Korîntî I, 6 - Peymana Nû (Încîl)

Pirsa derheqa deʼw-doza nava bawermendada

¹ Gelo eva kʼarê kirinê ye, gava yek ji we, nava wî û birê wîda deʼw-doz pêşda tê, turuş dike li ber nepʼaka wê yekê dide safîkirinê, ne ku li ber cimeʼta Xwedê?

² Çima hûn nizanin ku cimeʼta Xwedê wê dîwana dinê bike? Û heger bi destê we wê dîwana dinyayê bê kirinê, gelo hûn nikarin van pirsêd sivik jî safî kin?

³ Çima hûn nizanin ku emê dîwana milyakʼeta jî bikin? Îdî kʼu dimîne dîwana pirsêd vê dinyayê nekin?

⁴ Awa heger nava weda pirsêd vê dinêye safîkirinê hebin, hûn çawa dikarin hʼakimtîyê bidine destê yêd usa, ku ji alîyê civînêda ne tʼu tişt in?

⁵ Ez aha dibêjim, ku hûn şerm bikin! Gelo nava weda yekî serwaxt tʼune, ku bikaribe nava birada serederîyê bike?

⁶ Lê bira birêrʼa dikʼeve deʼw-dozê, ew jî li ber nebawera!

⁷ We rʼastî vê yekêda lap daye der, ku hûn hevrʼa dikʼevine dergeh-dîwana. Gelo hê qenc nîne, ku hûn bêne neheqkirinê? Gelo hê qenc nîne, ku hûn bêne şêlandinê?

⁸ Lê hûn neheqîyê dikin û dişêlînin, ew jî xûşk-bira!

⁹ Çima hûn nizanin ku yêd neheq wê Pʼadşatîya Xwedê war nebin? Nexapin! Ne bênamûs, ne pʼûtpʼarist, ne zinêkʼar, ne jinêd hevrʼa dibin rʼobet, ne mêrêd hevrʼa dibin rʼobet,

¹⁰ ne diz, ne timakʼar, ne serxweş, ne buxdanbêj, ne jî tʼalankir Pʼadşatîya Xwedê wê war nebe.

¹¹ Û ji we hinek usa bûn. Lê hûn ji guna hatine şûştinê, hûn hatine buhurtî-jibarekirinê, hûn rʼast hatine hʼesabê bi navê Xudan Îsa Mesîh û bi Rʼuhʼê Xwedêyê me.

Bira bedenêd we Xwedêrʼa xizmetkʼarîyê bike

¹² Dibêjin: «Her tişt minrʼa eʼdet e», belê, lê her tişt ne kʼar e. «Her tişt minrʼa eʼdet e», lê tʼu tişt gerekê hʼukumî ser min neke.

¹³ Dibêjin: «Xwarin bona zik e, zik jî bona xwarinê ye», lê Xwedê her duya jî wê unda ke. Lê beden ne bona qavîyê ye, lê bona xizmetkʼarîya Xudan e û Xudan jî bona bedenê xem dike.

¹⁴ Û Xwedêyê ku Xudan ji mirinê rʼakir, wê me jî ji mirinê rʼake bi qewata Xwe.

¹⁵ Çima hûn nizanin ku bedenêd we endemêd Mesîh in? Ez endemêd Mesîh hildim tʼevî qava kim? Tʼu car!

¹⁶ Yan hûn nizanin yê ku tʼevî qava dibe, tʼevî wê dibe bedenek? Çawa nivîsar dibêje: «Her du wê bibine bedenek».

¹⁷ Lê ewê ku tʼevî Xudan dibe, dibe rʼuhʼek.

¹⁸ Ji qavîyê birʼevin! Hʼemû gunêd mayîne ku meriv dike, ji bedenê der e, lê ewê ku qavîyê dike, miqabilî bedena xwe guna dike.

¹⁹ Çima hûn nizanin ku bedenêd we pʼaristgeha Rʼuhʼê Pîroz in, ku nava weda ye, Kʼîjan we ji Xwedê stand? Hûn ne xweyîyê serê xwe ne.

²⁰ Hûn bi qîmetekî biha hatine kʼirʼînê. Bona vê yekê bikin ku pê bedena we şikirî Xwedêrʼa bê dayînê.