Korîntî II, 3 - Peymana Nû (Încîl)

Qulixkʼarêd Peymana Nû

¹ Gelo em dîsa vedigerʼin, xwexa pesinê xwe bidin? Yan mîna hineka merʼa lazim e em şeʼdeneʼma ser weda bişînin, yan ji we bistînin?

² Ne hûn in şeʼdeneʼmêd me dilê meda nivîsar, alîyê her merivîda naskirî û xwendî?

³ Kʼifş e ku hûn neʼma Mesîh in bi xizmetkʼarîya me nivîsar, ne ku bi hʼubirê, lê bi Rʼuhʼê Xwedêyê sax, ne ku ser selêd kevirî, lê ser tʼextêd dilê xûn û goşt.

⁴ Em vê yekê Xwedêda guman in bi saya Mesîh.

⁵ Ne ku em ji xwe hʼesab dikin ku em layîqî vê kirinê ne, lê karîna me ji Xwedê ye.

⁶ Ewî ew karîn da me, wekî em bibine qulixkʼarêd peymana nû, ne ku yê nivîsarê, lê yê Rʼuhʼ, çimkî qanûna nivîsar dikuje, lê Rʼuhʼ dide jîyînê.

⁷ Awa heger ew qulixê ku ser kevira bi hʼerfa kʼolayî bû û axirîyê mirinê pêşda tîne haqas xweyîrʼûmet bû, wekî zarʼêd Îsraêl nikaribûn rʼûyê Mûsa binihêrʼîyana, ji dest wê şewqa rʼûyê wîyî ku dîsa wê derbaz bûya biçûya,

⁸ lê belê qulixê Rʼuhʼ wê hê çiqas xweyîrʼûmet be?

⁹ Çimkî heger ew qulixê ku axirîyê dîwan ser merivada danî, haqas xweyîrʼûmet bû, hê çiqas zêde wê xweyîrʼûmet be ew qulixê ku meriv pê bêsûc dibin.

¹⁰ Belê yê ku xweyîrʼûmet bû, ew bêrʼûmet derkʼet ji ber wê rʼûmeta ku ser wêrʼa bû.

¹¹ Heger qulixê ku wê derbaz bibûya biçûya xweyîrʼûmet bû, îdî yê ku wê bimîne, hê çiqas xweyîrʼûmet e!

¹² Awa em xweyê vê gumanê ne, lema xeberdana xweda mêrkʼîmî ne.

¹³ Em ne mîna Mûsa ne, çawa wî xêlî avîtibû ser rʼûyê xwe, wekî zarʼêd Îsraêl hʼeta xilazîyê ew rʼûmeta wê derbaz bûya nedîtana.

¹⁴ Belê ew sewdayê xweda feʼmekorî bûn û hʼeta îro jî gava peymana kevin dixûnin, xût ew xêlî ser feʼmê wan dimîne. Ew hingê tê hildanê, gava ew dibine pʼara Mesîh.

¹⁵ Belê hʼeta îro jî, gava Qanûna Mûsa dixûnin, xêlî ser feʼmê wan dimîne,

¹⁶ lê gava yek li Xudan vegerʼe, hingê «ew xêlî tê hildanê».

¹⁷ Û ew Xudan Rʼuhʼ e û Rʼuhʼê Xudan li kʼu derê be, li wê derê jî azayî heye.

¹⁸ Awa em hʼemû jî rʼûkî bêxêlîkirî mîna neynikê şewqa rʼûmeta Xudan vedigerʼînin û em bi derecêd rʼûmet bi rʼûmetê têne guhastinê, dibine xût ew sûretê Wî, ev yek bi alîkʼarîya Xudan e, ku xwexa Rʼuhʼ e.