یعقوب 3 - Peymana Nû (Încîl)

Ziman

¹ Bira gelek ji we, birayêd min nebine dersdar, çimkî hûn zanin dîwanê ser me dersdara hê giran be.

² Belê em hʼemû jî gelekî şaşîya dikin. Heger yek xeberdanêda tʼu şaşîyê nake, ew yekî kʼamil e, ku dikare tʼemamîya qalibê xwe zeft ke.

³ Em gemê davêjine devê hespê, wekî ew bê zeftê, ku em serwêrtîyê tʼemamîya hespê pêva bikin.

⁴ Em bînin ser gemîyê jî. Ew çiqasî mezin in û ji ber bayê qayîm têne ajotinê, lê bi çerxeke gelekî biçʼûk têne serwêrtîkirinê, dilê gemîvan kʼîyalîda ku bixwaze.

⁵ Usa jî ziman endemekî biçʼûk e, lê tiştêd ji xwe mestir dibêje. Dîna xwe bidine pirîske agir, çi daristaneke mezin dikare bişewitîne!

⁶ Ziman jî agirek e, dinyake zulmkʼar e nava endemêd meda. Ew tʼemamîya qalibê me dihʼerʼimîne, agir dewra jîyîna mêriv dixe û ew xwexa ji alava agirê dojê pêgirtî ye.

⁷ Her cûrʼe rʼeʼwir, teyrede, şûlikî û hʼeywanêd beʼrê têne zeftê û zeftî mêriv dibin,

⁸ lê tʼu qûl-bende zimên nikare. Ew zulmkʼarekî bêar e, jeʼra meʼrava dagirtî ye.

⁹ Em bi wî şikirîyê didine Xudan û Bav, bi wî jî nifirʼa mêriv dikin, yêd ku dilqê Xwedêda hatine xuliqandinê.

¹⁰ Hema ji wî devî jî dua û nifirʼ dertên. Xûşk-birayêd min, ev yek ne cayîz e ku aha be.

¹¹ Gelo ji çʼeʼvkanîkê ava xweş û teʼl dide der?

¹² Gelo dibe xûşk-birayêd min, wekî dara hêjîrê berê zeytʼûnê bide, yan jî kʼola tirîyê hêjîrê? Ne jî ji şorʼayîyê ava xweş dertê?

Serwaxtîya dinyayê û serwaxtîya eʼzmên

¹³ Nava weda kʼî serwaxt û aqil e? Bira ew bi pʼergalîya xweye qenc, kirêd xwe bi milûktîya serwaxtîyê bide kʼifşê.

¹⁴ Lê heger dilê weda hʼevsûdîya xirab û çʼeʼvnebarî hene, kʼubar nebin û rʼastîyê derew dernexin.

¹⁵ Eva «serwaxtîya» ne dayîna jorin e, lê ji dinê ye, ya merivayî ye û ji cina ye.

¹⁶ Çimkî li kʼîderê hʼevsûdî û çʼeʼvnebarî hene, li wir bêtʼerbetî û her kirinêd xirab jî hene.

¹⁷ Lê serwaxtîya jorin, berê pêşin paqij e, paşê eʼdil e, milûk û berbihêr e, bi rʼeʼmê û berêd qencîyêva tʼijî ye, bê tʼagêr û bê hʼilekʼarî ye.

¹⁸ Û berê heqîyê ji alîyê yê ku bi eʼdilayîyê diçîne tê çinînê.