Korîntî I, 16 - Peymana Nû (Încîl)

Bona kʼomektʼopkirinê

¹ Lê niha derheqa kʼomektʼopkirina bona cimeʼta Xwedê, min çawa tʼemî da civînêd Galatyayê, hûn jî usa bikin:

² Her yekşem, destê ji we her kesîva çiqas tê, bira tiştekî destê xwerʼa paş xe, nebe ku gava ez bêm, hingê bê tʼopkirinê.

³ Û gava ez bêm, hûn jî rʼê kʼîjanarʼa dibînin, ezê pê destê wan, bi nivîsar pʼêşkʼêşêd we bişînime Orşelîmê.

⁴ Û heger minrʼa jî bikʼeve, ku ez herʼim, îdî ewê tʼevî min bên.

Tʼivdîrêd Pawlos

⁵ Pey çûyîna qeza Mekedonyayêrʼa, ezê serîkî li we xim, çimkî ezê Mekedonyayêrʼa derbaz bim.

⁶ Dibe ku li cem we bimînim, yan jî zivistana xwe wir derbaz kim û hingê hûn dikarin min verʼêkin, ez kʼuda ku herʼim.

⁷ Çimkî ez niha naxwazim ku we ser rʼîya xwe bibînim herʼim, lê ez guman im ku xêlekê cem we bimînim, heger Xudan hʼiz bike.

⁸ Lê niha ezê hʼeta Rʼoja Pêncîye hʼesab, li Efesê bimînim,

⁹ çimkî dergehekî xêrêyî mezin li ber min vebûye û peykʼetîyêd min gelek in.

¹⁰ Heger Tîmotʼêyo bê cem we, usa bikin ku ew ji we venekʼişe, çimkî ew jî bona Xudan dixebite, çawa ez.

¹¹ Usa bira tu kes wî bêqedir neke. Wî bi xêr-silamet verʼêkin, wekî bê cem min, çimkî ez hîvîya wî û birayêd tʼevî wî me.

¹² Lê derheqa Apoloyê birada, min gelekî lava jê kir, ku tʼevî bira ser weda bihata, lê nêta wî hatinê niha qet tʼunebû, lê wê bê, gava mecal bikʼevê.

Gotinêd axirîyê

¹³ Hʼişyar bimînin, bawerîyêda hʼîmgirtî bin, eʼgît bin, bişidin,

¹⁴ bira her kirinêd we bi hʼizkirinê bin.

¹⁵ Niha hûn zanin ku Stêfanas mala xweva bawermendêd qeza Axayayêye pêşin e û wan xwe dane xizmetkʼarîya cimeʼta Xwedê. Îdî ez hîvî ji we dikim xûşk-birano,

¹⁶ ku hûn gurʼa yêd usada bin, usa jî gurʼa wan hʼemûyada, yêd ku tʼevî şixulê vê xebatê dibin.

¹⁷ Ez bona hatina Stêfanas, Fortûnato û Axayîko şa me, barê dilê minda wana dewsa we girt,

¹⁸ bi wê yekê dilê min û we jî rʼihʼet kirin. Qedirê yêd usa bigirin.

¹⁹ Civînêd qeza Asyayêda li we silav dikin. Akîla û Priskîla tʼevî civîna mala xweda gelekî yektîya Xudanda li we silav dikin.

²⁰ Hʼemû xûşk-birayêd vir li we silav dikin. Bi rʼamûsana şîrê hʼelal li hevdu silav kin.

²¹ Ev silav, bi destnivîsara min Pawlos e.

²² Heger yek Xudan hʼiz nake, bira nifirʼ li wî be. «Maranatʼa».

²³ Kʼerema Xudan Îsa li we be.

²⁴ Ez we pʼara Mesîh Îsa kʼetîya hʼiz dikim.