Yûhenna 8 - Пәймана Ну (Инщил)

¹ ле Иса чу чʼийайе Зәйтʼуне.

² Сәре сьбәһе зу Әԝ диса вәгәрʼийа пʼарьстгәһе, тʼәмамийа щьмәʼте һатә щәм Ԝи. Әԝ рʼуньшт у дәстпекьр әԝ һин кьрьн.

³ Ԛанунзан у ферьсийа жьнәкә кӧ зьнекʼарийеда һатьбу гьртьне анин у ль бәр һʼәмуйа данә сәкьнандьне.

⁴ Ԝана жерʼа гот: «Дәрсдар, әва жьна зьнекʼарийеда һатә гьртьне.

⁵ Ԛанунеда Муса тʼәми дайә мә, кӧ әм йед аһа бьдьнә бәр кәвьра. Аԝа Тӧ чь дьбежи?»

⁶ Бь ве готьне Әԝ дьщерʼьбандьн, ԝәки ньге ԝан щи бьгьрә, Ԝи нәһәԛ дәрхьн. Ле Иса Хԝә ԛуз кьр у бь тʼьлийа Хԝә ль сәр әʼрде ньвиси.

⁷ Ле гава ԝан сәрһәв-сәрһәв дьпьрсин, Әԝи сәре Хԝә бьльнд кьр у ԝанрʼа гот: «Нава ԝәда кʼи бегӧнә йә, бьра кәвьре пешьн әԝ бавежә ԝе».

⁸ У диса Ԝи Хԝә ԛуз кьр у бь тʼьлийа Хԝә сәр әʼрде ньвиси.

⁹ Ԝана кӧ әв йәк бьһист, жь мәзьна гьрти йәк-йәк дәркʼәтьн. Иса тʼәне ма у кʼӧлфәт жи ль ԝьр сәкьни мабу.

¹⁰ Иса сәре Хԝә бьльнд кьр у ԝерʼа гот: «Әʼвде, кʼане нә? Кәсәки тӧ нәһәԛ нәкьри?»

¹¹ Әԝе готә Ԝи: «Тʼӧ кәс нәма, әз хӧлам!» У Иса готе: «Әз жи тә нәһәԛ накьм. Һәрʼә у иди жь вьр шунда гӧна нәкә».

Рʼонайа дьнйайе

¹² Иса диса тʼәви ԝан хәбәр да у гот: «Әз ьм рʼонайа дьнйайе. Әԝе кӧ пәй Мьн бе, ԝе тʼӧ щар тәʼрийеда нәгәрʼә, ле ԝе рʼонайа ԝийә жийине һәбә».

¹³ Ферьсийа ле вәгәрʼанд у готьне: «Тӧ шәʼдәтийе бона Хԝә дьди, шәʼдәтийа Тә нә рʼаст ә».

¹⁴ Иса щаба ԝана да у гот: «Һәгәр Әз Хԝәха бона Хԝә шәʼдәтийе дьдьм, шәʼдәтийа Мьн рʼаст ә, чьмки Әз заньм Әз жь кʼӧ һатьмә у кʼӧда дьчьм. Ле һун ньзаньн кӧ Әз жь кʼӧ тем, йан кʼӧда дьчьм.

¹⁵ Һун ль анәгори дитьна чʼәʼва диԝане дькьн, ле Әз диԝана тʼӧ кәси накьм.

¹⁶ Ле һәгәр Әз диԝане бькьм жи, диԝанкьрьна Мьн рʼаст ә, чьмки Әз нә тʼәне мә, Әз у Бав әм һәврʼа нә, йе кӧ Әз шандьмә.

¹⁷ Ԛануна ԝәда жи ньвисар ә, кӧ шәʼдәтийа дӧ мәрьва рʼаст ә.

¹⁸ Әз бона Хԝә шәʼдәтийе дьдьм у Баве кӧ Әз шандьмә жи бона Мьн шәʼдәтийе дьдә».

¹⁹ Һьнге ԝан же пьрси: «Кʼане йә Баве Тә?» Иса ль ԝан вәгәрʼанд у гот: «Һун нә Мьн нас дькьн, нә жи Баве Мьн. Һәгәр ԝә Әз нас бькьрама, ԝәйе Баве Мьн жи нас бькьра».

²⁰ Иса әв хәбәр пʼарьстгәһеда ԝәхте һинкьрьна Хԝә готьн, ль ԝе ода кӧ дийари теда дьһатә тʼопкьрьне, ле кәси Әԝ нәгьрт, чьмки һе ԝәхте Ԝи нәһатьбу.

Иса нә жь ве дьне йә

²¹ Ԝи диса ԝанрʼа гот: «Әз дьчьм, һуне ль Мьн бьгәрʼьн у һуне нав гӧнед хԝәда бьмьрьн. Һун нькарьн бенә ԝи щийе кӧ Әзе һәрʼьме».

²² Сәр ве йәке щьһуйа гот: «Дьбә кӧ әве Хԝә бькӧжә кӧ дьбежә: ‹Һун нькарьн бенә ԝи щийе кӧ Әзе һәрʼьме›?»

²³ Иса ԝанрʼа гот: «Һун жь жере нә, Әз жь жоре мә, һун жь ве дьнйайе нә, ле Әз нә жь ве дьнйайе мә.

²⁴ Бона ве йәке Мьн ԝәрʼа гот, кӧ һуне нав гӧнед хԝәда бьмьрьн. Һәгәр һун баԝәр нәкьн кӧ ӘЗ ӘԜ ЬМ, һуне нав гӧнед хԝәда бьмьрьн».

²⁵ Һьнге же пьрсин: «Тӧ кʼи йи?» Иса ԝанрʼа гот: «Әз Әԝ ьм, Йе кӧ сәре серида ԝәрʼа дьбежьм.

²⁶ Гәләк тьшт һәнә, кӧ Әз дәрһәԛа ԝәда бежьм у диԝана ԝә бькьм. Ле Йе кӧ Әз шандьмә сәр рʼастийе йә у чь кӧ Мьн жь Ԝи бьһистийә, Әз дьнйайерʼа ԝе дьбежьм».

²⁷ Ԝана хәбәрдана Ԝи фәʼм нәкьр, кӧ Ԝи ани сәр Баве.

²⁸ Һьнге Иса ԝанрʼа гот: «Кʼәнге һун Кӧрʼе Мерьв бьльнд кьн, һуне һьнге бьзаньбьн кӧ ӘЗ ӘԜ ЬМ у Мьн ԛәт тʼӧ тьшт хԝәсәрихԝә нәкьрийә, ле Баве чаԝа Әз һин кьрьмә, Әз ӧса хәбәр дьдьм.

²⁹ У Йе кӧ Әз шандьмә тʼәви Мьн ә у Ԝи Әз тʼәне нәһьштьмә, чьмки Әз һәр гав кьрьнед кӧ Ԝи хԝәш тен, дькьм».

³⁰ Гава Иса аһа хәбәр да, гәләк мәрьва баԝәрийа хԝә Ԝи ани.

Рʼастийе ԝә аза кә

³¹ Һьнге Иса готә ԝан щьһуйа, йед кӧ баԝәрийа хԝә Ԝи анин: «Һәгәр һун сәр һинкьрьна Мьн бьминьн, һуне рʼаст шагьртед Мьн бьн.

³² Һуне рʼастийе нас кьн у рʼастийе ԝә аза кә».

³³ Ԝана ле вәгәрʼанд у готьне: «Әм жь зӧрʼәта Бьраһим ьн у тʼӧ щар мә хӧламти кәсирʼа нәкьрийә. Тӧ чаԝа дьбежи: ‹Һуне аза бьн›?»

³⁴ Иса ль ԝан вәгәрʼанд у гот: «Әз рʼаст бе хельф ԝәрʼа дьбежьм, һәр кәсе кӧ гӧна дькә, әԝ хӧламе гӧна йә.

³⁵ Хӧлам һʼәта-һʼәтайе маледа наминә, ле кӧрʼ һʼәта-һʼәтайе дьминә.

³⁶ Аԝа һәгәр Кӧрʼе Хԝәде ԝә аза кә, һуне рʼасти аза бьн.

³⁷ Әз заньм кӧ һун жь зӧрʼәта Бьраһим ьн, ле һун дькьн кӧ Мьн бькӧжьн, чьмки хәбәред Мьн дьле ԝәда щи набьн.

³⁸ Мьн чь кӧ щәм Баве Хԝә дитийә, Әз ԝе дьбежьм, ԝә жи чь кӧ щәм баве хԝә бьһистьнә ԝе йәке дькьн».

Зарʼед мирещьн

³⁹ Ԝана ле вәгәрʼанд у готьне: «Баве мә Бьраһим ә». Иса ԝанрʼа гот: «Һәгәр һун зарʼед Бьраһим буна, ԝәйе кьред Бьраһим бькьрана.

⁴⁰ Ле ньһа һун дькьн кӧ Мьн бькӧжьн, йәки ӧса кӧ рʼасти жь Хԝәде бьһистийә, ԝәрʼа дьбежә. Бьраһим тьштәки аһа нәкьр.

⁴¹ Һун кьред баве хԝә дькьн». Һьнге Ԝирʼа готьн: «Әм рʼийа зьнекʼарийеда дьне нәкʼәтьнә! Бавәки мә һәйә, Әԝ жи Хԝәде йә».

⁴² Иса ԝанрʼа гот: «Һәгәр Хԝәде Баве ԝә буйа, ԝәйе Әз һʼьз бькьрама, чьмки Әз жь щәм Хԝәде рʼабум һатьмә вьр. Әз нә кӧ хԝәсәрихԝә һатьмә, ле Әԝи Әз шандьмә.

⁴³ Чьма һун тьштед кӧ Әз дьбежьм фәʼм накьн? Чьмки һун нькарьн готьнед Мьн бьбьн.

⁴⁴ Һун баве хԝәда жь мирещьн ьн у дьхԝазьн хԝәстьнед баве хԝә биньнә сери. Әԝ жь сәре серида ԛәтʼьл бу у ԝи тʼӧ щар хԝә рʼастийе нәгьртийә, чьмки нава ԝида рʼасти тʼӧнә. Гава әԝ дәрәԝа дькә, әԝ гора бьнйатʼа хԝә дькә, чьмки әԝ дәрәԝин ә у баве дәрәԝа йә.

⁴⁵ Ле чьмки Әз рʼастийе дьбежьм, һун Мьн баԝәр накьн.

⁴⁶ Жь ԝә кʼи дькарә избат кә, кӧ гӧне Мьн һәйә? Аԝа һәгәр рʼастийе дьбежьм, чьма һун Мьн баԝәр накьн?

⁴⁷ Әԝе кӧ жь Хԝәде йә, готьнед Хԝәде дьбьһе. Бона ԝе йәке һун готьнед Хԝәде набьһен, чьмки һун нә жь Хԝәде нә».

Иса у Бьраһим

⁴⁸ Щьһуйа ле вәгәрʼанд у готьне: «Чьма әм рʼаст набежьн, кӧ Тӧ самәри йи у щьна дькʼәви?»

⁴⁹ Иса ԝанрʼа гот: «Әз щьна накʼәвьм. Әз ԛәдьре Баве Хԝә дьгьрьм, ле һун Мьн беһӧрмәт дькьн.

⁵⁰ Әз рʼумәта наве Хԝә нагәрʼьм, ле йәк һәйә кӧ ле дьгәрʼә у сәрда дьньһерʼә.

⁵¹ Әз рʼаст бе хельф ԝәрʼа дьбежьм, һәгәр йәк готьна Мьн хԝәй кә, әԝ тʼӧ щар мьрьне набинә».

⁵² Һьнге щьһуйа жерʼа гот: «Иди әм заньн кӧ Тӧ щьна дькʼәви! Бьраһим жи мьр, пʼехәмбәр жи мьрьн у ньһа Тӧ дьбежи: ‹Һәгәр йәк готьна Мьн хԝәй кә, тʼӧ щар намьрә›.

⁵³ Чьма Тӧ жь баве мә Бьраһим четьр и? Әԝ мьр, пʼехәмбәр жи мьрьн. Тӧ Хԝә дәԝса кʼе датини?»

⁵⁴ Иса щаб да: «Һәгәр Әз хԝәха рʼумәта наве Хԝә бьльнд кьм, рʼумәта наве Мьн нә тьштәк ә. Әԝ, Баве Мьн ә, Йе кӧ рʼумәта наве Мьн бьльнд дькә, кʼижанирʼа һун дьбежьн: ‹Хԝәдейе мә йә›.

⁵⁵ Һун Ԝи ԛәт нас накьн, ле Әз Ԝи нас дькьм. Һәгәр Әз бежьм, Әз Ԝи нас накьм, Әзе жи мина ԝә дәрәԝ дәрем, ле Әз Ԝи нас дькьм у готьна Ԝи хԝәй дькьм.

⁵⁶ Баве ԝә Бьраһим һʼәйра ԝе рʼожа Мьнда бу, ԝи дит у ша бу».

⁵⁷ Бона ве йәке щьһуйа жерʼа гот: «Тӧ һе пенщи сали тʼӧнә йи! Тә Бьраһим жи дитийә?»

⁵⁸ Иса ԝанрʼа гот: «Әз рʼаст бе хельф ԝәрʼа дьбежьм, һе бәри Бьраһим ӘЗ ҺӘМӘ».

⁵⁹ Һьнге ԝан кәвьр һьлдан кӧ бавежьнә Ԝи, ле Иса Хԝә жь ԝан вәдьзи у жь пʼарьстгәһе дәркʼәтә дәрва чу.