Kolosî 3 - Peymana Nû (Încîl)

Jîyîna nû û jîyîna kevin

¹ Awa ku hûn tʼevî Mesîh ji mirinê rʼabûne, ku usa ye li tiştêd jorin bigerʼin, wê dera kʼu Mesîh li milê Xwedêyî rʼastê rʼûniştî ye.

² Ser tiştêd jorin bifikirin, ne ku ser tiştêd vê dinyayê.

³ Çimkî hûn mirine û eʼmirê we tʼevî Mesîh cem Xwedê veşartî ye.

⁴ Gava Mesîh, ku eʼmirê we ye xuya be, hûnê jî hingê tʼevî Wî bi rʼûmeta Wî xuya bin.

⁵ Awa xwestinêd dilê xweye vê dinê bikujin: Bênamûsîyê, hʼeramîyê, temê xirab, dilhavijîya xirab û timayê, ku pʼûtpʼaristî ye.

⁶ Ev in sebeb ku xezeba Xwedê wê ser wan merivêd ku ne gurʼa Wîda ne bê.

⁷ We jî wextekê ew tişt dikirin, gava we nava wan kirêd xirabda dijît.

⁸ Lê niha hûn van hʼemûya ji xwe dûr xin: Hêrsê, berzeqîyê, xirabîyê, tiştêd nebûyî û xeberêd necayîz ji devê xwe.

⁹ Hevdurʼa derewa nekin, çimkî we merivê kevin kirêd wîva ji ser xwe êxistîye

¹⁰ û ewî nû li xwe kirîye. Ew merivê nû rʼoj bi rʼoj anegorî sûretê Eʼfirandarê xwe tê nûkirinê, wekî Xwedê tʼam nas ke.

¹¹ Îdî firqî ne nava cihû û necihûyada heye, ne nava sinetkirî û nesinetkirîyada, ne barbar û beyanîyada û ne jî xulam û azayada, lê serî Mesîh e û Mesîh e nava her bawermendîda.

¹² Awa çawa cimeʼta Xwedêye bijartîye pîroz û hʼizkirî, dilşewatîyê, qencîyê, milûktîyê, berbihêrîyê û sebirê li xwe wergirin.

¹³ Li hev sebir kin û li hev bibaxşînin, heger gazinê yekî li hindava yekîda hebe. Çawa Xudan baxşande we, hûn jî usa bibaxşînine hev.

¹⁴ Û ser van hʼemûyada hʼizkirinê li xwe kin, ya ku van hʼemûya bi yektîya tʼam hevva girêdide.

¹⁵ Bira eʼdilayîya Mesîh serwêrtîyê nêt-fikirêd we bike. Bona wê eʼdilayîyê hûn hatine gazîkirinê, ku bibine mîna bedenekê. Û şêkirdar bin.

¹⁶ Bira xebera Mesîh bi dewlemendtîya xweva nava weda bimîne. Bi hʼemû serwaxtîyê li hev hîn kin û şîret kin, zebûra û her cûrʼe stiranêd rʼuhʼanî bi şikirdarî dilê xweda bona Xwedê bistirên.

¹⁷ Û çi jî ku hûn bi xebera yan kira bikin, her tiştî bi saya navê Xudan Îsa bikin, bi destê Wî şikirîyê bidine Bav Xwedê.

Tʼemîyêd bona neferêd malda

¹⁸ Kʼulfetno, gurʼa mêrêd xweda bin, çawa ku li yektîya Xudan dikʼeve.

¹⁹ Mêrno, kʼulfetêd xwe hʼiz bikin, dilê wan neêşînin.

²⁰ Zarʼno, her tiştîda gurʼa dê û bavê xweda bin, çimkî ew yek li Xudan xweş tê.

²¹ Bavno, hêrsa zarʼêd xwe rʼanekin, wekî ew ber xwe nekʼevin.

²² Xulamno, her tiştîda gurʼa xweyîyêd xweye vê dinêda bin, ne ku bi hʼilekʼarîyê xwe bikine dilê meriva ku bêne kʼifşê, lê bi dilê sax û xofa Xudan xulamtîyê bikin.

²³ Û çi jî bikin, bi dil û can bikin, çawa bona Xudan, ne ku bona meriva.

²⁴ Zanibin ku hûnê ji Xudan bêne xelatkirinê, warê jorin bistînin. Çimkî Xudan Mesîhrʼa hûn xulamtîyê dikin.

²⁵ Lê yê neheq wê weke neheqîya xwe bistîne, çimkî li cem Xwedê tʼu firqî tʼune.