Lûqa 21 - Peymana Nû (Încîl)

Dîyarîya jinebîya belengaz

¹ Îsa dîna Xwe dayê û dît ku dewletîya hʼedîyêd xwe davîtine pʼeredanga pʼaristgehê.

² Ewî belengazeke jinebî jî dît ku du pol avîte wir

³ û Îsa got: «Ez rʼast werʼa dibêjim, ku evê jinebîya belengaz ji van hʼemûya zeʼftir avîtê.

⁴ Çimkî wan hʼemûya ji bermayîyêd xwe avîtine nava hʼedîya, lê evê vê belengazîya xweda hʼemû tiştê ku wê pê eʼbûrê xwe bikira avîtê».

Îsa pêşda derheqa wêranbûna pʼaristgehêda dibêje

⁵ Û çaxê hineka bona pʼaristgehê digotin, ku bi kevirê bedew û pʼêşkʼêşa hatîye xemilandinê, Ewî got:

⁶ «Van hʼemû tiştêd ku hûn dibînin, rʼojê bên kevirê li ser kevir nemîne, hʼemûyê jî wêran bin!»

Tengasî û zêrandin

⁷ Û ji Wî pirsîn gotinê: «Dersdar, ev tişt wê kʼengê biqewimin? Û çi nîşanê bibe, gava ev yek biqewimin?»

⁸ Ewî got: «Haş ji xwe hebin, ku hûn neyêne xapandinê, çimkî gelek wê pê navê Min bên û bêjin: ‹Ez im Mesîh› û: ‹Ew wext nêzîk e›, pey wan neçin.

⁹ Gava hûn bona şerʼ û deʼwa bibihên, netirsin, çimkî gerekê pêşîyê ev tişt biqewimin, lê axirîya dinê ne hingê ye».

¹⁰ Hingê wanrʼa got: «Miletê rʼabe li ser milet, pʼadşatî li ser pʼadşatîya,

¹¹ cî-cîya eʼrdhʼejêd mezin, xelayî-celayê û mîna nexweşîya hʼal wê bibin, li eʼzmên jî tiştêd xof û tirs û nîşanêd mezin wê biqewimin.

¹² Lê berî van hʼemû tişta, wê dest bavêjine we, we bizêrînin, bibine ber dîwana kʼinîşta û bikine kela. Bona navê Min wê we bibine ber pʼadşa û welîya.

¹³ Evê werʼa bibe meʼnî, ku hûn bona Min şeʼdetîyê bidin.

¹⁴ Û awa vê yekê bikine bîra xwe, ku pêşda xem nekin hûnê çi caba xwe bidin.

¹⁵ Çimkî Ezê zar-ziman û serwaxtîyê bidime we, ku dijminêd weyê nikaribin li ber we xeber din yan bisekinin.

¹⁶ Dê û bavêd we, bira-pismam û dostêd we wê we bidine girtinê û ji we hineka jî wê bikujin.

¹⁷ Bona navê Min hûnê ber çʼeʼvê hʼemûya rʼeş bin.

¹⁸ Lê tʼu mûkê ji serê we kêm nebe.

¹⁹ Bi sebira xwe hûnê rʼuhʼê xwe xilaz kin.

Îsa derheqa wêranbûna Orşelîmêda xeber dide

²⁰ Lê gava hûn bibînin ku ordîya dora Orşelîmê girtîye, hingê bizanibin ku wêranbûna wê nêzîk e.

²¹ Hingê ewêd ku Cihûstanêda ne, bira birʼevine çʼîya û ewêd ku Orşelîmêda ne, bira derên, ewêd kʼewşênda ne, bira nekʼevine bajêr.

²² Çimkî ew rʼoj, rʼojêd hʼeyfhildanê ne, wekî her çi ku hatîye nivîsarê bê sêrî.

²³ Lê wey li hʼemla û destdergûşa wan rʼojada, çimkî tengasîke mezin wê bê serê dinê û xezeb evê cimeʼtêrʼa.

²⁴ Ewê bi devê şûr bikʼevin û nav hʼemû miletada hêsîr bêne birinê. Orşelîmê jî ber pʼîyêd miletêd pʼûtpʼarist herʼe, hʼeta ku wextê wan mileta xilaz be.

Hatina Kurʼê Mêriv

²⁵ Û ser rʼoyê, hîvê û steyrka nîşanê bibin. Li ser dinê jî miletê ji dest dengê xuşînîya pêlêd beʼrê bibizdin û xwe unda kin.

²⁶ Dilê meriva jî ji tirsa wê bisekine, bona ew tiştêd ku wê bêne serê tʼemamîya dinê, çimkî tʼopêd eʼzmana wê ji rʼîyêd xwe derên.

²⁷ Û hingê wê bibînin ku ‹Kurʼê Mêriv eʼwrava bi qewat û rʼûmeta mezin tê›.

²⁸ Gava ev tişt destpêbibin, hûn rʼabin serê xwe bilind kin, çimkî azabûna we îdî nêzîk e».

Dersa dara hêjîrê

²⁹ Û meselek wanrʼa got: «Hûn dîna xwe bidine dara hêjîrê û hʼemû dara.

³⁰ Gava dibişkivin, hûn bi wê yekê zanin ku havîn nêzîk e.

³¹ Usa jî gava hûn bibînin ku ev yek diqewimin, bizanibin ku Pʼadşatîya Xwedê nêzîk e.

³² Ez rʼast werʼa dibêjim, ku eva nisila derbaz nabe, hʼeta ku ev hʼemû tişt neqewimin.

³³ Eʼrd û eʼzmanê derbaz bin, lê gotinêd Min tʼu car derbaz nabin.

Rʼanezên

³⁴ Miqatî xwe bin, nebe ku dilê we pʼirʼxurîyê, serxweşîyê û xemêd vê dinyayêva girêdayî be, nişkêva ew Rʼoj ser weda bê.

³⁵ Çimkî ew rʼojê mîna tʼelê bê serê hʼemû merivêd li ser dinê.

³⁶ Hʼişyar bimînin û her gav dua bikin, wekî hûn bikaribin ji wan hʼemû tiştêd ku wê biqewimin birʼevin-xilaz bin û li ber Kurʼê Mêriv rʼûspî bisekinin».

³⁷ Îsa rʼojê pʼaristgehêda hîn dikir, lê şevê diçû serê wî çʼîyayî dima, ku jêrʼa digotin çʼîyayê Zeytʼûnê.

³⁸ Û tʼemamîya cimeʼtê sibehê zû diçû pʼaristgehê cem Wî, ku xeberêd Wî bibihên.