Efesî 5 - Peymana Nû (Încîl)

Çawa çʼeʼv bidine Xwedê

¹ Awa çʼeʼv bidine Xwedê, çawa zarʼêd hʼizkirî

² û xwe li hʼizkirinê bigirin, çawa Mesîh jî em hʼiz kirin û jîyîna Xwe bona me da, Xwedêrʼa bû hʼedî û qurbana bînxweş.

³ Lê hʼeta navê qavîyê û her hʼeramîyê, yan timayê jî gerekê nava weda neyê hildanê, çawa li cimeʼta Xwedê nakʼeve.

⁴ Usa jî gotinêd bêmeʼrîfetî, yan bêfeʼmî, yan hʼenekêd qelpê xirab, ku li we nakʼevin, bira ji devê we derneyên, lê dewsê şikirdarî.

⁵ Hûn vê yekê zanibin ku tʼu qav, yan hʼeram, yan timakʼar (ku pʼûtpʼarist e) Pʼadşatîya Mesîh û Xwedêda war nabe.

⁶ Bira tʼu kes bi xeberêd pʼûçʼ we nexapîne, çimkî bona van tişta hêrsa Xwedê li wan merivêd neguhdar rʼadibe.

⁷ Awa hûn tʼevî yêd usa nebin!

⁸ Hûn jî wextekê teʼrî bûn, lê niha hûn ku pʼara Xudan in, rʼonayî ne. Awa mîna zarʼêd rʼonayê bijîn,

⁹ (çimkî berê rʼonayîyê ji her qencîyê, heqîyê û rʼastîyê dibe)

¹⁰ û bizanibin ku çi li Xudan xweş tê.

¹¹ Tʼevî wan kirêd bêbere teʼrîyê nebin, lê wan ser avê xin,

¹² çimkî bona wan tiştêd ku ewana bi dizîva dikin şerm e jî ku bê xeberdanê.

¹³ Lê gava her tişt tê ber rʼonayê, aşkere dibe,

¹⁴ çimkî her tiştê ku aşkere dibe, dibe rʼonayî. Bona vê yekê hatîye gotinê: «Xewixîyo, hʼişyar be! Ji nav mirîya rʼabe û Mesîh wê te rʼonayî ke».

¹⁵ Awa binihêrʼin ku hûn nigê xwe fesal bavêjin, nebine mîna bêfeʼma, lê mîna serwaxta.

¹⁶ Dest bidine ber wext, çimkî zemanî xirab e.

¹⁷ Bona vê yekê bêfeʼm nîbin, lê belê bizanibin çi ye qirara Xudan.

¹⁸ Û bi şeravê serxweş nebin, ku eʼmirê mêriv pʼûçʼ dike, lê bi Rʼuhʼê Pîrozva tʼijî bin.

¹⁹ Zebûr û dirozga, stiranêd rʼuhʼanî hevdurʼa bêjin, bistirên û dilê xweda Xudanrʼa bilovînin.

²⁰ Her gav bona her tiştî rʼazîbûnê bidine Bav Xwedê, bi navê Xudanê me Îsa Mesîh.

Borcdarîya jin û mêra

²¹ Bi xofa Mesîhe nava xweda li ber hevdu xwe bişkênin.

²² Kʼulfetno, usa xwe li ber mêrêd xwe bişkênin, çawa li ber Xudan,

²³ çimkî mêr serê jinê ye, çawa Mesîh jî serê civînê ye û Xwexa Xilazkirê bedena Xwe ye.

²⁴ Û çawa civîn li ber Mesîh xwe dişkêne, bira usa jî jin her tiştîda ber mêrê xwe şkestî be.

²⁵ Mêrno, jinêd xwe hʼiz bikin, çawa ku Mesîh civîn hʼiz kir û jîyîna Xwe ber wêva da,

²⁶ wekî wê bi xeberê buhurtî-jibare ke, pê avê bişo,

²⁷ ku civînê li ber Xwe qeşeng bide sekinandinê, ku tʼu lekʼe yan qerçʼimok, yan tiştekî mîna van ser tʼunebe, lê paqij û bêqusûr be.

²⁸ Usa jî gerekê mêr jina xwe hʼiz bike, çawa bedena xwe. Yê ku jina xwe hʼiz dike, ew xwe hʼiz dike.

²⁹ Çimkî bedena tʼu kesî ber çʼeʼvê wî ne rʼeş e, lê wê tʼêr dike û xwey dike, çawa Mesîh jî civînê,

³⁰ çimkî em endemêd bedena Wî ne.

³¹ Çawa nivîsar e: «Bona vê yekê mêr wê dê û bavê xwe bihêle, xwe li jinê bigire û her du wê bibine bedenek».

³² Eva surʼa kʼûr e, lê ez gotina xwe tînime ser Mesîh û civînê.

³³ Belê ji we her kes jî bira jina xwe hʼiz bike çawa xwe û jin ji mêrê xwe xof bike.