Yûhenna 10 - Peymana Nû (Încîl)

Şivan û pezêd wî

¹ Ez rʼast bê xêlif werʼa dibêjim, ewê ku dêrîrʼa nakʼeve axilê pêz, lê cîkî dinrʼa dikʼevê, ew diz û qaçax e.

² Lê ewê ku dêrîrʼa dikʼevê, ew şivanê pêz e.

³ Dergehvan derî li ber vedike, pez dengê wî dibihê û ew bi nava gazî pezêd xwe dike û wan derdixe derva.

⁴ Gava ew pezêd xwe gişkî derdixe, pêşîyê dikʼeve û pez jî pey wî diçe, çimkî dengê wî nas dikin.

⁵ Ew tʼu car pey yekî xerîb naçin, lê ji wî dirʼevin, çimkî dengê yê xerîb nas nakin».

⁶ Îsa ev mesele wanrʼa got, lê wan feʼm nekir, ku Ew çi wanrʼa dibêje.

Şivanê qenc

⁷ Awa Îsa dîsa wanrʼa got: «Ez rʼast bê xêlif werʼa dibêjim, Ez im derê pêz.

⁸ Ew hʼemûyêd ku berî Min hatine diz û qaçax in, lê pêz guhdarîya wan nekirîye.

⁹ Ez im derî. Yê ku bi destê Min bikʼeve hindurʼ, wê xilaz be. Ewê bikʼeve hindurʼ, derkʼeve û çʼêrê bibîne.

¹⁰ Diz tʼenê bona dizîyê, kuştinê û qirʼkirinê tê. Lê Ez hatime ku jîyîna wan hebe, jîyîna ser jîyînê.

¹¹ Ez im şivanê qenc. Şivanê qenc eʼmirê Xwe bona pezê Xwe dide.

¹² Lê yê pʼîgar, ku ne şivan e û pez jî ne yê wî ye, gava dibîne gur tê, ew pêz dihêle û dirʼeve. Gur jî dikʼeve nava pêz tʼûrʼ-tʼûrʼî dike.

¹³ Pʼîgar dirʼeve, çimkî ew pʼîgar e û li ber pêz nakʼeve.

¹⁴ Ez im şivanê qenc. Ez yêd Xwe nas dikim û yêd Min jî Min nas dikin,

¹⁵ çawa ku Bav Min nas dike, Ez jî usa Wî nas dikim û eʼmirê Xwe bona pezêd Xwe didim.

¹⁶ Pezêd Mine din jî hene, yêd ku ne vî axlîda ne. Gerekê Ez wana jî bînim û ewê dengê Min bibihên û bibine kerîk ber şivanekî.

¹⁷ Bona vê yekê Bav Min hʼiz dike, çimkî Ez eʼmirê Xwe didim, wekî Ez wê dîsa bistînim.

¹⁸ Tʼu kes wî eʼmirî ji Min nastîne, lê Ez Xwexa wî didim. Hʼukumê Min heye, Ez wî bidim û hʼukumê Min heye dîsa wî bistînim. Min ev tʼemî ji Bavê Xwe standîye».

¹⁹ Bona vê xeberdanê dîsa nava cihûyada bû dutîretî.

²⁰ Ji wan geleka digot: «Eva cinakʼetî ye û dîn e. Çima hûn guhdarîya Wî dikin?»

²¹ Hinekêd din jî digotin: «Eva xeberdana ne ya cinakʼetîya ye. Qet cin dikarin çʼeʼvêd kora vekin?»

Nebawerîya cihûya

²² Hingê li Orşelîmê Cejina Pîrozkirina Pʼaristgehê hat û zivistan bû.

²³ Îsa li pʼaristgehê hêwangeha Silêmanda digerʼîya.

²⁴ Cihûya li dora Wî girt û jê pirsîn: «Hʼeta kʼengê Tê me şikêda bihêlî? Heger Tu yî Mesîh, merʼa aşkere bêje!»

²⁵ Îsa li wan vegerʼand û got: «Min werʼa got, lê we bawer nekir. Ew kirêd ku Ez bi navê Bavê Xwe dikim, ew bona Min şeʼdetîyê didin,

²⁶ lê hûn bawer nakin, çimkî hûn ne ji pezêd Min in.

²⁷ Pezêd Min dengê Min dibihên, Ez jî wan nas dikim û ew pey Min tên.

²⁸ Ez jîyîna hʼeta-hʼetayê didime wan û ew tʼu car unda nabin û tʼu kesê wan ji destê Min dernexe.

²⁹ Ewêd ku Bavê Min dane Min, ser her tiştîrʼa ne û tʼu kes nikare wan ji destê Bavê Min derxe.

³⁰ Ez û Bav yek in».

³¹ Li wir cihûya dîsa kevir hildan, ku Wî bidine ber kevira.

³² Îsa wanrʼa got: «Min ji Bavê gelek kirêd qenc nîşanî we kirin. Hûn bona kʼîjan kirî Min didine ber kevira?»

³³ Cihûya lê vegerʼand û gotinê: «Em bona kirêd qenc Te nadine ber kevira, lê çimkî Tu Xwedê bêhurmet dikî! Tu meriv î, lê Xwe dikî Xwedê».

³⁴ Îsa li wan vegerʼand û got: «Ne Qanûna weda nivîsar e, ku Xwedê got: ‹Hûn Xwedê ne›?

³⁵ Heger Ew wan ‹Xwedê› hʼesab dike, kʼîjanarʼa xebera Xwedê hatîye dayînê (û nabe jî ku ew nivîsar betal be),

³⁶ de îjar hûn Wîrʼa çawa dibêjin: ‹Tu Xwedê bêhurmet dikî›, Yê ku Bavê pîroz kir û şande dinyayê, çimkî Min got: ‹Ez Kurʼê Xwedê me›.

³⁷ Heger Ez kirêd Bavê Xwe nakim, Min bawer nekin.

³⁸ Lê wekî dikim, heger hûn Min bawer nakin jî, hema wan kirêd ku Ez dikim bawer bikin, wekî hûn bizanibin û feʼm kin, ku Bav nava Minda ye û Ez nava Wîda me».

³⁹ Hingê dîsa xwestin ku Wî bigirin, lê Îsa ji destê wan derkʼet.

⁴⁰ Îsa dîsa derbazî wî alîyê çʼemê Ûrdunê bû û li wê derê ma, wî cîyê ku Yûhʼenna pêşda dinixumand.

⁴¹ Gelek meriv dihatine cem Wî û nav xweda digotin: «Yûhʼenna tʼu nîşan nekir, lê çi tiştêd ku Yûhʼenna derheqa Vî merivîda gotine, hʼemû rʼast derkʼetin».

⁴² Û li wê derê geleka bawerîya xwe Wî anî.