Yûhenna 2 - Peymana Nû (Încîl)

Deʼwata li gundê Qanaya Celîlê

¹ Du rʼoja şûnda bajarê Qanaya Celîlêda deʼwatek hebû. Dîya Îsa jî li wê derê bû,

² Îsa û şagirtêd Wî jî bona deʼwatê hatibûne tʼeglîfkirinê.

³ Gava kêmasî kʼete şeravê, dîya Îsa jêrʼa got: «Şerava wan nema».

⁴ Îsa lê vegerʼand û gotê: «Eʼvdê, çî te Min kʼetîye? Hê ne wextê Min e».

⁵ Dîya Wî berdestîyarʼa got: «Çi ku werʼa bêje, bikin».

⁶ Û şeş kʼûpêd kevirî hebûn, ku li gora eʼdetêd cihûya bona şûştin-veşûştina wana li wir danîbûn. Ji wana her yekî ji hʼeyştê hʼeta sed bîst lîtir av hildida.

⁷ Îsa wanrʼa got: «Van kʼûpa tʼijî av kin». Û wana jî lêvarʼa dagirt.

⁸ Paşê wanarʼa got: «Niha hinekî dagirin, bibin bidine serdeʼwatî». Ewana jî ew bir.

⁹ Gava serdeʼwatî ji wê ava ku bibû şerav teʼm kir, wî tê dernexist ku ew ji kʼu hat, lê berdestîyêd ku av kʼişandibûn zanibûn. Serdeʼwatî gazî zeʼvê kir

¹⁰ û jêrʼa got: «Her kes pêşîyê şerava xweye rʼind datîne ser tʼexte û paşê gava vexwarî ne, ew ya nerʼind derdixe. Lê te şerava rʼind hʼeta niha xwey kirîye».

¹¹ Eva nîşana Îsaye pêşin bû, ku Wî Qanaya Celîlêda kir. Bi vî awayî Ewî rʼûmeta Xwe da xuyakirinê û şagirtêd Wî bawerîya xwe Wî anîn.

¹² Pey vê yekêrʼa, Îsa tʼevî dîya Xwe, birêd Xwe û şagirtêd Xwe çû Kefernahûmê, lê gelek rʼoja Ew li wê derê neman.

Îsa pʼaristgehê paqij dike

¹³ Cejina cihûyaye Derbazbûnê nêzîk bû, Îsa hevraz çû Orşelîmê.

¹⁴ Pʼaristgehêda Ewî yêd ku dewar, pez û kevotk difirotin, usa jî yêd pʼereguhêrʼ rʼûniştî dîtin.

¹⁵ De îjar Wî ji bena qamçîk çêkir, hʼemû ji pʼaristgehê pez û dewarêd wanva derxistin, pʼerêd pʼereguhêrʼa rʼêtin û tʼextêd wan welgerʼandin.

¹⁶ Kevotkfiroşarʼa got: «Vana ji vê derê hildin! Îdî mala Bavê Min nekine bazargeh!»

¹⁷ Hate bîra şagirtêd Wî ku aha hatîye nivîsarê: «Xîreta hindava mala Teda agir Min dixe».

¹⁸ Hingê cihûya jê pirsî: «Tê çi nîşanê nîşanî me kî, ku hʼukumê Te heye van tişta bikî?»

¹⁹ Îsa li wan vegerʼand û got: «Vê pʼaristgehê hilşînin, Ezê nava sê rʼojada rʼakim».

²⁰ Hingê cihûya jêrʼa got: «Nava çil şeş salada eva pʼaristgeha hatîye çêkirinê. Çawa Tê wê nava sê rʼojada rʼakî?»

²¹ Lê Îsa derheqa pʼaristgeha bedena Xweda xeber dida.

²² Peyrʼa gava Ew ji mirinê rʼabû, şagirta ew gotina Wî anî bîra xwe û wana ew nivîsar û gotina Îsa bawer kirin.

Dilê her merivî Îsava eʼyan e

²³ Awa gava ku Îsa Cejina Derbazbûnêda li Orşelîmê bû, geleka ew nîşanêd ku Wî dikirin dîtin, bawerîya xwe navê Wî anîn.

²⁴ Lê Îsa bawerîya Xwe li wan nedanî, çimkî dilê hʼemû meriva Wîva eʼyan bû.

²⁵ Ne hʼewce bû, ku yekî hindava merivekîda şeʼdetî bida, çimkî Wî dilê meriva zanibû.