Lûqa 13 - Peymana Nû (Încîl)

Ji gunekirinê vegerʼin, ku unda nebin

¹ Wî çaxî hinek hatin bona wan celîlîya Îsarʼa gotin, xûna kʼîjana Pîlato tʼevî xûna qurbanêd wan kiribû.

² Îsa li wan vegerʼand û got: «We tʼirê ew celîlîyêd ku ev yek hate serê wan, ji hʼemû celîlîyêd mayîn gunekʼartir bûn?

³ Ez werʼa dibêjim, na! Lê belê heger hûn ji gunekirinê venegerʼin, hûn hʼemûyê jî rʼoja wanda herʼin.

⁴ Yan jî ew hʼîjdeh merivêd ku kela Sîlwamê ser wanda kʼet mirin, we tʼirê ewana ji hʼemû binelîyêd Orşelîmê gunekʼartir bûn?

⁵ Na! Ez werʼa dibêjim, heger hûn ji gunekirinê venegerʼin, hûn hʼemûyê jî rʼoja wanda herʼin».

Mesela dara hêjîrêye bê ber

⁶ Ewî eva mesela jî got: «Merivek hebû, nava rʼezê tirîyê wîda dareke hêjîrêye nikandî hebû. Rʼojekê ew hat, ku ser wê ber bigerʼe, lê nedît.

⁷ Wî çaxî rʼezvanrʼa got: ‹Eva muxdarê sê sala ye ez têm, berê vê dara hêjîrê digerʼim, lê nabînim. Evê bibirʼe! Badîhewa çima cî girtîye?›

⁸ Rʼezvan lê vegerʼand û got: ‹Axa, îsal jî wê sebir ke. Ezê dora wê vedim û pʼeyn bikimê.

⁹ Heger saleke din ber bide, qenc e, lê heger nede, paşê bibirʼe›».

Rʼoja şemîyê qenckirina kʼulfeta qoncikî

¹⁰ Rʼojeke şemîyê Îsa kʼinîştekêda hîn dikir.

¹¹ Li wir kʼulfeteke qoncikî hebû, ku hʼîjdeh salêd wê bû, rʼuhʼê nexweşîyê pêrʼa bû. Ewê qet nikaribû xwe rʼast kira.

¹² Gava Îsa ew dît, gazî wê kir û gotê: «Eʼvdê! Tu ji nexweşîya xwe aza yî!»

¹³ Û Ewî destêd Xwe danîn ser wê, ew pêrʼa-pêrʼa rʼast bû û şikirî dida Xwedê.

¹⁴ Lê serwêrê kʼinîştê hêrs kʼet, ku Îsa rʼoja şemîyê nexweş qenc kir û eʼlaletêrʼa got: «Şeş rʼoj bona şixulkirinê hene, hûn nava wan rʼojada dikarin bên qenc bin, ne ku rʼoja şemîyê».

¹⁵ Xudan lê vegerʼand û gotê: «Durʼûno! Ji we kʼîjan rʼoja şemîyê gayê xwe yan kʼera xwe ji afirʼ venake û nabe ser avê?

¹⁶ Ne eva jî qîza Birahîm e, ku eva muxdarê hʼîjdeh salêd wê bûn, mîrêcin ew girêdabû. Ne lazim bû ku ew rʼoja şemîyê ji wê qeydê vebûya?»

¹⁷ Û gava ev yek got, hʼemûyêd ku miqabilî Wî bûn şermî man. Û tʼemamîya eʼlaletê bona wan kʼeremetêd Wîye rʼûmetî ku Wî dikirin şa dibû.

Du meselêd li ser Pʼadşatîya Xwedê

¹⁸ Peyrʼa Îsa got: «Pʼadşatîya Xwedê mîna çi ye? Û Ez wê himberî çi kim?

¹⁹ Ew mîna hʼebeke tʼoximê xerdalê ye, ku merivekî hilda baxçê xweda çand. Û gava ew mezin bû, bû dar, teyredêd eʼzmên hêlînêd xwe ser çʼiqilêd wê çêkirin».

²⁰ Ewî dîsa got: «Ez Pʼadşatîya Xwedê himberî çi kim?

²¹ Ew mîna hevîrtirʼşk e, ku kʼulfetekê hilda nava sê kod arda stira, hʼeta ku hʼemû hilat».

Derê teng

²² Îsa gund û bajararʼa derbaz dibû, hîn dikir û berbi Orşelîmê diçû.

²³ Yekî Wîrʼa got: «Xudan, gelo hindik in, ewêd ku wê xilaz bin?» Ewî wanrʼa got:

²⁴ «Biceʼdînin, ku hûn derê tengrʼa bikʼevine hindurʼ, çimkî Ez werʼa dibêjim, gelekê bixwazin bikʼevinê û wê nikaribin.

²⁵ Û peyrʼa, ku xweyê malê rʼabe derî bigire, hingê hûnê derva bimînin û derî xin bêjin: ‹Em xulam, derî li me veke›. Ewê li we vegerʼîne û bêje: ‹Ez nizanim hûn ji kʼu ne›.

²⁶ Hingê hûnê bêjin: ‹Me tʼevî Te xwar, vexwar û Te kʼûçêd meda hîn dikir›.

²⁷ Lê Ewê bêje: ‹Ez werʼa dibêjim, Ez nizanim ku hûn ji kʼu ne. Ji Min dûr kʼevin, hûn hʼemûyêd ku neheqîyê dikin!›

²⁸ Li wir wê bibe girî û çʼirke-çʼirka dirana, gava hûn Birahîm, Îshaq, Aqûb û hʼemû pʼêxembera Pʼadşatîya Xwedêda bibînin, xwe jî derva avîtî.

²⁹ Û wê ji rʼohilat-rʼoavayê û bakur-başûrê bên, Pʼadşatîya Xwedêda ser sifrê rʼûnên.

³⁰ Awa bizanibin ku hinekêd paş wê bibine pêş û hinekêd pêş wê bibine paş».

Îsa li ser Orşelîmê dilovîne

³¹ Wê demê çend fêrisî hatin û Wîrʼa gotin: «Rʼabe ji vir herʼe, çimkî Hêrodes dixwaze Te bikuje».

³² Û Ewî wanrʼa got: «Herʼin wî rʼûvîyîrʼa bêjin: ‹Va Ez îro, sibê cina derdixim, nexweşa qenc dikim û rʼoja sisîya Ezê bigihîjime meremê Xwe›.

³³ Lê gerekê Ez îro, sibê, dusibe rʼîya Xweda herʼim, çimkî nabe ku pʼêxemberek ji Orşelîmê der unda be.

³⁴ Orşelîm! Orşelîm! Tu ku pʼêxembera dikujî û şandîyêd cem xwe didî ber kevira. Çend cara Min xwest ku zarʼêd te usa bicivanda, çawa mirîşk cûcûkêd xwe bin baskêd xweda dicivîne, lê te nexwest!

³⁵ Va mala te wê xirabe bimîne. Ez werʼa dibêjim, îdî hûn Min tʼu car nabînin, hʼeta ku hûn bêjin: ‹Bimbarek e Ewê ku bi navê Xudan tê›».