Korîntî I, 12 - Peymana Nû (Încîl)

Pʼêşkʼêşêd Rʼuhʼê Pîroz

¹ Lê niha çi ji pʼêşkʼêşêd Rʼuhʼanî dikʼeve xûşk-birano, ez naxwazim ku hûn nezan bin.

² Weva eʼyan e gava hûn pʼûtpʼarist bûn, hûn usa pey pʼûtêd kerʼe lal kʼetibûn, her alîyava kʼetibûne bin qolêd wan.

³ Bona vê yekê jî ez werʼa dibêjim, tʼu kes tʼune ku bi rʼêberîya Rʼuhʼê Xwedê xeber de û bêje: «Bira nifirʼ li Îsa be». Û kesek jî nikare bêje: «Îsa Xudan e», heger ne bi rʼêberîya Rʼuhʼê Pîroz.

⁴ Awa cûrʼe-cûrʼe pʼêşkʼêşêd Rʼuhʼanî hene, lê xût dayîna wî Rʼuhʼî ne,

⁵ cûrʼe-cûrʼe qulix jî hene, lê hema wî Xudanîrʼa qulix dikin,

⁶ usa jî cûrʼe-cûrʼe karîn hene, lê xût ew Xwedê ye, ku van dayînada karînê dide her kesî.

⁷ Lê her kesîrʼa Rʼuhʼ bona kʼara hʼemûya xuya dibe.

⁸ Yekîrʼa ji Rʼuhʼ xebera serwaxtîyê tê dayînê, yekîrʼa xebera zanebûnê xût ji wî Rʼuhʼî,

⁹ yekî dinrʼa bawerî xût ji wî Rʼuhʼî, yekî dinrʼa pʼêşkʼêşêd nexweşqenckirinê xût ji wî Rʼuhʼî,

¹⁰ yekî dinrʼa qewat, wekî kʼeremeta bike, yekî dinrʼa pʼêxembertî, yekî dinrʼa feʼmîna ku rʼuhʼa ji hev derxe, yekî dinrʼa zimanêd xerîb, yekîrʼa jî şirovekirina wan zimana.

¹¹ Ev hʼemû jî xût Xwexa ew Rʼuhʼ dike û her kesîrʼa başqe-başqe pʼarevedike, çawa ku dixwaze.

Beden yek e, endem gelek in

¹² Çawa beden yek e û gelek endemêd wê hene, lê dîsa ew hʼemû hevrʼa bedenek in, usa jî Mesîh e.

¹³ Rʼast usa jî yektîya Rʼuhʼekîda em hʼemû hatine nixumandinê, ku bibine bedenek, hin cihû hin necihû, hin xulam hin aza û em hʼemû jî ji wî Rʼuhʼî dane vexwarinê.

¹⁴ Belê beden ne tʼenê endemek e, lê ji geleka ye.

¹⁵ Heger nig bêje: «Ez ne ji bedenê me, çimkî ez ne dest im», gelo eva meʼnî ye, ku ew ne ji bedenê ye?

¹⁶ Û heger guh bêje: «Ez ne ji bedenê me, çimkî ez ne çʼeʼv im», gelo eva meʼnî ye, ku ew ne ji bedenê ye?

¹⁷ Heger tʼemamîya bedenê çʼeʼv bûya, lê bihîstinê li kʼu bûya? Heger hʼemû beden guh bûya, bînhildanê li ku bûya?

¹⁸ Lê rʼast Xwedê ew endem yeko-yeko bedenekêda cî kirin, çawa Wî xwest.

¹⁹ Heger hʼemû endemek bûna, bedenê li ku bûya?

²⁰ Lê rʼast niha endem gelek in, lê beden yek e.

²¹ Çʼeʼv nikare bêje dest: «Tu kêrî min nayêyî!» Û ne jî serî nigarʼa dikare bêje: «Hûn kêrî min nayên!»

²² Lê serda ew endemêd bedenêye ku sist kʼifş dibin, ew hê ferz in

²³ û ew endemêd bedenêye bêqedir têne hʼesabê, em hê qedirê wan zanin û yêd eʼybe nava wêda, em hê bi tʼerbet dinixêmin,

²⁴ lê endemêd meye bêeʼyb ne hʼewcê wê yekê ne. Lê Xwedê beden hevva kir, ku yê bêqedir hê qedir bistîne,

²⁵ wekî dutîretî nekʼeve nava bedenê, lê hʼemû endem ji hevdurʼa şewat bin.

²⁶ Lema, gava endemek êşê dikʼişîne, hʼemû endem hevrʼa dêşin, lê gava endemek tê pesindayînê, hʼemû endem tʼevî wê şa dibin.

²⁷ Awa hûn bedena Mesîh in û her yek ji we endemekî bedena Wî ye.

²⁸ Û Xwedê pêşîyê hinek civînêda kirine şandî, ya duda pʼêxember, ya sisîya dersdar, paşê yêd kʼeremetkir, peyrʼa yêd xweyîyê pʼêşkʼêşêd nexweşqenckirinê, kʼomekdarîyê, seʼvîtîyê û yêd zimanêd xerîb.

²⁹ Çima hʼemû şandî ne? Çima hʼemû pʼêxember in? Çima hʼemû dersdar in? Çima hʼemû kʼeremeta dikin?

³⁰ Çima hʼemû xweyîyê pʼêşkʼêşêd nexweşqenckirinê ne? Çima hʼemû bi zimanêd xerîb xeber didin? Çima hʼemû zimana şirovedikin?

³¹ De hûn hʼeyra pʼêşkʼêşêd hê mezinda bin. Lê ezê rʼêke here qenc jî nîşanî we kim.