Selanîkî I, 5 - Peymana Nû (Încîl)

Hatina Xudanda hazir bin

¹ Lê bona wext û zemana xûşk-birano, ne hʼewce ye em tiştekî werʼa binivîsin,

² çimkî hûn xwexa pʼak zanin ku Rʼoja Xudan wê mîna dizê şevê bê.

³ Gava bêjin: «Dinê seqirʼî û bêxofî ye», hingê xezebê nişkêva ser wanda bê, mîna êşa kʼulfeta hʼemle û wê nikaribin qet jê xilaz bin.

⁴ Lê hûn xûşk-birano, teʼrîyêda nînin ku ew Rʼoj mîna dizekî ser weda bigire.

⁵ Hûn hʼemû jî zarʼêd rʼonayîyê ne û zarʼêd rʼojê ne. Em ne yêd şevê ne, ne jî yêd teʼrîyê ne.

⁶ Awa em xewêda nemînin mîna yêd mayîn, lê hʼişyar û serxwe bin.

⁷ Çimkî ewêd ku rʼadizên, şevê rʼadizên û ewêd ku serxweş dibin, şevê serxweş dibin.

⁸ Lê em ku yêd rʼojê ne, gerekê serxwe bin: Zirihʼa bawerîyê û hʼizkirinê li xwe wergirin, kʼumzirihʼê gumana xilazbûnê jî bidine serê xwe.

⁹ Xwedê em bona xezebê kʼifş nekirine, lê wekî xilazbûnê bistînin, bi destê Xudanê me Îsa Mesîh.

¹⁰ Ew bona me mir, wekî em heger sax bin yan mirî bin, tʼevî Wî bijîn.

¹¹ Bona vê yekê dil bidine hev û alîkʼarîya hevdu bikin, çawa hûn dikin jî.

Tʼemî û silavêd axirîyê

¹² Em hîvî ji we dikin xûşk-birano, qedirê wan bigirin, yêd ku nava weda dixebitin, jîyîna xwedênasîyêda seʼvîtîyê li we dikin û we şîret dikin.

¹³ Qedirê wana bi hʼizkirinê hê bilind bigirin bona şixulê wan. Hevrʼa tʼifaq bin.

¹⁴ Em hîvî ji we dikin xûşk-birano, yêd bêpʼergale bêxîret şîret kin, dil bidine ber tirsoneka, kêrî kʼetîya werin, hindava hʼemûyada sebira we hebe.

¹⁵ Haş ji xwe hebin, nebe ku yek ji ber xirabîyêva xirabîyê bike, lê her gav ser nêta qencîyê bin, hin bona hev, hin jî bona hʼemûya.

¹⁶ Her tʼim şa bin,

¹⁷ her gav dua bikin,

¹⁸ her tiştîda rʼazîbûnê bidin, çimkî ev e xwestina Xwedê bi saya Mesîh Îsa bona we.

¹⁹ Rʼuhʼê Pîroz netemirînin.

²⁰ Pʼêxembertîya bêrʼûmet nekin.

²¹ Her tiştî bicêrʼibînin, tiştêd qenc qewîn bigirin.

²² Ji her cûrʼe xirabîyê dûr kʼevin.

²³ De bira Xwedêyê ku eʼdilayîyê dide, Xwexa we lap buhurtî-jibare ke, tʼemamîya rʼuhʼ, nifûs û qalibê we bêqusûr xwey ke, hʼeta hatina Xudanê me Îsa Mesîh.

²⁴ Amin e Ewî ku gazî we dike, wê mîyaser ke jî.

²⁵ Xûşk-birano, bona me jî dua bikin.

²⁶ Silavê bidine hʼemû xûşk-bira, bi rʼamûsana şîrê hʼelal.

²⁷ Ez li ber Xudan dikime deynê stûyê we, ku hûn vê neʼmê ber hʼemû xûşk-bira bixûnin.

²⁸ Kʼerema Xudanê me Îsa Mesîh werʼa be.