Tîmotʼêyo I 3 - Peymana Nû (Încîl)

Bona serwêrêd civînê

¹ Vê gotinêda xêlif tʼune: Heger temê yekî li serwêrtîyê heye, ew şixulekî qenc dixwaze.

² Awa serwêr gerekê bêqusûr be, mêrê jinekê be, xwegirtî, aqilda giran, maqûl, mêvanhʼiz, hînkirinêda serxwe be,

³ ne serxweş, ne sirʼtûk, lê berbihêr, ne şerʼûd, ne pʼerehʼiz.

⁴ Bira malxêtîyê rʼind li mala xwe bike, zarʼêd xwe gurʼa xweda her alîyava maqûlîyêda mezin ke.

⁵ (Çimkî heger yek nizane malxêtîyê li mala xwe bike, wê çawa bikaribe civîna Xwedê xwey ke?)

⁶ Bira ne jî bawermendê nû be, ku nebe kʼubar be, dîwana wî jî mîna ya mîrêcin bê kirinê.

⁷ Wekî din jî gerekê qedirê wî cem yêd ji civînê der jî hebe, ku nebe bê rʼezîlkirinê û bikʼeve tʼeleka mîrêcin.

Bona berdestîyêd civînê

⁸ Usa jî bira berdestî giran bin, xeberdanêda durʼûtîyê nekin, xwe nedine şeravê, pey kʼeda hʼeram nekʼevin.

⁹ Rʼastîya bawerîyêye eʼyanbûyî bi îsafa rʼihʼet xwey kin.

¹⁰ Û evana jî bira pêşda bêne cêrʼibandinê, heger tiştek ser wan tʼunebe, hingê bira berdestîyê bikin.

¹¹ Usa jî bira jinêd wan giran, ne buxdanbêj, lê xwegirtî, her tiştîda amin bin.

¹² Berdestî gerekê mêrê jinekê be, qenc malxêtîyê li zarʼ û mala xwe bike.

¹³ Ewêd ku rʼind berdestîyê dikin, xwerʼa dereceke bilind qazinc dikin û serbestîke mezin dest tînin bona bawerîya Mesîh Îsa.

Surʼa xwedênasîyê

¹⁴ Ez ku van tişta terʼa dinivîsim, guman heye ezê zûtirekê ser teda bêm.

¹⁵ Lê heger ez derengî jî bikʼevim, tê zanibî gerekê çawa mala Xwedêda rʼabin-rʼûnên, ya ku civîna Xwedêyê sax e, stûn û hʼîmê rʼastîyê ye.

¹⁶ Bê xeberdan, gelekî kʼûr e surʼa xwedêpʼaristîya me: Ew bi bedenî xuya bû, bi Rʼuhʼ rʼastîya Wî hate îzbatkirinê, milyakʼetava hate dîtinê, nav mileta hate dannasînkirinê, dinyayêda hate bawerkirinê û rʼûmetêrʼa hate hilatinê.