Efesî 6 - Peymana Nû (Încîl)

Tʼemîyêd bona zarʼa û dê-bava

¹ Zarʼno, çawa bawermendêd Xudan gurʼa dê û bavê xweda bin, çimkî ev yek rʼast e.

² «Qedirê dê û bavê xwe bigire» ku ev e tʼemîya pêşin tʼevî sozdayînê,

³ «wekî çerxa te rʼast be û ser eʼrdê eʼmirê te dirêj be».

⁴ Û hûn bavno, zarʼêd xwe hêrs neêxin, lê wan bi şîret û hînkirina Xudan mezin kin.

Xulam û axa

⁵ Xulamno, bi xof û tirs, dilê sax gurʼa xweyîyêd xweye vê dinêda bin, çawa gurʼa Mesîhda,

⁶ ne ku bi xulamtîya li ber çʼeʼva, ku li meriva xweş bên, lê çawa xulamêd Mesîh bi dil qirara Xwedê biqedînin.

⁷ Bi rʼezedilî xulamtîyê bikin, çawa Xudanrʼa, ne ku merivarʼa.

⁸ Hûn zanin ku her kes, heger xulam be, heger aza, çi qencîyê ku bike, weke wê jî wê ji Xudan bistîne.

⁹ Hûn jî xweyîno, hindava wanda usa bin. Dest ji gef-gurʼîyê bikin. Hûn zanin ku Xweyê wan jî, Yê we jî li eʼzmana ye û cem Wî tʼu firqî tʼune.

Çʼekêd Xwedê

¹⁰ Heyneser, yektîya Xudanda qewat bin, bi zorayîya qewata Wî.

¹¹ Her çʼekê Xwedê li xwe kin, ku hûn bikaribin miqabilî hʼunurêd mîrêcin bisekinin.

¹² Çimkî şerʼê me ne miqabilî xûn û goşt e, lê miqabilî serwêrtî û hʼukumetîya ye, miqabilî mîrêd vê dinya teʼrî ye û miqabilî ordîyêd rʼuhʼanîye xirabe li dîyarê eʼzmana ne.

¹³ Bona vê yekê çʼekêd Xwedê hildin, ku hûn bikaribin li ber rʼoja oxirmê giran bisekinin û piştî kirina her tiştîrʼa, cîyê xweda qewîn bisekinin.

¹⁴ Awa cîyê xweda bisekinin, rʼastîyê mîna kʼemberê li pişta xwe bişidînin, heqîyê mîna zirihʼê li sîngê xwe wergirin

¹⁵ û sol nigêd weda, bona Mizgînîya eʼdilayîyê hazir sekinî bin.

¹⁶ Li ser her tiştîrʼa jî bawerîyê mîna mertʼalê bigirine xwe, bi kʼîjanê hûnê bikaribin hʼemû tîrêd agirîye ku yê Xirab davêje, bitemirînin.

¹⁷ Û xilazbûnê mîna kʼumzirihʼê hildin, mîna şûr jî xebera Xwedê, ku ji Rʼuhʼê Pîroz e.

¹⁸ Bi hʼemû dua û rʼeca her gav dua bikin pê Rʼuhʼê Pîroz. Ser vê yekê hʼişyar bimînin û bona tʼemamîya cimeʼta Xwedê tʼimê dua bikin.

¹⁹ Û bona min jî dua bikin, ku gava ez xeber dim, gotinek minrʼa bê dayînê, wekî mêrkʼîmî surʼa Mizgînîyê eʼyan kim,

²⁰ bona Kʼîjanê ez bi van qeydê xwe qasidîyê dikim. Dua bikin, wekî ez bona Wê turuş kim xeber dim, çawa lazim e.

Silavêd axirîyê

²¹ Wekî hûn jî bona min bizanibin, haş ji hʼal-hʼewalê min hebin, Tixîkoyê birayê delal û qulixkʼarê amin yektîya Xudanda wê her tiştî werʼa bêje.

²² Ez bona wê yekê wî ser weda dişînim, wekî hûn haş ji me hebin û ew bi vê yekê dil bide we.

²³ De bira eʼdilayî û hʼizkirin bawerîyêva tʼevayî ji Bav Xwedê û Xudan Îsa Mesîh li xûşk-bira be.

²⁴ Bira kʼerem tʼevî wan hʼemûya be, yêd ku bi hʼizkirina bê xilazî Xudanê me Îsa Mesîh hʼiz dikin.