Yûhenna 7 - Пәймана Ну (Инщил)

Иса у бьред Хԝәва

¹ Пәй ве йәкерʼа Иса Щәлиледа дьгәрʼийа. Ԝи нәдьхԝәст кӧ Щьһустанеда бьгәрʼийа, чьмки щьһу пәй кʼәтьбун кӧ бькӧштана.

² Гава Щәжьна щьһуйайә Һʼолькчекьрьне незик бу,

³ бьред Ԝи жерʼа готьн: «Жь вьр рʼабә һәрʼә Щьһустане, ԝәки шагьртед Тә әԝ кьред кӧ Тӧ дьки бьбиньн.

⁴ Чьмки мәрьве кӧ дьхԝазә ашкәрә хԝә бьдә наскьрьне, кьрьнед хԝә вәнашерә. Һәгәр Тӧ хԝәйе ван кьра йи, хԝә дьнйайева әʼйан кә».

⁵ Бьред Ԝи жи баԝәрийа хԝә же нәданин.

⁶ Иса ԝанрʼа гот: «Ԝәхте Мьн һе нәһатийә, ле һәр тʼьм ԝәхт дәсте ԝәда йә.

⁷ Дьнйа нькарә бьжәнә ԝә, ле дьжәнә Мьн, чьмки Әз шәʼдәтийе дьдьм, кӧ кьред ԝе хьраб ьн.

⁸ Һун хԝәха һәвраз һәрʼьнә ве щәжьне, ле Әз һәла һе найеме, чьмки ԝәхте Мьн һе тʼам нәһатийә».

⁹ Әԝ йәк ԝанрʼа гот у ль Щәлиле ма.

Иса тʼәви щәжьне дьбә

¹⁰ Ле чахе бьред Ԝи һәвраз чунә щәжьне, Әԝ жи рʼабу чу ԝьр, нә кӧ ашкәрә, ле бь дьзива.

¹¹ Ԝи чахи щьһу щәжьнеда ле дьгәрʼийан у дьготьн: «Әԝ кʼане йә?»

¹² Нав әʼлаләтеда бона Ԝи гәләк хәбәрдан дьчу. Һьнәка дьгот: «Әԝ мәрьвәки ԛәнщ ә», һьнәка жи дьгот: «На, Әԝ щьмәʼте жь рʼе дәрдьхә».

¹³ Ле жь тьрса щьһуйа, кәси нәԝерьбу ашкәрә бона Ԝи тьштәк бьгота.

¹⁴ Ле ниве щәжьнеда Иса һәвраз чу кʼәтә пʼарьстгәһе у дәст бь һинкьрьне кьр.

¹⁵ Щьһу әʼщебмайи дьман у дьготьн: «Әви нәхԝәндийә, әԝ чаԝа һаԛас ньвисар занә?»

¹⁶ Иса ль ԝан вәгәрʼанд у гот: «Һинкьрьна Мьн нә жь Мьн ә, ле жь Ԝи йә, Йе кӧ Әз шандьмә.

¹⁷ Һәгәр мәрьвәк бьхԝазә әʼмьре Ԝи бьԛәдинә, ԝе һьнге бьзаньбә әв һинкьрьна Мьн гәло жь Хԝәде йә, йан Әз хԝәсәрихԝә хәбәр дьдьм.

¹⁸ Йе кӧ хԝәсәрихԝә хәбәр дьдә, әԝ ль наве хԝә дьгәрʼә, ле Әԝе кӧ ль наве Йе кӧ Әԝ шандийә дьгәрʼә, Әԝ йәки рʼаст ә у ль щәм Ԝи ԛәлпи тʼӧнә.

¹⁹ Нә Муса Ԛанун да ԝә? У жь ԝә тʼӧ кәс жи Ԛануне наԛәдинә. Һун чьма дьхԝазьн Мьн бькӧжьн?»

²⁰ Щьмәʼте ле вәгәрʼанд у готе: «Тӧ щьнакʼәти йи! Кʼи дьхԝазә Тә бькӧжә?»

²¹ Иса ль ԝан вәгәрʼанд у гот: «Мьн кʼәрәмәтәк кьр, һун һʼәму жи әʼщебмайи манә.

²² Муса сьнәткьрьн да ԝә, (әԝ жи нә кӧ жь Муса һат, ле жь кал у бава) у һун рʼожа шәмийе мерьв сьнәт дькьн.

²³ Һәгәр һун рʼожа шәмийе зарʼа сьнәт дькьн ԝәки Ԛануна Муса нәтʼәрʼьбә, иди чьма һун һерса хԝә ль сәр Мьн рʼадькьн, ԝәки Мьн рʼожа шәмийеда мәрьвәк сәрда-педа ԛәнщ кьр?

²⁴ Ль анәгори дитьна чʼәʼвед хԝә диԝане нәкьн, ле ль анәгори рʼастийе диԝане бькьн».

Шька сәр Иса

²⁵ Һьнге һьнәкә жь Оршәлиме готьн: «Әва нә әԝ ә, йе кӧ дьхԝәстьн бькӧштана?

²⁶ У ва йә Әԝ ашкәрә хәбәр дьдә у тʼӧ кәс жи жерʼа тьштәки набежә. Дьбә кӧ сәрԝер пе һʼәсийанә, кӧ Әва Мәсиһ ә?

²⁷ Ле рʼаст әм заньн кӧ әва жь кʼӧ йә. Ле гава кӧ Мәсиһ бе, кәсе ньзаньбә кӧ әԝ жь кʼӧ йә».

²⁸ Һьнге Иса пʼарьстгәһеда ԝәхте һинкьрьне дәнге Хԝә бьльнд кьр у гот: «Һун Мьн нас дькьн у заньн кӧ Әз жь кʼӧ мә? Әз хԝәсәрихԝә нәһатьмә. Ле Йе кӧ Әз шандьмә, Әԝ сәр рʼастийе йә, һун Ԝи нас накьн.

²⁹ Әз Ԝи нас дькьм, чьмки Әз жь Ԝи мә у Әԝи Әз шандьмә».

³⁰ Һьнге кьрьн кӧ Ԝи бьгьрьн, ле кәсәки нькарьбу Әԝ бьгьрта, чьмки һе ԝәхте Ԝи нәһатьбу.

³¹ Ле жь әʼлаләте гәләка баԝәрийа хԝә Ԝи ани у готьн: «Гава кӧ Мәсиһ бе, Әԝе жь кьрьнед ви зедәтьр нишана бькә?»

Бона гьртьна Иса нобәдар тенә шандьне

³² Ферьсийа әԝ готә-гота дәрһәԛа Ԝида жь нава щьмәʼте бьһист у сәрәкед кʼаһина нобәдар шандьн, ԝәки Ԝи бьгьрьн.

³³ Иса гот: «Әзе һьнәк ԝәхт жи тʼәви ԝә бьминьм, паше Әзе һәрʼьмә щәм Ԝи, Йе кӧ Әз шандьмә.

³⁴ Һуне ль Мьн бьгәрʼьн, ле Мьн набиньн. Щийе кӧ Әзе ле бьминьм, һун нькарьн бен».

³⁵ Һьнге щьһуйа һәвдӧрʼа готьн: «Әв мәрьве кʼӧда һәрʼә, кӧ әме Ԝи нәбиньн? Ԛәй нета Ԝи һәйә һәрʼә щәм щьмәʼта мәйә кӧ ль нав йунанада бәла буйә у йунана һин кә?

³⁶ Әв чь хәбәрдан ә әԝ дькә: ‹Һуне ль Мьн бьгәрʼьн у Мьн нәбиньн, щийе кӧ Әзе ле бьминьм, һуне нькарьбьн бен›?»

Чʼәмед ава жийине

³⁷ Рʼожа хьлазийе, рʼожа щәжьнейә һәрә әʼзиз, Иса сәкьни у бь дәнгәки бьльнд гот: «Һәгәр йәк тʼи йә, бьра бе щәм Мьн у вәхԝә.

³⁸ Әԝе кӧ баԝәрийа хԝә Мьн бинә, чаԝа кӧ ньвисар дьбежә: ‹Ԝе жь нав-дьле ԝи чʼәмед ава жийине бькʼьшьн›».

³⁹ Иса әв готьн бона ԝи Рʼӧһʼе Пироз гот, кʼижан кӧ баԝәрмәндед Ԝи ԝе бьстандана. Рʼӧһʼе Пироз һе нәһатьбу дайине, чьмки Иса һе нәһатьбу рʼумәткьрьне.

Дӧтирәтийа нав әʼлаләте

⁴⁰ Гава ԝана әв готьн бьһист, һьнәкед жь әʼлаләте готьн: «Рʼасти жи әва әԝ пʼехәмбәр ә».

⁴¹ Һьнәка жи гот: «Әва Мәсиһ ә», ле һьнәкед дьн жи готьн: «Чьма Мәсиһе жь Щәлиле бе?

⁴² Нә ньвисар дьбежә, кӧ Мәсиһе жь зӧрʼәта Даԝьд у жь гӧнде Даԝьд ԝе бе, аԝа готи жь Бәйтләһʼме?»

⁴³ Бь ви аԝайи нав әʼлаләтеда, ль сәр Ԝи дӧтирәти пешда һат.

⁴⁴ Һьнәкед жь ԝан хԝәстьн Әԝ бьгьртана, ле тʼӧ кәси дәст нәда Ԝи.

Нәбаԝәрийа сәрԝеред щьһуйа

⁴⁵ Һьнге нобәдар вәгәрʼийанә щәм ферьси у сәрәкед кʼаһина. Ԝана жь нобәдара пьрси: «Ԝә чьма Әԝ нәани?»

⁴⁶ Нобәдара ль ԝан вәгәрʼанд у готьн: «Тʼӧ кәси тʼӧ щара мина ԝи мәрьви хәбәр нәдайә!»

⁴⁷ Һьнге ферьсийа ль ԝан вәгәрʼанд у готьн: «Иди әԝи һун жи жь рʼе дәрхьстьнә?

⁴⁸ Тʼӧ жь сәрԝер у ферьсийа кәсәки баԝәрийа хԝә же анийә,

⁴⁹ пештьри ве щьмәʼта мәʼрьм, кӧ Ԛануне ньзанә у ньфьрʼ ле йә?»

⁵⁰ Никодемо, йе кӧ бәре чубу щәм Иса у жь ферьсийа бу, ԝанрʼа гот:

⁵¹ «Гәло Ԛануна мә диԝана мерьв дькә, һʼәта кӧ гӧһдарийа ԝи нәкә у ньзаньбә кӧ әԝ чь дькә?»

⁵² Ль ԝи вәгәрʼандьн у готьн: «Дьбә кӧ тӧ жи жь Щәлиле йи? Кʼур әʼнәнә кә, те бьбини кӧ жь Щәлиле тʼӧ пʼехәмбәр дәрнакʼәвьн».

Жьна гӧнәкʼар те бахшандьне

⁵³ У һәр кәс чу мала хԝә,