Filîpî 4 - Peymana Nû (Încîl)

Tʼemîyêd axirîyê

¹ Niha xûşk-birayêd mine şîrin û hʼeyran, hûn in şabûn û kʼofîya serê min delalno, yektîya Xudanda aha qewîn bimînin.

² Ez hîvî ji Eyodîyayê dikim û hîvî ji Sintîxayê dikim, çawa tʼevî Xudan yekbûyî bira li hev bên.

³ Belê ez hîvî ji te jî dikim hevalbarê minî amin, tu jî alî wan kʼulfeta bike. Evana tʼevî min xebata Mizgînîdayînêda xûdan rʼêtine, usa jî tʼevî Klêmês û heval-xebatêd mine mayîn, ku navêd kʼîjana kʼitêba jîyînêda nivîsar in.

⁴ Tʼimê pê Xudan şa bin, dîsa dibêjim tʼimê şa bin!

⁵ Bira berbihêrîya we hʼemû merivava eʼyan be. Xudan nêzîk e.

⁶ Bona tʼu tiştî xem nekin, lê xwestina we bira bi dua-dirozga, rʼazîbûnêva tʼevayî, Xwedêva eʼyan be.

⁷ Û eʼdilayîya Xwedê ku ji her hʼiş-aqilî derbaztir e, wê dil û fikirêd we yektîya Mesîh Îsada xwey ke.

⁸ Heyneser xûşk-birano, çi ku bi rʼastîyê ye, çi ku bi maqûltîyê ye, çi ku bi heqîyê ye, çi ku bi hʼelalîyê ye, çi ku bi xweşîyê ye, çi ku bi firasetîyê ye û her tiştêd ku eʼsilî û layîqî qencgotinê ne, ser van tişta bifikirin.

⁹ Hûn ji min çi hîn bûn, we çi stand, çi bihîst û çi dît wê yekê bikin û Xwedêyê eʼdilayîyê wê tʼevî we be.

Rʼazîbûna Pawlos

¹⁰ Ez bi saya Xudan gelekî şa me, ku we pey haqas wextrʼa ez bîr anîm, bona min xem xwar. Belê we dikir jî, lê mecal nedikʼete we.

¹¹ Ne ku ez hʼewcê tiştekî me ku vê yekê werʼa dibêjim. Ez hîn bûme, ku hʼemû hʼalîda rʼazî bim.

¹² Tʼunebûnê zanim, hebûnê zanim, ez her alîyîda û her hʼalîda ser vê surʼê vebûme û hîn bûme ku rʼazî bim, heger tʼêr bim, heger birʼçî, yan hebûnêda bim yan jî tʼunebûnêda.

¹³ Ez her tiştî bi saya Wî dikarim, Yê ku qewatê dide min.

¹⁴ Lê we qenc kir, ku tengasîya minda kʼomek da min.

¹⁵ Û belê hûn jî zanin gelî fîlîpîya, ku ji serê dannasînîya Mizgînîyêda gava ez ji Mekedonyayê derkʼetim, tʼu civînê tʼevkʼarîyêda destê xwe dirêjî min nekir, pêştirî we.

¹⁶ Çimkî carekê-duda ew tiştêd minrʼa kêrhatî we hʼeta Tʼêsalonîkîyê jî şandin.

¹⁷ Ez ne ku tiştekî pʼêşkʼêş dixwazim, lê dixwazim ku kʼar ser hʼesabê weda zêde be.

¹⁸ Min her tişt standîye û nava hebûnêda me. Ew tiştêd ku we bi destê Êpafrodîto minrʼa şandine ew besî min in. Ew dayîna we bîneke xweş e, hʼedîya qebûl û li Xwedê xweş e.

¹⁹ Û Xwedêyê min wê hʼemû kêmasîyêd we pê wê xizna Xweye rʼûmete ji Mesîh Îsa tʼijî ke.

²⁰ Awa şikir ji Xwedê û Bavê me, hʼeta-hʼetayê! Amîn.

Silavêd axirîyê

²¹ Tʼemamîya cimeʼta Xwedêye pʼara Mesîh Îsa silav kin. Ew birayêd ku tʼevî min in li we silav dikin.

²² Tʼemamîya cimeʼta Xwedê li we silav dike, îlahî ewêd ku ji mala Qeyser in.

²³ Kʼerema Xudan Îsa Mesîh tʼevî rʼuhʼê we be.