Korîntî II, 6 - Peymana Nû (Încîl)

¹ Em jî çawa heval-xebatêd Xwedê îdî hîvî ji we dikin, yêd ku kʼerema Xwedê standine, nehêlin ku ew kʼerem bêfeyde be.

² Çimkî Xwedê dibêje: «Dema rʼeʼm-kʼeremê Min dengê te bihîst û rʼoja xilazbûnêda hatime hewara te». Va niha ye dema rʼeʼm-kʼeremê! Va niha ye rʼoja xilazbûnê!

³ Em dikin tʼu tiştîda nebine bayîsê kʼetina tʼu kesî, wekî qulixê me neyê lomekʼarkirinê.

⁴ Lê her tiştîda em xwe bi sebira xweye mezin didine kʼifşê, çawa qulixkʼarêd Xwedê: Teʼlî-tengîyada, hêsîrî-belengazîya û derd-kulada,

⁵ lêdanada, kelada û her alîyava hʼicûmkirî, kʼesirî, bêxew, birʼçî,

⁶ bi nixta hʼelal, bi zanebûnê, bi dilê fire, bi şîrinayîyê, bi Rʼuhʼê Pîroz û bi hʼizkirina bêhʼilekʼarî,

⁷ bi gotina rʼastîyê û qewata Xwedê. Em bi destê çʼep û rʼastê jî rʼasthʼesabûnêva sîlihʼkirî ne,

⁸ hurmetê û bêhurmetîyêda, qedir û rʼezîlîyêda. Me hʼesab dikin çawa yêd derewîn, lê em ser rʼastîyê ne,

⁹ me hʼesab dikin çawa yêd nenas, lê yêd bi nav û deng in, çawa yêd mirî, lê va ye eme sax in, çawa ceza standî, lê nekuştî ne,

¹⁰ em çawa yêd zelûlîyêda ne, lê em her tʼim şa ne, çawa yêd belengaz, lê em geleka dewletî dikin, çawa kʼifş dibe yanê tiştekî me tʼune, lê her tiştêd me hene.

¹¹ Me vekirî werʼa xeber daye gelî korintʼîya, dilê me jî hindava weda fire ye.

¹² Hûn ji alîyê meda bînteng nabin, lê hûn bîna xwe li xwe teng dikin.

¹³ Ez çawa tʼevî zarʼêd xwe xeber didim, hûn jî weke wê yekê li me vegerʼînin û dilê xwe merʼa vekin.

Pʼûtpʼaristîyêva girêdayî nîbin

¹⁴ Tʼevî nebawera nekʼevine binê nîrekî. Çi kʼarê heqîyê tʼevî neheqîyê heye? Yan çi heleqetîya rʼonayê tʼevî teʼrîyê?

¹⁵ Û çi tʼifaqîya Mesîh tʼevî cin heye? Yan çi pʼar nava bawermenda û nebawerada heye?

¹⁶ Yan jî çi hevaltîya pʼaristgeha Xwedê tʼevî ya pʼûta heye? Çimkî em pʼaristgeha Xwedêyê sax in! Çawa Xwedê got: «Ezê nava wanda bimînim, nava wanda bimeşim, Xwedêyê wan bim û ewê jî cimeʼta Min bin».

¹⁷ Bona vê yekê «Xudan dibêje: De rʼabin ji nava wan derên, cude bin. Li tiştêd hʼeram nekʼevin, û Ezê we qebûl kim,

¹⁸ Bavê we bim, hûnê jî kurʼ û qîzêd Min bin, Xudanê Hʼemû Zorayîyê dibêje».