Romayî 12 - Peymana Nû (Încîl)

Qurbanêd saxe durufkirî

¹ Awa ez hîvî ji we dikim xûşk-birano, bona wê dilşewatîya Xwedê, qalibê xwe dîyarî Xwedê kin, çawa qurbaneke saxe durufkirî, li Wî qebûl, ya ku hʼebandina weye rʼuhʼanî ye.

² Û nekʼevine kirasê bendê vê dinyayê, lê bi nûbûyîna hʼişê xwe werine guhastinê, wekî bizanibin çi ye qirara Xwedê, ku qencî, xweşî û kʼamilî ye.

³ Ez bi wê kʼerema ku Xwedê da min, we her kesîrʼa dibêjim: Çiqas ji we dikʼeve, ji wê zêdetir nefikirin, lê ser xwe bin, bira her kes weke wê bawerîya ku Xwedê pʼarevekir, bifikire.

⁴ Çawa qalibê meda gelek endem hene û hʼemû endem kirekî nakin,

⁵ usa jî em gelek in, lê yektîya Mesîhda em bedenek in û her kes ji me endemêd hev in.

⁶ Awa anegorî wê kʼerema merʼa hatîye dayînê, pʼêşkʼêşêd xweye cûrʼe-cûrʼe bidine xebatê. Heger pʼêşkʼêşa pʼêxembertîyê ye, bira weke wê çapa bawerîyê bidine xebatê,

⁷ heger xizmetkʼarî ye, bira nava xizmetkʼarîyêda bin, heger hînkirin e, bira pey hînkirinê bin,

⁸ yê dil dide mêriv, bira li pey wê yekê be, ewê pʼarevedike, bira bi merʼdanî bike, ewê serwêr e, bira xîret be, ewê qencîyê dike, bira bi eşq û şa bike.

⁹ Hʼizkirina we hʼilekʼarî nîbe, ji xirabîyê zivêr bin, xwe li qencîyê bigirin.

¹⁰ Hʼizkirinêda çawa xûşk-bira ser hev şewat bin, qedirkirinêda ji hevdu derbaztir bin,

¹¹ xîretêda xwerʼanedîtî nîbin, rʼuhʼê xweda alav din, xizmetkʼarîya Xudan bikin,

¹² bi gumanê şa bin, tengasîyada sebir kin, her gav dua bikin,

¹³ destê xwe dirêjî cimeʼta Xwedêye destteng kin, pey mêvanhʼizîyê bin.

¹⁴ Yê we dizêrînin hûn dua wan bikin, belê dua bikin û nifirʼa li wan nekin.

¹⁵ Tʼevî yêd şa dibin şa bin û tʼevî yêd digirîn bigirîn.

¹⁶ Fikira we her kesî hindava hevda yek be, kʼubar-babax nîbin, lê tʼevî pʼerîşana nimiz bin, xwe dewsa zana daneynin.

¹⁷ Ji ber xirabîyêva xirabîyê li tʼu kesî nekin. Çi li ber çʼeʼvê hʼemû meriva qenc e, wê bikin.

¹⁸ Çiqas ji dest we tê, tʼevî hʼemû meriva eʼdilayîyêda bin.

¹⁹ Hʼeyfê hilnedin, delalno, lê cî bidine hêrsa Xwedê, çimkî nivîsar e: «Hʼeyfhildan destê Min e, Ezê hʼeyfê hilînim, Xudan dibêje».

²⁰ Lê belê ev jî heye: «Heger dijminê te birʼçî ye, nên bidê û heger tʼî ye, avê bidê, çimkî tu bi vê yekê pirîskê êgir ser serê wî tʼop dikî».

²¹ Nehêle xirabî ser te kʼeve, lê bi qencîyê tu ser xirabîyê kʼeve.