1 Ɓakɔlítɔ 10 - Ɔngana á Kɛ̌kɛ

Ɓékésikiɛ mɔnɔ mbusa ɓíndɔ Ɓaisilaɛ́li ɗáɓági kala

¹ Ɓaya, kékondi gea, ɓóɓoseɛ nyɔngɔ ndee: Ka mbenɔ ndea Mósa, ɓatatasu ɗáɓátambi ɓɔbu kusi égugu, na ɗáɓájabi phɔtɔ ɓɔbu ka oɓenge ánjɛ.

² Egugu na iɓo ndɔ, ɗátú mphangiɔ á oɓatísɔ ka ɓɔ ɓɔbu ka gea, ɓájukanɛ na Mósa.

³ Ɓɔbu ɗáɓáí tɔ ea moci á měma.

⁴ Ɓɔbu ɗáɓánu tɔ kema á konoa moci á ka měma nga, ɗáɓánu iɓo nde ɗájúani k'ɛ́tɛ nde ɗáotamba kimoci na ɓɔ, na ɛtɛ ndɔ ɗátú Kiísito.

⁵ Cɔ, ɓakpa ɓásii sɔsɔɓɛ aɓɔ, ɗáɓákámɓɔngɛi gǎkɛ Mokonga. Kaɓondɔ unge, ɗáɓáku ka nkanda.

⁶ Nyɔngɔ ndɔ ande mphangiɔ ka ɓesu ka gea, ɓékéɓɛ mɔnɔ na mɔphɛ ájeɗe ɓea ɓɔ.

⁷ Cɔ, ɓókǒɗokomisɛmbɛ ɓamokonga á mbɛa ɓíndɔ ɓakpa ɓuangbo sɔsɔɓɛ aɓɔ ɗáɓági. Ɓáɗundu suɓi á Ɓuku á Mokonga ɓe: «Ɓakpa ɗáɓáiki ka eaga na noa, mpɔ ɓáomá, ɓáoga k'aphe á mɓina.»

⁸ Ɓékéɓɛ mɔnɔ ɓato á otungɔ ɓíndɔ ɓakpa ɓuangbo sɔsɔɓɛ aɓɔ ɗáɓátú ɓato á otungɔ. Kaɓondɔ unge, ɓakpa ɛlɛphu nkama iɓɛ na isaɔ (23.000) ɗáɓáku k'ésa mo.

⁹ Ɓókontombɛgɛmbɛ mɔnɔ Kiísito ɓíndɔ ɓakpa ɓuangbo sɔsɔɓɛ aɓɔ ɗáɓántombigi. Kaɓondɔ unge, ɗáɓáku na ɓanjɔka.

¹⁰ Ɓókóngɔngɔnɛgɛmbɛ ɓíndɔ ɓakpa ɓuangbo sɔsɔɓɛ aɓɔ ɗáɓángɔngɔnigi. Kaɓondɔ, malaéka á otúkɔtúkɔ áǒkɔndɔkisa.

¹¹ Cɔ, kema ndɔ ɗáedondi ka gea, áɓɛ mphangiɔ ka ɓesu. Ɗáɓásoɗunɗui ú, ka ɛngɛphisa asu, ɓesu íɓundɔ ɓeoenda ka sungiaga á matú.

¹² Cɔ, nkpa nde aokanisia gea te, amame, éambɛ. Kaguɛ mɔnɔ.

¹³ Tombaga bubui nde aonódonda, a tɔ unge aǒdonda ɓakpa ɓɔbu. Mokonga kánóɗeketɛku gea, tombaga nde ɓoɓande kau anyɛ́nyɛ ɓukpɛkpɛ anu nga, Yɛ nna oketia mɔkɔ nɛkɛ. Mbenɔ nde ɓoɓande suɓi á tombaga, anóphande gǎkɛ ɓukpɛkpɛ á phiphia í na aphe á tɔka í.

¹⁴ Kaɓondɔ, ɓadani ékondi, téani ɗokomisa á ɓamokonga á mbɛa.

¹⁵ Nɛɔyɔnga na ɓenu ɓea ɓakpa nde ɓáoúbapha. Ténani sasanu nyɔngɔ nde nɛɔyɔnga.

¹⁶ Cɔ, ɓî ɓeonoa kiɓe nde ɓeonsega Mokonga kau, nna ɔngana asu ka magia á Kiísito ungɔ ee? Ɓî ɓeoea mokati, nndɔ nna ɔngana asu ka nyama á Kiísito ee?

¹⁷ Nga, mokati ndɔ a tɔ moci. Nanga ɓéɓika, ɓe tɔ nkpa moci ka nyama. Nga, ɓe tɔ ogabisanaga mokati ndɔ moci.

¹⁸ Ɔ́nani phɔ́ Ɓaisilaɛ́li ɓunde ɗáɓáoea nyama á phɛ́a nnde ɓátoɓu gǔ ɛ́tɛ-ɔ́phɛ́ɔ, ɓá tɔ kimoci na Mokonga.

¹⁹ Cɔ, nɛ́yɔngɛ ye ɓo? Nyama nde ɓáphúi k'ɔ́phɛ́ɔ á ɓamokonga á mbɛa, ande kema sina, kaɓɛ ɓamokonga á mbɛa ana kantíti sina?

²⁰ Nna ye kema. Ne engekisi gǎkɛ gea, ɓakpa nde ɓákámɓeeki Yéso ɓáɔphɛ́a nyama ka ɓaketi, nna ndiu ka Mokonga. Kékóndi gǎkɛ ɓóɓɛ kimoci na ɓaketi.

²¹ Ɓókóɔtɔka na ɓonu ka mɔngɔ ímoci kiɓe á Mɔkɔta na kiɓe á ɓaketi. Ɓókó phɔtɔ ɔtɔka na ɓoigi ka mɔngɔ ímoci eea ndea Mɔkɔta na eea ndea ɓaketi.

²² Cɔ, aoɓá na ɓegi ɓó, ɓeokaɓa jujúkisa á nsengo ndea Mɔkɔta? Ɓe ɓákpɛkpɛ kɔnyɛ́nya yɛ?

Geani tɔ kema bui ka ombisa á Mokonga

²³ Ɓakpa ɓunɛngbo sɔsɔɓɛ anu ɓáɔyɔnga te: «Ɓásosi tɔ kema bubui.» A ɓó! Nna gǎkɛ kema bubui unge aoenga ka mɔtisa á ɓeekea.

²⁴ Ambe nkpa na nkpa kakáɓɛgɛmbɛ kema á ka phɔa akɛ sasakɛ, ákaɓɛgɛ ndiu kema á ka phɔa á ɓakpa ɓuangbo.

²⁵ Ɓoodonda kema nde ɓáosombisa ka mosomba, eani ú na měma á kanga ngǎka, kángá á úsiaga.

²⁶ Nga, Ɓuku á Mokonga agi: «Mokonda na kema bubui nde a suɓi í, ande á Mɔkɔta.»

²⁷ Aoɓá nkpa nde kámɓeeki Kiísito n'anɔɔphanei eea, ɓooɓeekea gǎ á kuɓei, eagani ú, kángá úsiaga, kángá měma á ngǎka.

²⁸ A ye gǎkɛ oɓá nkpa ɓaangbo n'anongoɗi gea: «Nyama ndɔ ɓáphúi ka phɛ́a á ɓamokonga á mbɛa.» Cɔ, ɓókóeɛmbɛ, ka nyɔngɔ á nkpa ndɔ atónongoɗi na ka nyɔngɔ á ngǎka á ka měma.

²⁹ Nɛyɔngi ɓó ka nyɔngɔ á měma á nkpa ndɔɔ, nna ka nyɔngɔ á měma anu. Cɔ, ka nyɔngɔ sina nde nyɔngɔ á měma á nkpa ɓaangbo, aoimisia nyɔngɔ á kema nde neogea ú kángá ngǎka?

³⁰ Kaɓɛ na neonsega Mokonga ka kema nde neoea, cɔ, ɓakpa ɓáomoca ka nyɔngɔ á kema nde neonsega Mokonga kau ka ɓo?

³¹ Cɔ, kaɓɛ na ɓooeaga, ɓoonoa na ɓoogea kema sina, geani tɔ kema bubui ka sega á Mokonga.

³² Tambea anu kaɓɛmbɛ ephiphi ájeɗe ka Ɓayúda, na ɓunde ɓáná Ɓayúda, phɔtɔ ka ɓato á kanisa ndea Mokonga.

³³ Eme Pɔ́lɔ, neókondisaga na ɓakpa ɓɔbu ka nyɔngɔ bui. Kéokáɓa ɓonjánja nɛmɔ sasani, ne ndiu okaɓa ɓonjánja ka ɓakpa ɓɔbu gea te, Mokonga éamisɛ ka měma.