Yûhenna 6 - Пәймана Ну (Инщил)

Иса пенщ һʼәзара тʼер дькә

¹ Пәй ве йәкерʼа Иса дәрбази ԝи бәри гола Щәлиле бу, кӧ жерʼа Тәбәрийа дьбежьн.

² Әʼлаләтәкә гьран пәй Ԝи дьчу, чьмки ԝан әԝ нишанед кʼәрәмәт дитьбун, йед кӧ Ԝи ль сәр нәхԝәша кьрьбун.

³ Иса рʼабу сәре чʼийе у ль ԝе дәре тʼәви шагьртед Хԝә рʼуньшт.

⁴ Щәжьна щьһуйайә Дәрбазбуне незик бу.

⁵ Гава Иса ль дора Хԝә ньһерʼи, дит кӧ әʼлаләтәкә гьран бәрбь Ԝи те, готә Филипо: «Әме нен жь кʼӧ дәре бькʼьрʼьн, ԝәки әв мәрьвана бьхԝьн?»

⁶ Әԝи әв йәк гот, кӧ ԝи бьщерʼьбинә, чьмки Хԝәха заньбу кӧ ԝе чь бькьра.

⁷ Филипо ле вәгәрʼанд у готе: «Баһе дӧсьд зиви нан жи тʼера ван накә, һәма ԝәки һәр йәкирʼа пәʼрик жи бькʼәвә!»

⁸ Жь шагьрта йәки, Әндраԝьсе бьре Шьмһʼун-Пәтрус готә Ԝи:

⁹ «Вьр хортәк һәйә, кӧ пенщ нанед щәһ у дӧ мәʼсийед ԝи һәнә. Ле бона һаԛас мәрьва әв чь йә?»

¹⁰ Иса гот: «Мәрьва ль әʼрде бьдьнә рʼуньштандьне». Шинайийа ԝьр гәләк бу, әԝ меред кӧ рʼуньштьн, ԝәкә пенщ һʼәзара бун.

¹¹ Һьнге Иса әԝ нан һьлдан шькьри да у бәлайи рʼуньштийа кьр. Бь ви аԝайи жи мәʼси бәла кьрьн, чьԛас кӧ хԝәстьн.

¹² У гава тʼер хԝарьн, Әԝи шагьртед Хԝәрʼа гот: «Ԝан һурькед бәрмайи бьдьнә һәв, ԝәки тьштәк пʼучʼ нәбә».

¹³ Шагьрта жи жь бәр әԝед кӧ пенщ нанед щәһ хԝарьбун, донздәһ сәлә жь һурькед бәрмайи тʼьжи бәрәв кьрьн.

¹⁴ Гава ван мәрьва дит кӧ Иса әв нишан кьр, готьн: «Рʼаст Әв ә әԝ пʼехәмбәре кӧ ԝе бьһата дьнйайе!»

¹⁵ Һьнге Иса пе һʼәсийа кӧ әԝе бен у Ԝи бь зоре бьбьн бькьнә пʼадша, диса Әԝ тʼәне һьлкʼьшийа чʼийе.

Иса пʼийа ль сәр аверʼа дьчә

¹⁶ Гава рʼо чу ава, шагьртед Ԝи бәржери дәве голе бун.

¹⁷ Әԝ кʼәтьнә ԛәйькәке у рʼе кʼәтьн, ԝәки дәрбази Кәфәрнаһуме, ԝи бәри голе бьн. Иди тәʼри кʼәтьбу әʼрде, ле Иса һе Хԝә ԝанрʼа нәгиһандьбу.

¹⁸ Фьртонәкә ԛайим рʼабу, голе да бәр пела.

¹⁹ Гава ԝан бер кʼьшандьн ԛаси пенщ-шәш километьра пешда чун, ԝан дит кӧ Иса пәйа сәр голерʼа те незики ԛәйьке дьбә. Рʼьсасе әԝ гьртьн,

²⁰ ле Иса ԝанрʼа гот: «Нәтьрсьн, Әз ьм!»

²¹ Һьнге ԝан хԝәст кӧ Әԝ һьлдана ԛәйьке. Ԛәйьк перʼа-перʼа гьһиштә ԝи алийе кӧ ԝан дьхԝәст бьчунайе.

Мәрьв ль Иса дьгәрʼьн

²² Рʼожа дьне әԝ әʼлаләта кӧ ль ԝи бәри голе мабу, заньбу кӧ ль ԝьр алийе ԝан тʼәне ԛәйькәк һәбу, әԝ жи шагьртед Ԝи тʼәне кʼәтьбуне дәрбаз бьбун, ле Иса нәкʼәтьбу ԝе ԛәйьке.

²³ Жь алийе Тәбәрийайе һьнәк ԛәйькед дьн һатьн незики ԝи щийи бун, кʼидәре пәй шькьрдайина Хӧданрʼа нан хԝарьбун.

²⁴ Гава мәрьва дит кӧ нә Иса ль ԝьр ә у нә жи шагьртед Ԝи, һьнге әԝ хԝәха жи кʼәтьнә ԛәйька у чунә Кәфәрнаһуме, ԝәки ль Иса бьгәрʼьн.

Иса йә нане жийина һʼәта-һʼәтайе

²⁵ Гава ԝан Иса ль ԝи бәри голе дит, жерʼа готьн: «Дәрсдар, Тӧ кʼәнге һати ве дәре?»

²⁶ Иса ль ԝан вәгәрʼанд у гот: «Әз рʼаст бе хельф ԝәрʼа дьбежьм, һун ль Мьн дьгәрʼьн, нә кӧ бона ԝе йәке, кӧ ԝә нишан дитьнә, ле бона ԝе йәке, кӧ ԝә жь ԝи нани хԝар у тʼер бун.

²⁷ Бона хԝарьна пʼучʼ нәхәбьтьн, ле бона ԝе хԝарьне бьхәбьтьн, йа кӧ жийина һʼәта-һʼәтайеда дьминә, кʼижане Кӧрʼе Мерьв ԝе бьдә ԝә, чьмки Бав Хԝәде мора Хԝә ль Ԝи хьстийә».

²⁸ У ԝан же пьрси: «Гәрәке әм чь бькьн, ԝәки ԝан шьхӧлед Хԝәде биньнә сери?»

²⁹ Иса ль ԝан вәгәрʼанд у гот: «Шьхӧле Хԝәде әв ә, кӧ һун баԝәрийа хԝә Ԝи биньн, Йе кӧ Әԝи шандийә».

³⁰ Ԝана сәр ве йәке жерʼа гот: «Кӧ ӧса йә Те чь нишане бьки, ԝәки әм бьбиньн у Тә баԝәр бькьн? Те чь шьхӧли бьки?

³¹ Кал у бавед мә бәрʼийеда мана хԝарьн, чаԝа кӧ һатийә ньвисаре: ‹Ԝи жь әʼзмен бона хԝарьна ԝан нан да›».

³² Иса ԝанрʼа гот: «Әз рʼаст бе хельф ԝәрʼа дьбежьм, әԝ нә кӧ Муса бу кӧ жь әʼзмен нан да ԝә, ле Баве Мьн бу. Бәле Әԝ Баве Мьн ә, кӧ ԝи нане рʼаст жь әʼзмен дьдә ԝә!

³³ Чьмки әԝ нане Хԝәде дьдә әԝ ә, кӧ жь әʼзмен те хԝаре у жийине дьдә дьнйайе».

³⁴ Ԝан ле вәгәрʼанд у готьне: «Әм хӧлам, дә һәр гав ви нани бьдә мә».

³⁵ Иса ԝанрʼа гот: «Әз ьм нане жийине. Һәр кәсе кӧ бе щәм Мьн, әԝ ԛәт бьрʼчи набә у һәр кәсе кӧ баԝәрийа хԝә Мьн бинә, тʼӧ щар тʼи набә.

³⁶ Ле чаԝа кӧ Мьн ԝәрʼа гот, ԝә Әз дитьм жи, ле һун һе баԝәр накьн.

³⁷ Әԝ һʼәмуйед кӧ Бав дьдә Мьн, ԝе бенә щәм Мьн у һәр кәсе кӧ бе щәм Мьн, Әз тʼӧ щар бәри ԝи надьм.

³⁸ Чьмки Әз жь әʼзмен һатьмә хԝаре, нә кӧ хԝәстьна Хԝә бькьм, ле хԝәстьна Ԝи, Йе кӧ Әз шандьмә.

³⁹ Хԝәстьна Йе кӧ Әз шандьмә әв ә, ԝәки Әз жь һʼәмуйед кӧ Ԝи данә Мьн тʼӧ кәси ӧнда нәкьм, ле Рʼожа Ахрәтеда жь мьрьне рʼакьм.

⁴⁰ Чьмки хԝәстьна Баве Мьн әв ә, ԝәки һәр кәсе кӧ Кӧрʼ бьбинә у баԝәрийа хԝә Ԝи бинә, жийина Ԝийә һʼәта-һʼәтайе һәбә. У Рʼожа Ахрәтеда жи Әзе ԝи жь мьрьне рʼакьм».

⁴¹ Щьһуйа һьндава Ԝида бина хԝә тәнг кьр, чьмки Ԝи гот: «Нане кӧ жь әʼзмен һатә хԝаре Әз ьм».

⁴² У дьготьн: «Нә әва Исайе кӧрʼе Усьв ә, кӧ әм де у баве Ԝи нас дькьн? Иди әва чаԝа дьбежә: ‹Әз жь әʼзмен һатьмә хԝаре›?»

⁴³ Иса щаб да у ԝанрʼа гот: «Нав һәвда нәкьнә пʼьстә-пʼьст.

⁴⁴ Тʼӧ кәс нькарә бе щәм Мьн, һʼәта Баве кӧ Әз шандьмә, ԝи бәрбь Мьн нәкʼьшинә. У Рʼожа Ахрәте Әзе ԝи жь мьрьне рʼакьм.

⁴⁵ Ль алийе ньвисаред пʼехәмбәрада һатийә ньвисаре: ‹Һʼәмуйе жь алийе Хԝәдеда бенә һинкьрьне›. Һәр кәсе кӧ жь Бав бьбьһе у һин бә ԝе бе щәм Мьн.

⁴⁶ Бь ве йәке Әз набежьм, кӧ кәсәки Бав дитийә. Әԝе кӧ жь Хԝәде йә, тʼәне Әԝи Бав дитийә.

⁴⁷ Әз рʼаст бе хельф ԝәрʼа дьбежьм, әԝе кӧ баԝәр дькә жийина ԝийә һʼәта-һʼәтайе һәйә.

⁴⁸ Әз ьм нане жийине.

⁴⁹ Кал у бавед ԝә бәрʼийеда мана хԝарьн у мьрьн.

⁵⁰ Ле әв ә әԝ нане кӧ жь әʼзмен һатийә хԝаре, ԝәки һәр кәсе кӧ же бьхԝә нәмьрә.

⁵¹ Әз ьм нане жийине кӧ жь әʼзмен һатьмә хԝаре. Кʼи кӧ жь Ви нани бьхԝә, ԝе һʼәта-һʼәтайе бьжи. Әԝ нане кӧ Әзе бона жийина дьнйайе бьдьм, әԝ бәдәна Мьн ә».

⁵² Ль сәр ве йәке щьһу һәврʼа кʼәтьнә дәʼԝе у готьн: «Әва чаԝа дькарә бәдәна Хԝә бьдә мә кӧ әм бьхԝьн?»

⁵³ Һьнге Иса ԝанрʼа гот: «Әз рʼаст бе хельф ԝәрʼа дьбежьм, һʼәта кӧ һун бәдәна Кӧрʼе Мерьв нәхԝьн у хуна Ԝи вәнәхԝьн, жийине нава ԝәда тʼӧнәбә.

⁵⁴ Йе кӧ бәдәна Мьн бьхԝә у хуна Мьн вәхԝә, ԝе жийина ԝийә һʼәта-һʼәтайе һәбә у Әзе ԝи Рʼожа Ахрәте жь мьрьне рʼакьм.

⁵⁵ Чьмки бәдәна Мьн хԝарьна рʼаст ә у Хуна Мьн жи вәхԝарьна рʼаст ә.

⁵⁶ Әԝе кӧ бәдәна Мьн дьхԝә у хуна Мьн вәдьхԝә, әԝ нава Мьнда дьминә, Әз жи нава ԝида.

⁵⁷ Чаԝа Бав, канийа жийине Әз шандьм у бь дәсте Баве Әз сах ьм, бь ви аԝайи жи йе кӧ Мьн бьхԝә, ԝе бь дәсте Мьн сах бьминә.

⁵⁸ Әв ә Әԝ нане кӧ жь әʼзмен һатийә хԝаре. Әв нә мина ԝи манайи йә, кӧ кал у бавед ԝә хԝарьн, ле мьрьн. Әԝе кӧ Ви нани бьхԝә, ԝе һʼәта-һʼәтайе бьжи».

⁵⁹ Иса әв хәбәр кʼьништеда готьн, гава Ԝи Кәфәрнаһумеда һин дькьр.

Хәбәред жийина һʼәта-һʼәтайе

⁶⁰ Жь шагьртед Ԝи гәләка гава әв хәбәр бьһистьн, готьн: «Әв чь хәбәрнә гьран ьн! Кʼи дькарә гӧһдарийа готьнед Ԝи бькә?»

⁶¹ Ле Исава әʼйан бу кӧ шагьрт ль сәр ве йәке нава һәвда дькьнә пʼьстә-пʼьст, ԝанрʼа гот: «Әв йәк ԝә пʼьшк дькә?

⁶² Ле һьнге һуне чь бежьн, һәгәр бьбиньн Кӧрʼе Мерьв рʼадьбә ԝи щийе кӧ бәре ле бу?

⁶³ Рʼӧһʼ жийине дьдә, бәдән бәрга тьштәки нагьрә. Әԝ хәбәред кӧ Мьн ԝәрʼа готьн, Рʼӧһʼ у жийин ьн.

⁶⁴ Ле нава ԝәда һьнәк һәнә баԝәр накьн». Иса һе сәре серида заньбу кӧ кʼи баԝәр накә у кʼи йә әԝи кӧ ԝе нәмамийа Ԝи бькә.

⁶⁵ У Ԝи гот: «Бона ве йәке Мьн ԝәрʼа гот: Кәсәк нькарә бе щәм Мьн һʼәта кӧ әԝ жь алийе Баведа жерʼа нәһатьбә дайине».

⁶⁶ Бона ве йәке жь шагьртед Ԝи гәләк пашда чун у иди тʼәви Ԝи нәдьгәрʼийан.

⁶⁷ Һьнге Иса жь һәр донздәһа пьрси: «Дьбә кӧ һун жи дьхԝазьн һәрʼьн?»

⁶⁸ Шьмһʼун-Пәтрус ле вәгәрʼанд у готе: «Хӧдан, әме һәрʼьнә щәм кʼе? Готьнед жийина һʼәта-һʼәтайе щәм Тә нә.

⁶⁹ У мә баԝәр кьрийә у әм заньн кӧ Тӧ йи Пирозе Хԝәде».

⁷⁰ Иса ль ԝан вәгәрʼанд у гот: «Чьма Мьн һун һәр донздәһ нәбьжартьн? Ле бәле йәк жь ԝә щьн ә».

⁷¹ Ԝи әв йәк бона Щьһудайе кӧрʼе Шьмһʼуне Исхәрйоти дьгот, чьмки рʼаст ә әԝ йәк жь һәр донздәһа бу, ле диса ԝе нәмамийа Иса бькьра.