Korîntî I, 7 - Peymana Nû (Încîl)

Pirsêd hʼal-zewacê

¹ Lê niha derheqa wan pirsêd ku we minrʼa nivîsîn: «Qenc e wekî mêr nêzîkî jinê nebe?»

² Lê bona ku pêşîya her cûrʼe qavîyê bê girtinê, bira mêr bê jin nebe û jin jî bê mêr.

³ Mêr bira deynê jinê bidê, jin jî deynê mêr.

⁴ Jin ne xweya qalibê xwe ye, lê mêr, usa jî mêr ne xweyê qalibê xwe ye, lê jin.

⁵ Ji hevdu na-na nekin, pêştirî wê demê, gava hûn bi hevrʼa bona wextekê tʼifaq qirar dikin wekî xwe bidine duakirinê, lê paşê dîsa li hev vegerʼin, ku mîrêcin we necêrʼibîne ji dest bêtʼawîya we.

⁶ Ez vê yekê dihêlime ser exterîya we, ne ku eʼmir dikim.

⁷ Rʼast e, min dixwest ku hʼemû meriv mîna min bûna, lê her merivekîrʼa dayîneke ji Xwedê heye, yek ha ye, yek jî aha ye.

⁸ Lê yêd bê jin û jinebîyarʼa ez dibêjim: Qenc e ku ew mîna min bimînin.

⁹ Lê heger xwe zeft nakin, bira bizewicin-mêr kin, çimkî qenc e ku ew bizewicin-mêr kin, ne ku xweda bişewitin.

¹⁰ Lê yêd zewicî-mêrkirîrʼa, ne ku ez eʼmir dikim, lê belê Xudan: Bira jin ji mêr neqete,

¹¹ heger biqete jî, bira mêr neke yan jî mêrê xwerʼa li hev bê. Û mêr jî bira jina xwe berʼnede.

¹² Lê yêd mayînrʼa ez dibêjim, ne ku Xudan: Heger jina birakî nebawer be û bixwaze tʼevî wî bimîne, bira wê berʼnede.

¹³ Û jineke ku mêrê wê nebawer be û ew bixwaze tʼevî wê bimîne, bira ji wî neqete.

¹⁴ Çimkî mêrê nebawer bi jina bawermend hʼelal dibe û jina nebawer jî bi mêrê bawermend hʼelal dibe. Heger usa nîbûya, zarʼêd weyê hʼeram bûna, lê niha hʼelal in.

¹⁵ Lê heger nebawer biqete, bira biqete. Xûşk yan bira vê derecêda aza ye. Belê Xwedê gazî we eʼdilayîyê kir.

¹⁶ Tu çi zanî kʼulfetê, belkî tê mêrê xwe xilaz kî? Yan jî tu çi zanî mêro, belkî tê kʼulfeta xwe xilaz kî?

Bawermend gerekê li gora eʼmirê Xwedê bijîn

¹⁷ Wekî din ez dibêjim: Xudan çawa pʼara her kesî da û çawa Xwedê gazî her kesî kir, bira weke wê yekê jî bijî. Ev e tʼemîya ku ez didime hʼemû civîna.

¹⁸ Heger yek sinetkirî bû gava hate gazîkirinê, bira sinetbûna xwe îdî neguhêze. Heger yek nesinetkirî bû gava hate gazîkirinê, bira îdî sinet nebe.

¹⁹ Ne sinetbûn tiştek e û ne jî nesinetbûn, lê serî tʼemîyêd Xwedê qedandin e.

²⁰ Kʼî çi hʼalîda bû gava Xwedê gazî kirê, bira nava wêda jî bimîne.

²¹ Xulam bûyî gava hatî gazîkirinê? Xem neke. Lê heger dikarî aza bî, wê mecalê ji destê xwe neke.

²² Çimkî ew xulamê ku hate gazîkirinê, wekî bibe pʼara Xudan, ew azayê Xudan e, usa jî ewê ku aza bû gava hate gazîkirinê, ew xulamê Mesîh e.

²³ Hûn bi qîmetekî biha hatine kʼirʼînê, nebine xulamêd meriva.

²⁴ Xûşk-birano, kʼî çi hʼalîda hate gazîkirinê, bira nava wêda jî li ber Xwedê bimîne.

Pirsêd bona qîz û xorta

²⁵ Lê niha çi ji qîz û xorta dikʼeve, min derheqa wanda eʼmir ji Xudan nestandîye, lê tʼenê ez fikira xwe dibêjim, çawa yekî ji Xudan rʼeʼm standî ku hindava Wîda amin e.

²⁶ Ez bona tengasîya niha aha rʼê têrʼa dibînim ku meriv çi derecêda ye, bira usa jî bimîne.

²⁷ Jinêva girêdayî yî? Neke ku jê biqetî. Bê jin î? Jinê negerʼe.

²⁸ Lê heger bizewicî, gune nakî û heger qîz mêr ke, gune nake. Lê yêd usa wê rʼastî oxirmêd giran bên, ez dixwazim we ji wê yekê xwey kim.

²⁹ Ez werʼa dibêjim birano: Wext hindik maye. Ji vir şûnda ewê ku jina wî heye bira usa be çawa yê bê jin,

³⁰ ewê ku digirî çawa yê nagirî, ewê ku şa dibe çawa yê şa nabe, ewê ku dikʼirʼe çawa ne xweyê wan tişta be,

³¹ û ewê ku şixulê dinêva mijûl dibe çawa yê pêva mijûl nabe, çimkî ev dinya eʼyan derbaz dibe.

³² Lê ez dixwazim ku hûn ji xema dûr bin. Yê nezewicî şixulêd Xudanva gîro ye, ku çawa bike li Xudan xweş bê.

³³ Lê yê zewicî xemêd dinêva gîro ye, ku çawa bike li jina xwe xweş bê

³⁴ û ser du rʼîya sekinî ye. Jina bêmêr yan qîz şixulêd Xudanva gîro ye. Meremê wê ew e, ku ew rʼuhʼ û qalibê xweda buhurtî-jibare be, lê ya mêrkirî xemêd dinêva gîro ye, ku çawa bike li mêrê xwe xweş bê.

³⁵ Ez van tişta bona kʼara we dibêjim, ne ku bar didime ser milê we, lê dixwazim wekî hûn bi tʼerbet û bi dil û can şixulêd Xudanva gîro bin.

³⁶ Lê heger yek feʼm dike, wekî hindava dergîstîya xweda rʼastîyê nake, temê wî jî xirab bûye ku gerekê bizewice, bira usa bike çawa dixwaze, gune nake, bira hevdu bistînin.

³⁷ Lê ewê ku giranî ser wî tʼune, lê li temê xwe dikare û dilê xweda qirar kirîye ku dergîstîya xwe usa xwey ke çawa berê, ew tiştekî qenc dike.

³⁸ Awa yê dergîstîya xwe distîne, qenc dike, lê yê ku wê bikʼir dihêle, hê qenc dike.

³⁹ Jin ne xweserîxwe ye hʼeta ku mêrê wê sax e, lê heger mêr lê bimire, ew aza ye, tʼevî kʼê bixwaze dikare mêr ke, tʼenê bawermendê Xudan be.

⁴⁰ Lê ewê hê xwezilî be, ku usa bimîne. Ev e fikira min û tʼexmîna min Rʼuhʼê Xwedê nava minda heye.