شُله رسولا 19 - Peymana Nû (Încîl)

Pawlos Efesêda

¹ Gava Apolo hê Korintʼêda bû, Pawlos cîyê jorinrʼa derbaz bû berjêrî Efesê bû û li wir çend şagirt dîtin

² û ji wan pirsî: «Gava we bawer kir, we Rʼuhʼê Pîroz stand?» Wana got: «Me qet nebihîstîye jî ku Rʼuhʼê Pîroz heye».

³ Ewî wanrʼa got: «Lê hûn bi çi hatine nixumandinê?» Wana got: «Bi nixumandina Yûhʼenna».

⁴ Pawlos got: «Yûhʼenna bona gunevegerʼandinê nixumand û cimeʼtêrʼa got: ‹Yê ku pey minrʼa tê bawerîya xwe Wî bînin›, awa gotî Îsa».

⁵ Gava ev yek bihîstin, bi navê Xudan Îsa hatine nixumandinê.

⁶ Û gava Pawlos destêd xwe danîne ser wan, Rʼuhʼê Pîroz hate ser wan, bi zimana xeber dan û pʼêxembertî kirin.

⁷ Evana weke donzdeh merîya bûn.

⁸ Pawlos kʼete kʼinîştê, sê meha mêrkʼîmî xeber dida, bona Pʼadşatîya Xwedê wanrʼa dikʼete xeberdanê û ew didane bawerkirinê.

⁹ Lê gava hineke serhʼişk miqabil derkʼetin û li ber cimeʼtê Rʼîya Xudan bêhurmet dikirin, Pawlos ji wan qetîya, şagirt başqe kirin û her rʼoj dersxana Tîranoda wanrʼa dikʼete xeberdanê.

¹⁰ Evê yekê du sala kʼişand, hʼeta ku hʼemû cihû û yûnanêd ku qeza Asyayêda diman, Xebera Xudan bihîstin.

Her hʼeft kurʼêd Skêwa

¹¹ Xwedê bi destê Pawlos gelek kʼeremetêd zor dikirin,

¹² hʼeta ku ew destmal û şalikêd ku Pawlos lê dikʼetin nexweşarʼa dibirin, ew qenc dibûn û rʼuhʼêd xirab derdikʼetin.

¹³ Çend cihûyêd gerʼok hebûn ku xwe dabûne cinderxistinê, wan dikir ku ser yêd ku rʼuhʼêd xirab nava wanda hebûn, pê navê Xudan Îsa berî wan din û digotin: «Em pê wî Îsayê ku Pawlos dannasîn dike berî we didin».

¹⁴ Eva yeka her hʼeft kurʼêd Skêwayê serekkʼahînekî cihûya dikirin.

¹⁵ Carekê rʼuhʼê xirab li wan vegerʼand û got: «Ez Îsa nas dikim, bona Pawlos jî zanim, lê hûn kʼî ne?»

¹⁶ Hingê ew merivê ku rʼuhʼê xirab têda bû, banzda ser wan, qewata wî wan hʼemûyada çû ew usa kʼutan, wekî ew ji wê malê teʼzî û birîndar rʼevîn.

¹⁷ Bona vê yekê hʼemû cihû û yûnanêd ku Efesêda diman pê hʼesîyan. Tirs kʼete ser wan hʼemûya û navê Xudan Îsa bilind dibû.

¹⁸ Gelek bawermend jî dihatin gunêd xwe didane rʼûyê xwe û kirêd xwe digotin.

¹⁹ Yêd sêrbazîyêva jî ku mijûl dibûn, geleka kʼitêbêd xwe tʼop dikirine cîkî û li ber hʼemûya dişewitandin. Qîmetê wan hʼesab kirin, pêncî hʼezar zîv derkʼet.

²⁰ Bi vî awayî Xebera Xudan bi zorayî hê pêşda diçû û qewat dibû.

Şerʼ-deʼwa Efesêda

²¹ Gava ev tişt bûn, Pawlos qirar kir ku Mekedonyayê û Axayayêva derbaz be herʼe Orşelîmê û got: «Pey çûyîna wirarʼa gerekê ez herʼim Rʼomê jî bibînim».

²² Ewî du kʼomekdarêd xwe Tîmotʼêyo û Êrasto şandine Mekedonyayê û ew hinekî jî li qeza Asyayê ma.

²³ Wan çaxada bona Rʼîya Xudan gelekî şerʼ-deʼw pêşda hat.

²⁴ Yekî zîvker hebû navê wî Dîmîtrîyo. Evî pʼaristgehêd xwedêya navê wê Artemîs cûrʼê ya eʼdetîda bi zîv biçʼûk çêdikirin û gelek kʼar hostarʼa danî.

²⁵ Ewî gazî wan hʼemû hosta, usa jî yêd mîna xweyîyê vî pʼêşeyî kirin û got: «Gelî hevala! Hûn zanin ku kʼara me vî şixulîda ye.

²⁶ Hûn jî dibihên û dibînin ku evî Pawlosî ne ku tʼenê Efesêda, lê bawerîya we hebe tʼemamîya qeza Asyayêda jî serê gelek cimeʼta tʼijî kirîye ji rʼê derxistîye û dibêje: ‹Ew xwedêyêd ku bi desta çêkirî ne, ew ne xwedê ne›.

²⁷ Zîyana wê ne tʼenê ew e ku pʼêşê me tê bêhurmetkirinê, lê pʼaristgeha Artemîs xwedêya mezin wê ber tiştekî neyê hʼesabê û wê qedirê mezinayîya wê bikʼeve, ya ku hʼemû qeza Asya û dinya dihʼebîne».

²⁸ Gava ev yek bihîstin, bi kʼîn-box tʼijî bûn, dikirine qîrʼîn û digotin: «Artemîsa efesîya mezin e!»

²⁹ Tʼemamîya bajêr qilqilî, rʼahişte Gayos û Erîstarxoyê mekedonî, ku heval-rʼêyêd Pawlos bûn, hevrʼa rʼevîne dîtindarê.

³⁰ Pawlos jî xwest ku bikʼeve nava wê eʼlaletê, lê şagirta nehişt.

³¹ Ji hinek serwêrêd qeza Asyayê jî ku dostêd wî bûn, merî şandine cem wî û hîvî jê kirin, ku neçe dîtindarê.

³² Hema wî wextîda hineka cûrʼekî, hineka jî cûrʼekî din dikirine qîrʼîn, çimkî kʼombûna wan tʼevîhevbûyî bû, geleka jî nizanibû ew bona çi jî civîyane.

³³ Hineka ji eʼlaletê Skender pêşda birin, çimkî cihûya ew pêşda deʼf dan. Skender destê xwe bilind kir, xwest caba xwe bide.

³⁴ Lê gava pê hʼesîyan ku ew cihû ye, hʼemûya bi dengekî weke du sihʼeta kirine qîrʼîn: «Artemîsa efesîya mezin e!»

³⁵ Paşê kʼatibê bajêr eʼlalet seqirʼand û got: «Gelî efesîya! Kʼî nizane ku bajarê Efesê xweyîtîyê pʼaristgeha Artemîsa mezin dike, ya ku kevirê wêyî pîroz ji eʼzmên hatîye xwarê?

³⁶ Çawa vê yekêda ku tiştekî xêlif tʼune, lema jî gerekê hûn xwe rʼihʼet xwey kin û tiştekî bi berzeqîyê nekin.

³⁷ We ev merivana anîne vira, evana ne tʼalankirêd pʼaristgehê ne û ne jî xwedêya me bêhurmet kirine.

³⁸ Awa heger şikîyatê Dîmîtrîyo û hostayêd tʼevî wî ser yekî heye, bira herʼine dîwanxanê, hʼakim hene. Li wir ew dikarin şikîyatê xwe hevdu bikin.

³⁹ Lê heger xwestina we bona tiştekî din e, bira civateke eʼdetîda bê lênihêrʼandinê.

⁴⁰ Çimkî zîyana me jî vê yekêda heye û bona şerʼê îroyîn emê bêne neheqkirinê û meʼnîk tʼune, ku em pê bikaribin bona vê kʼombûnê caba xwe bidin».

⁴¹ Gava ev yek got, civat bela kir.