Yûhenna 9 - Peymana Nû (Încîl)

Vebûna çʼeʼvêd yekî zikmakîyêda kor

¹ Gava ku Îsa derbaz dibû, Ewî merivekî ji zikmakîyêda kor dît.

² Şagirtêd Wî jê pirsîn: «Dersdar, gunê kʼê ye ku ev meriva kor ji dîya xwe bûye? Gunê wî ye, yan yê dê û bavê wî ye?»

³ Îsa li wan vegerʼand û got: «Ne gunê wî ye, ne jî yê dê û bavê wî ye, lê ev yek aha bûye, wekî kirêd Xwedê li ser wî bêne eʼyankirinê.

⁴ Hʼeta ku rʼoj heye, gerekê em kirêd Wî bikin, Yê ku Ez şandime. Şev tê, hingê tʼu kesê nikaribe tiştekî bike.

⁵ Hʼeta ku Ez dinyayêda me, rʼonaya dinyayê me».

⁶ Ewî ev yek ku got, tʼûyî eʼrdê kir, ji tʼûkê hʼerʼî çêkir, ew hʼerʼî çʼeʼvê wî merivî da

⁷ û jêrʼa got: «Herʼe serçʼeʼvê xwe hʼewzê Sîlwamêda bişo», (ku ev nav tê feʼmkirin «Şandî»). Ewî jî çû serçʼeʼvê xwe şûşt û bi çʼeʼvêd vebûyî vegerʼîya.

⁸ Cînarêd Wî û ewêd ku berê ew dîtibûn ku wî pʼars dikir, digotin: «Eva ewî kor nîne, ku rʼûdinişt û pʼars dikir?»

⁹ Hineka digot: «Eva ew e», hineka jî digot: «Na, ne ew e, lê mîna wî ye». Lê wî xwexa digot: «Ez ew im».

¹⁰ Hingê jê pirsîn: «Ku usa ye çʼeʼvêd te çawa vebûne?»

¹¹ Ewî li wan vegerʼand û got: «Ew merivê ku jêrʼa dibêjin Îsa, Ewî hʼerʼî çêkir û li çʼeʼvêd min dan û minrʼa got: ‹Herʼe hʼewzê Sîlwamê û serçʼeʼvê xwe bişo›. Ez jî çûm, min serçʼeʼvê xwe şûşt û çʼeʼvêd min vebûn».

¹² Wana jê pirsî: «Kʼa Ew kʼu ye?» Ewî got: «Ez nizanim».

Fêrisî gilîya ji yê qencbûyî dikʼişînin

¹³ Wana ew merivê ku berê kor bû, birine cem fêrisîya.

¹⁴ Ew rʼoja ku Îsa hʼerʼî çêkir û çʼeʼvêd wî vekirin, şemî bû.

¹⁵ Fêrisîya jî jê pirsî, kʼa çawa çʼeʼvêd wî vebûne? Ewî wanrʼa got: «Hʼerʼî li çʼeʼvêd min da, min serçʼeʼvê xwe şûşt û niha ez dibînim».

¹⁶ Hingê hineke ji fêrisîya got: «Ev meriva ne ji Xwedê ye, çimkî Ew rʼoja şemîyê xwey nake». Lê hineka jî digot: «Merivekî gunekʼar çawa dikare van kʼeremeta bike?» Bi vî awayî nav wanda bû dutîretî.

¹⁷ Hingê, dîsa gotine yê ku kor bû: «Tu çi dibêjî bona Ewî ku çʼeʼvêd te vekirin?» Ewî jî got: «Ew pʼêxember e».

¹⁸ Lê cihûya bawer nedikir ku ew kor bûye û çʼeʼvêd wî vebûne, hʼeta gazî dê û bavê wî nekirin

¹⁹ û ji dê û bavê wî nepirsîn: «Ev e ew kurʼê weyî ku hûn dibêjin, ji zikmakîyêda kor e? Eva çawa niha dibîne?»

²⁰ Dê û bavê wî li wan vegerʼandin û gotin: «Em zanin ku eva kurʼê me ye û ji zikmakîyêda kor e.

²¹ Lê niha ew çawa dibîne, em nizanin, yan kʼê çʼeʼvêd wî vekirine, em wê jî nizanin. Ew îdî mezin e, ji wî bipirsin, bira ew caba xwe bide».

²² Dê û bavê wî ji tirsa cihûya aha gotin, çimkî cihûya pêşda ya xwe kiribûne yek: «Heger kʼî bêje Îsa Mesîh e, ewê ji kʼinîştê bê derxistinê».

²³ Lema dê û bavê wî gotin: «Ew îdî mezin e, ji wî bipirsin».

²⁴ Awa cara duda wana gazî wî merivê ku kor bû kirin û gotinê: «Ber Xwedê rʼast bêje! Em zanin ku Ew Meriva gunekʼar e».

²⁵ Ewî li wan vegerʼand û got: «Ez nizanim Ew gunekʼar e, yan na, lê ez tʼenê tiştekî zanim ku ez kor bûm û niha dibînim».

²⁶ Dîsa ji wî pirsîn: «Ewî çi te kir? Çʼeʼvêd te çawa vekirin?»

²⁷ Ewî li wan vegerʼand û got: «Min hêja werʼa got, lê we guhdarî nekir. Çima hûn dixwazin dîsa bibihên? Dibe ku hûn jî dixwazin bibine şagirtêd Wî?»

²⁸ Wana ew bêhurmet kir û gotin: «Tu yî şagirtê Wî, lê em şagirtêd Mûsa ne!

²⁹ Em zanin ku Xwedê tʼevî Mûsa xeber daye, lê bona Vî em nizanin ku Ew ji kʼu ye!»

³⁰ Evî merivî li wan vegerʼand û got: «Hema ev e eʼcêba giran, ku hûn nizanin Ew ji kʼu ye, lê Wî çʼeʼvêd min vekirin.

³¹ Em zanin ku Xwedê dengê gunekʼara nabihê. Lê heger merivek xwedênas e û xwestina Wî dike, Xwedê dengê wî dibihê.

³² Hê berêda tʼu cara qet nehatîye bihîstinê, ku yekî çʼeʼvêd merivekî zikmakîyêda kor vekiribin.

³³ Heger Eva Meriva ji Xwedêda nîbûya Wî nikaribû tʼu tişt bikira».

³⁴ Caba wî dan û gotin: «Tu serda-pêda nav gunada dinê kʼetî yî û me hîn dikî?» Û ew ji kʼinîştê derxistine der.

Korbûna rʼuhʼanî

³⁵ Gava Îsa bihîst ku ew derxistine der, ew dît û jêrʼa got: «Tu bawerîya xwe Kurʼê Mêriv tînî?»

³⁶ Ewî pirsî û gotê: «Ez xulam, Ew Kʼî ye, wekî ez bawerîya xwe Wî bînim?»

³⁷ Îsa jêrʼa got: «Te Ew dît û Ew e Yê ku niha tʼevî te xeber dide».

³⁸ Ewî got: «Xudan, ez bawer dikim!» û ber Wî ta bû.

³⁹ Îsa got: «Ez bona dîwankirinê hatime vê dinyayê, wekî yêd ku nabînin bibînin û yêd ku dibînin kor bin».

⁴⁰ Hineke ji fêrisîya li wir hazir bûn, gava ev yek bihîstin, jêrʼa gotin: «Çima em jî kor in?»

⁴¹ Îsa gote wan: «Heger hûn kor bûna, gunêd weyê tʼunebûna. Lê niha hûn ku dibêjin: ‹Em dibînin›, didine kʼifşê ku hûn nava gunêd xweda dimînin.