Galatî 6 - Peymana Nû (Încîl)

Barêd hevdu hildin

¹ Xûşk-birano, heger yek neheqîkêda bê girtinê, hûn ku rʼuhʼanî ne, wî bînine ser rʼîya rʼastîyê, lê bi rʼuhʼê milûktîyê. Lê haş ji xwe jî hebin, ku hûn nekʼevine cêrʼibandinê.

² Barêd hevdu hildin û bi vî awayî hûnê qanûna Mesîh biqedînin.

³ Heger yek xwe dewsa tiştekî datîne û xwexa ne tʼu tişt e, ew xwexa xwe dixapîne.

⁴ Bira her kes kirinêd xwe bide ser mêzînê û paşî hingê ji xwe rʼazî be, ne ku xwe himberî hevalê xwe ke.

⁵ Çimkî her kesê xurca xwe hilgire.

⁶ Ewê hînî xebera Xwedê dibe, gerekê her tiştêd qenc tʼevî dersdarê xwe pʼar ke.

⁷ Nexapin, Xwedê nabe pêkʼenî. Çimkî meriv çi diçîne, wê jî diçine.

⁸ Kʼî ku bona binyatʼa xwe diçîne, ewê ji wê binyatʼê mirinê biçine, lê kʼî ku bona Rʼuhʼ biçîne, wê ji Rʼuhʼ jîyîna hʼeta-hʼetayê biçine.

⁹ Ji qencîkirinê jî aciz nebin, çimkî emê wextda biçinin heger em nedine der.

¹⁰ Awa hʼeta ku wext destêd meda ye, hʼemûyarʼa qencîyê bikin, îlahî neferêd mala Xwedêrʼa.

Tʼemî û silavêd axirîyê

¹¹ Dîna xwe bidinê, ez bi çi hʼerfêd gir niha werʼa dinivîsim.

¹² Ewêd ku dixwazin ji dervava xwe bidine kʼifşê, ew pʼêyî ser we dikin, ku hûn bêne sinetkirinê. Lê evana vê yekê dikin, ku tʼenê bona xaçê Mesîh ew neyêne zêrandinê.

¹³ Ewêd xweyîsinet xwexa Qanûnê xwey nakin, lê dixwazin ku hûn bêne sinetkirinê, wekî ew bi nîşana qalibê weyî merivayî bifirʼin.

¹⁴ Lê ji min nakʼeve ku ez bi tiştekî din bifirʼim, pêştirî bi xaçê Xudanê me Îsa Mesîh, bi kʼîjanî dinya bona min xaçbûyî ye, ez jî bona dinyayê.

¹⁵ Belê ne sinetkirin tiştek e, ne jî nesinetkirin, lê serî ew e, ku bibin eʼfirînekî nû.

¹⁶ De bira eʼdilayî û rʼeʼm ser wan hʼemûya be, kʼîjanêd ku anegorî vê yekê dijîn û usa jî ser Îsraêla Xwedê be.

¹⁷ Ji vir şûnda bira tʼu kes zeʼmetê nede min, çimkî min daxa birînêd Îsa hildaye ser bedena xwe.

¹⁸ De bira kʼerema Xudanê me Îsa Mesîh tʼevî rʼuhʼê we be xûşk-birano. Amîn.