Korîntî I, 8 - Peymana Nû (Încîl)

Pirsa xwarina qurbanêd pʼûtpʼaristîyê

¹ Lê niha çi ku ji pirsa qurbanêd pʼûta dikʼeve: Feʼmdarî ye ku zanebûna me her kesî jî heye. Zanebûn pʼişika mêriv diwerimîne, lê hʼizkirin ava dike.

² Heger yek tʼexmîn dike, ku ew tiştekî zane, ew rʼast hê tiştekî usa nizane çawa ku lazim e bizanibe.

³ Lê heger yek Xwedê hʼiz dike, ew ji alîyê Wîva naskirî ye.

⁴ Awa derheqa wan qurbanêd pʼûtaye ku merî dixwin: Em zanin ku pʼût heyîna xweva pʼûçʼ in û Xwedêkî din tʼune, pêştirî yekî.

⁵ Heger bi navêd din jî xwedê hebin, yan li eʼrdê yan li eʼzmên, çawa bêhʼesab xwedê û bêhʼesab xudan hene jî,

⁶ lê bona me tʼenê Xwedêk heye, Bav, Eʼfirandarê her tiştî, em jî bona Wî hene û tʼenê Xudanek heye, Îsa Mesîh, bi Kʼîjanî her tişt xuliqî ne û bi saya Wî em hene.

⁷ Lê ev zanebûn cem her kesî tʼune. Hʼeta niha hê dilê hineka pey pʼûtpʼaristîyê ye, ku gava wî goştî dixwin, hʼesab dikin çawa qurbanêd pʼûta û xwe dihʼerʼimînin, çimkî îsafa xweye sistda fikara dike.

⁸ Lê belê xwarin me li ber Xwedê nade sekinandinê. Heger em bixwin, tiştekî zêde nakin û heger nexwin, tiştekî jî kêm nakin.

⁹ Lê haş ji xwe hebin, nebe ku ew azaya we bibe kevirek li ber nigê sista.

¹⁰ Em bêjin, heger merivekî ku îsafa xweye sistda fikara dike te bibîne, wekî tu «xweyîzanebûn» î û li sifra pʼaristgeha pʼûtda rʼûniştî yî, ne ew kirê te wê dil bide wî, ku ew jî qurbanêd pʼûtpʼaristîyê bixwe?

¹¹ Û ji dest wê «zanebûna» te, birê teyî sist, bona kʼîjanî Mesîh mir, wê unda be.

¹² Bi vî awayî, gava tu neheqîyê li xûşk-birêd xwe dikî û îsafa wane sist birîndar dikî, li ber Mesîh neheqîyê dikî.

¹³ Awa heger xwarin dibe kevirê li ber pʼîyê birê min, gerekê îdî tʼu car ez goşt nexwim, wekî birê xwe pʼişk nekim.