Selanîkî II, 3 - Peymana Nû (Încîl)

Bona me dua bikin

¹ Heyneser xûşk-birano, bona me dua bikin, wekî xebera Xudan zû pêşda herʼe û bê pesindayînê, çawa nava weda bû.

² Dua bikin, wekî em ji merivêd neheq û xirab xilaz bin, çimkî her kes Mizgînîyêda amin nîne.

³ Lê Xudan Xwexa amin e, wê we bişidîne û ji yê Xirab xwey ke.

⁴ Em bi saya Xudan weda guman in, ku me çi tʼemî dane we, hûn diqedînin û hûnê biqedînin jî.

⁵ De bira Xudan mêla we bide ser hʼizkirina Xwedê û sebira Mesîh.

Bona yêd bêpʼergale bêxîret

⁶ Em tʼemî li we dikin xûşk-birano, bi navê Xudanê xwe Îsa Mesîh, ku hûn xwe ji her xûşk-birayê bêpʼergale bêxîret dûr bigirin, yêd ku wan rʼaw-rʼizimêd me dane we naqedînin.

⁷ Hûn xwexa zanin ku gerekê hûn çʼeʼv bidine me, çimkî em nava weda bêpʼergal-bêxîret nîbûne,

⁸ ne jî nanê tʼu kesî bê heq xwarîye, lê bi xûdana eʼnîya xwe şev û rʼoj dixebitîn, diçerçirîn, wekî ser we tʼu kesî nebine bargiranî.

⁹ Ne ku îzina me tʼunebû, lê me nexşê xwe nîşanî we kir, ku hûn çʼeʼv bidine me.

¹⁰ Çimkî gava em hê cem we bûn jî, me ev yek werʼa digot: «Kʼî naxwaze bixebite, bira nexwe jî».

¹¹ Belê em dibihên ku nava weda hinek bêpʼergal-bêxîret dijîn, ne şixulkʼarê xwe ne, lê tʼevî şixulê xelqê dibin.

¹² Em bi navê Xudan Îsa Mesîh tʼemî û hîvî ji yêd usa dikin, ku bi meʼrîfetî bixebitin û nanê xwe bixwin.

¹³ Lê hûn xûşk-birano, ji qencîkirinê newestin.

¹⁴ Heger yek guhdarîya gotinêd meye vê neʼmêda neke, wî rʼaçʼeʼv kin û hevaltîyê wîrʼa nekin, ku şerm bike.

¹⁵ Lê nebe ku bi çʼeʼvê xirab li wî binihêrʼin, lê mîna bira şîret kin.

Dua û silavêd axirîyê

¹⁶ De bira Xudanê eʼdilayîyê xwexa, her gav, her alîyîva eʼdilayîyê bide we. Xudan tʼevî we hʼemûya be.

¹⁷ Eva silava bi destê min Pawlos e, çawa nîşana hʼemû neʼmêd min. Ez aha dinivîsim.

¹⁸ Kʼerema Xudanê me Îsa Mesîh tʼevî we hʼemûya be.