Peyxam 10 - Peymana Nû (Încîl)

Milyakʼet û kʼitêba biçʼûke gulomatkkirî

¹ Hingê min milyakʼetekî dinêyî zor dît ku ji eʼzmên dihate xwarê. Eʼwr lê wergirtî bû û kʼeskesor li sêrî bû, rʼûyê wî mîna rʼoyê bû, nigêd wî jî mîna stûnêd êgir bûn.

² Destê wîda kʼitêbeke biçʼûke vekirî hebû, nigê xweyî rʼastê danî ser beʼrê, nigê xweyî çʼepê jî danî ser bejê

³ û bi dengê bilind mîna mirʼînîya şêr kire qarʼîn. Çaxê ku wî kire qarʼîn, her hʼeft gurʼînîyêd eʼwra pê dengêd xwe xeber dan.

⁴ Gava wan her hʼeft gurʼînîyêd eʼwra xeber dan, min kir ku binivîsim, lê ji eʼzmên dengek hat û got: «Ew tiştêd ku her hʼeft gurʼînîyêd eʼwra gotin, wan eʼyan neke, nenivîse».

⁵ Hingê ew milyakʼetê ku min dîtibû, wekî wî nigek danîbû ser beʼrê û yek jî ser bejê, destê xweyî rʼastê berbi eʼzmên bilind kir

⁶ û pê Ewî sond xwar ku hʼeta-hʼetayê Sax e, awa gotî pê Wî Yê ku eʼzman, hʼemûyêd wêda, eʼrd, hʼemûyêd wêda û beʼr, hʼemûyêd wêda eʼfirandine û got: «Îdî wextê derengî nekʼeve.

⁷ Lê gava milyakʼetê hʼefta deng li borʼîyê xe, hingê wê ew surʼa tʼivdîra Xwedê bê sêrî, ya ku Wî eʼlamî xulamêd Xwe pʼêxembera kiribû».

⁸ Pey vê yekêrʼa wî dengê ku min ji eʼzmên bihîstibû, dîsa tʼevî min xeber da û got: «Herʼe, wê kʼitêba vekirî ji destê wî milyakʼetî hilde, yê ku li ser beʼrê û bejê sekinî ye».

⁹ Ez jî çûme cem wî milyakʼetî û min jêrʼa got: «Kʼa wê kʼitêba biçʼûk bide min». Ewî minrʼa got: «Han vê hilde û bixwe. Evê nav-dilê teda teʼl be, lê devê teda wê mîna hingiv şîrin be».

¹⁰ Hingê min kʼitêba biçʼûk ji destê milyakʼet hilda û xwar. Devê minda mîna hingiv şîrin bû, lê çaxê min ew xwar, min nav-dilê xweda teʼlayî kʼifş kir.

¹¹ Wî çaxî minrʼa hate gotinê: «Gerekê tu dîsa li ser gelek cimeʼta, mileta, zimana û pʼadşa pʼêxembertîyê bikî».