Îbranî 3 - Peymana Nû (Încîl)

Îsa ji Mûsa mestir e

¹ Awa xûşk-birayêd pîroz, hûn ku heval-pʼarêd wê gazîya eʼzmên in, li Îsa binihêrʼin, Wî şandîyî û Serekkʼahînê ku em îqrar dikin.

² Ew hindava Xwedêda amin bû, Yê ku Ew bona vê yekê kʼifş kir, çawa Mûsa jî tʼemamîya mala Wîda amin bû.

³ Belê Îsa haqasî ji Mûsa zêdetir hêjayî rʼûmetê bû, çiqasî qedirê yê ku malê çêdike, ji qedirê malê zêdetir e.

⁴ (Feʼmdarî ye, her malek bi destê yekî tê çêkirinê, lê yê her tişt eʼfirandîye, Xwedê ye.)

⁵ Rʼast e Mûsa tʼemamîya mala Wîda xulamekî amin bû, bona şeʼdetîya wan tiştêd ku Xwedê wê bigota.

⁶ Lê Mesîh çawa kurʼ hindava mala Xwedêda amin bû. Û ew mala Wî em in, heger em wê eʼgîtîyê û gumana ku em pê difirʼin qewîn bigirin.

Bona cimeʼta Xwedê rʼihʼetîk heye

⁷ Bona vê yekê çawa Rʼuhʼê Pîroz dibêje: «Îro heger hûn dengê Wî bibihên,

⁸ mîna kal-bavêd xwe serhʼişk nîbin, çawa ku wana serî hilda, gava berʼîyêda hatine cêrʼibandinê,

⁹ wê dera ku kal-bavêd we bi qelpê xirab Ez cêrʼibandim û tʼemamîya çil salî jî kirêd Min dîtin.

¹⁰ Lema jî hʼîlê Min ji wî nisilî çû û Min got: ‹Dilada tʼimê ew xalifî ne û rʼîya Min nas nekirine›.

¹¹ Awa Min jî ji hêrsa sond xwar got: ‹Tʼu car ewê nekʼevine rʼihʼetîya Min!›»

¹² Haş ji xwe hebin xûşk-birano, nebe ku nava we yekîda dilekî xirab û nebawer hebe, ku pişta xwe bide Xwedêyê sax.

¹³ Lê her rʼoj dil bidine hev, hʼeta ku nivîsarêda bona me «îro» heye, wekî ji we tʼu kes bi guna nexape, nebe serhʼişk.

¹⁴ Çimkî em tʼevî Mesîh bûne xweyîpʼar, heger tʼenê em wê bawerîyê ji serîda hʼeta xilazîyê qewîn bigirin.

¹⁵ Awa çawa jor hate gotinê: «Îro heger hûn dengê Wî bibihên, serhʼişk nîbin, çawa wextê serhildanêda».

¹⁶ Ew kʼî bûn, yêd ku bihîstin û serî hildan? Ew hʼemû nîbûn, yêd ku bi destê Mûsa ji Misirê derkʼetibûn?

¹⁷ Çil salî hʼîlê Xwedê ji kʼê çû? Ne ji wan çû, yêd ku gune kirin, cinyazêd wan berʼîyêda man?

¹⁸ Û Xwedê bona kʼê sond xwar ku nekʼevine rʼihʼetîya Wî, heger ne bona neêlima?

¹⁹ Îdî em dibînin ku evana ji dest nebawerîya xwe nikaribûn bikʼetanayê.