ̌ akɛ.

¹⁶ A gǎkɛ oɓá nkpa n'aopúa ka nyɔngɔ ndɔ, kaɓɛ ɓesu, kaɓɛ kanisa ndea Mokonga, áúbɛ gea, ɓéké na asii nɛngbo.

Eea á ɔngana

¹⁷ Ka ɓeana na kisɛki nde nɛɔnɔɔnisa, kɛ́ɔtɔka na nenobebi ka nyɔngɔ í. Ka nyɔngɔ nde, ɓî ɓoodondanaga, ɓojeɗe aɓiki phɛɛ kɔnyɛ́nya ɓonjánja.

¹⁸ Ɓámongoɗi phɔ́ gea, ɓî ɓoodondanaga, ɓokatanigi sɔsɔɓɛ anu. Na neɓeeki gea ka nyɔngɔ ndɔ, kau ande ɗoni.

¹⁹ (Eya, akeni katanaga áɓɛ sɔsɔɓɛ anu ka gea, ɓakiísito á ɗoni ɓáɔnɛkanɛ sɔsɔɓɛ anu.)

²⁰ Cɔ, ɓî ɓoodondanaga, nna eea ndea Mɔkɔta unge ɓooea.

²¹ Cɔ, ɓî ɓooeaga, nkpa na nkpa aokamisaga ea eea ínɛkɛ, na ɓakpa ɓuangbo na ɓá na nja, ɓuangbo makana n'aɔ́bɛɗa.

²² Cɔ, ɓókó n'endu nde anokeni ka eaga na noa kau? Ɓootondea kanisa ndea Mokonga, na konda á kusa na soni ɓakpa nde ɓáká na kema ee? Nénongoɗeɛ ɓo? Nénobebɛ? Kétanda onobeba k'índɔ.

²³ Cɔ, nnde ande ɓɔphɛi nde ɗɛ́tɔi ka Mɔkɔta, na a tɔ unge ɗɛ́nɔtɔ̌mi. Kǐpha ndɔ, ɗáɓántɔgi Mɔkɔta Yéso, ɗábɛɗi mokati,

²⁴ mbusa áonsega Mokonga, áoɓúnaga ú, áogea te: «Nnde ande nyama ani, nnde ɓábisi ka phɔanu. Geani ɓó, ka kanisia ani.»

²⁵ Mbusa á eaga, â phɔtɔ ɔbɛɗa kiɓe, áɔyɔnga te: «Kiɓe nde ande ɔngana á kɛ̌kɛ, ka magiani. Mɔngɔ bui nde ɓoonoa, geani ɓó ka kanisia ani.»

²⁶ Nga, mɔngɔ bui nde ɓooea mokati nde, na noa divai á ka kiɓe nde, ɓooúbisa kukuwa á Mɔkɔta na ka ɓî ajaeka.

²⁷ Ka nyɔngɔ nde, nkpa nde aoea mokati na noa á divai á ka kiɓe ndea Mɔkɔta na kákeni, mmbɔ agi ɓojeɗe ka phɔa nyama na magia á Mɔkɔta.

²⁸ Cɔ, ambe nkpa na nkpa sasakɛ áɛnjiɛ tambea akɛ bîbíbí mpɔ, áeɛ mokati nde na noa divai á ka kiɓe ndee.

²⁹ Ka nyɔngɔ nde, aoɓá nkpa n'aí mokati na noa divai á ka kiɓe kángá úba kantíti á nyama á Mɔkɔta, ateni nyɔngɔ nɛkɛ akpɛ yɛ sasakɛ ka ea na noa.

³⁰ Ka nyɔngɔ índɔ unge, ɓakpa ɓásii sɔsɔɓɛ anu ɓáosamba, na ɓuangbo nyama aɓɔ aɔlɔmani, na ɓásii ɓaku.

³¹ Atúoɓá na ɓɛɛnji phɔ́ tambea asu bîbíbí, ámbe Mokonga kátótɛnɛku ka nyɔngɔ nɛsu.

³² Cɔ, Mɔkɔta a gǎkɛ otena nyɔngɔ nɛsu na ɓɛta asu ka gea, ɓákátenɛmbɛ nyɔngɔ nɛsu akpɛ kimoci na ɓakpa nde ɓánáomúba Mokonga.

³³ Cɔ, ɓaya, mbenɔ nde ɓoodondanaga ka eaga eea á Mɔkɔta, ɓóndeanagani.

³⁴ Aoɓá nkpa n'ana nja, áeɛgɛ k'éndu nɛkɛ, ka ɓangisa gea, mbenɔ nde ɓoodondanaga, Mokonga katenɛmbɛ nyɔngɔ nɛnu. Cɔ, nɛɓɔngisiagande nyɔngɔ nɛngbo, nnde ajigi, mbenɔ nde nejuande mɔtɛ-anu.