Kolosî 4 - Peymana Nû (Încîl)

¹ Xweyîno, xulamêd xwerʼa heqîyê û rʼastîyê bikin. Bizanibin ku Xweyê we jî li eʼzmên heye.

Xîreta duakirinê û serwaxtîya hindava nebawerada

² Her gav xwe bidine dua, duakirinêda hʼişyar bimînin, şikirîya xwe li Xwedê bînin.

³ Bona me jî dua bikin, wekî Xwedê derî bona xeberdanê li ber me veke, ku em surʼa Mesîh eʼlam kin, bona kʼîjanê jî ez van qeydada me.

⁴ Dua bikin, ku ez wê usa zelal bidime eʼyankirinê, çawa borcê min ew gerekê bê gotinê.

⁵ Hindava nebawerada serwaxt bin û dest bidine ber wext.

⁶ Bira xeberdana we tʼimê meʼrîfetî û xwêkirî be û bizanibin ku çawa cayîz e caba her kesî bidin.

Silavêd axirîyê

⁷ Bona min Tixîko wê her tiştî werʼa bêje. Ew birakî delal e, berdestîkî amin û heval-xulamekî yektîya Xudanda ye.

⁸ Ez bona wê yekê wî ser weda dişînim, wekî hûn haş ji me hebin û ew bi vê yekê dil bide we.

⁹ Ez wî tʼevî birayê meyî aminî delal Onîsîmo dişînim, ku ew ji we ye jî. Ewana werʼa wê bona her tiştêd ku li vir diqewimin bêjin.

¹⁰ Erîstarxoyê hevalê minî kelêda li we silav dike, usa jî Marqosê pismamê Barnabas. (Bona wî we tʼemî standîye. Gava bê cem we, wî qebûl kin.)

¹¹ Û Îsayê ku jêrʼa Yûsto jî dibêjin li we silav dike. Evana tʼenê ji alîyê bawermendêd cihûyada bona Pʼadşatîya Xwedê tʼevî şixulê min in û bîna min bi wan derkʼetîye.

¹² Silavê Êpafrasê xulamê Mesîh Îsa jî li we hene, ku ew yek ji we ye. Ew her gav bi dil û can bona we dua dike, wekî hûn gihîştî miqerʼm sekinî bin, tʼemamîya eʼmirê Xwedêda bawer bin.

¹³ Ez şeʼde me, ku ew gelekî bona we, usa jî bona yêd Lawdikyayê û Hîrapolîsêda xîret dike.

¹⁴ Lûqayê doxtorê delal li we silav dike, usa jî Dîmas.

¹⁵ Silavê bidine xûşk-birayêd Lawdikyayê, Nîmfasa xûşk û civîna mala wêda.

¹⁶ Gava eva neʼma nava weda bê xwendinê, usa bikin ku civîna Lawdikyayêda jî bê xwendinê û neʼma lawdikîyarʼa şandî jî hûn bixûnin.

¹⁷ Û bêjine Arxîpo: «Bona wî qulixê ku te ji Xudan standîye, miqatî xwe bî, ku bînî sêrî».

¹⁸ Eva silava min Pawlos e, min bi destê xwe nivîsî. Qeydêd min bîr nekin! Kʼerema Xwedê werʼa be.