Yûhenna 21 - Пәймана Ну (Инщил)

Иса у гьртьна мәʼсийа

¹ Пәй ве йәкерʼа Иса диса Хԝә ль дәве гола Тәбәрийайе нишани шагьртед Хԝә кьр. Әԝ бь ви аԝайи ԛәԝьми:

² Шьмһʼун-Пәтрус, Тʼумайе кӧ жерʼа дьготьн «Һәвал-щеԝи», Натанйеле жь Ԛанайа Щәлиле, кӧрʼед Зәбәди у дӧ шагьртед Исайә дьн һәврʼа бун.

³ Шьмһʼун-Пәтрус ԝанрʼа гот: «Әз дьчьм кӧ мәʼсийа бьгьрьм». Ԝана ԝирʼа гот: «Әм жи тʼәви тә тен». Һьнге әԝ рʼабун чун кʼәтьнә ԛәйькәке, ле ԝе шәве тʼӧ тьшт нәгьртьн.

⁴ Сьбәһ сафи бу, Иса ль дәве голе сәкьни, ле шагьрта ньзаньбу кӧ Әԝ Иса йә.

⁵ Һьнге Иса готә ԝан: «Лаԝькно! Ԝә тьшт нәгьртийә?» Ԝана ле вәгәрʼанд у готьне: «На».

⁶ Әԝи готә ԝан: «Тʼорʼе бавежьнә алийе ԛәйькейи рʼасте һуне бьгьрьн». Ԝана жи тʼорʼ авите у жь дәст гәләкбуна мәʼсийа нькарьбун кӧ тʼорʼ бькʼьшандана.

⁷ Һьнге ԝи шагьрте кӧ Иса же һʼьз дькьр Пәтрусрʼа гот: «Әԝ Хӧдан ә!» Гава Шьмһʼун-Пәтрус бьһист кӧ әԝ Хӧдан ә, кʼьнща хԝә авитә сәр хԝә, чьмки әԝ тәʼзи бу у хԝә авитә голе.

⁸ Ле шагьртед майин тʼорʼ мәʼсийава кʼьшандьн у пе ԛәйьке гьһиштьнә бәже, чьмки әԝ нә дур бун, ле ԛаси сәд метьри дури бәже бун.

Иса тʼәви шагьртед хԝә нан дьхԝә

⁹ Гава әԝ дәркʼәтьнә бәже, ԝьр агьре жь кʼомьре вехьсти дитьн, мәʼси ль сәр у нан жи ль бәр.

¹⁰ Иса ԝанрʼа гот: «Һьнәк жь ԝан мәʼсийед кӧ ԝә һежа гьртьнә биньн».

¹¹ Шьмһʼун-Пәтрус жи кʼәтә ԛәйьке у тʼорʼ кʼьшандә бәже, йа кӧ сәд пенщи се мәʼсийед гьр теда бун. Һаԛас гәләк бун жи, ле диса тʼорʼ нәԛәльши.

¹² Иса ԝанрʼа гот: «Ԝәрьн тәʼште бьхԝьн». Жь шагьрта тʼӧ кәси жи тӧрӧш нәкьр кӧ же бьпьрсийа: «Тӧ кʼи йи?» Чьмки ԝана заньбу кӧ Әԝ Хӧдан ә.

¹³ Һьнге Иса незик бу, әԝ нан һьлда да ԝан у ӧса жи мәʼси.

¹⁴ Әва иди щара сьсийа бу кӧ Иса пәй мьрьн-рʼабуна Хԝәрʼа шагьртед Хԝәва хӧйа бу.

Иса у Пәтрус

¹⁵ Гава ԝан тәʼште хԝар, Иса жь Шьмһʼун-Пәтрус пьрси: «Шьмһʼуне кӧрʼе Йуһʼәнна, тӧ Мьн гәләки һʼьз дьки, йан әԝ Мьн гәләки һʼьз дькьн?» Пәтрус жерʼа гот: «Бәле Хӧдан, Тӧ зани кӧ әз Тә һʼьз дькьм». Иса ԝирʼа гот: «Бәрхед Мьн бьчʼеринә».

¹⁶ Иса щара дӧда ԝирʼа гот: «Шьмһʼуне кӧрʼе Йуһʼәнна, тӧ Мьн һʼьз дьки?» Әԝи гот: «Бәле Хӧдан, Тӧ зани әз Тә һʼьз дькьм». Иса жерʼа гот: «Шьвантийе пәзед Мьн бькә».

¹⁷ Иса щара сьсейа жь Пәтрус пьрси: «Шьмһʼуне кӧрʼе Йуһʼәнна, тӧ Мьн һʼьз дьки?» Һьнге дьле Пәтрус ешийа кӧ Ԝи се щара ԝирʼа гот: «Тӧ Мьн һʼьз дьки?» у гот: «Хӧдан, Тӧ һәр тьшти зани, Тӧ зани кӧ әз Тә һʼьз дькьм». Иса ԝирʼа гот: «Пәзед Мьн бьчʼеринә.

¹⁸ Әз рʼаст бе хельф тәрʼа дьбежьм, гава кӧ тӧ хорт буйи, тә хԝәха ԛайиша хԝә гьредьда у кʼӧда тә дьхԝәст дьчуйи. Ле гава кӧ тӧ кал би, те дәстед хԝә бьльнд ки у йәки дьне пьшта тә гьредә у тә бьбә ԝи щийе кӧ тӧ нахԝази һәрʼейи».

¹⁹ Ԝи әв йәк гот, да әʼйанкьрьне кӧ әԝе бь чь щурʼә мьрьне рʼумәте бьдә Хԝәде. Пәй ве йәкерʼа Ԝи Пәтрусрʼа гот: «Пәй Мьн ԝәрә».

Иса у шагьрте һʼьзкьри

²⁰ Пәтрус пьшт хԝәва зьвьрʼи, дит әԝ шагьрте кӧ Иса же һʼьз дькә пәй ԝан те. Әва әԝ шагьрт бу, йе кӧ шива евареда хԝә авитьбу һʼәмеза Иса у готьбу: «Хӧдан әԝ кʼи йә, кӧ ԝе нәмамийа Тә бькә?»

²¹ Пәтрус гава әԝ дит, жь Иса пьрси: «Хӧдан, ле ижар әве чаԝа бә?»

²² Иса ԝирʼа гот: «Һәгәр Әз бьхԝазьм кӧ әԝ бьминә һʼәта Әз бем, чи тәрʼа йә? Тӧ пәй Мьн ԝәрә!»

²³ Әва готьна нава хушк-бьрада бәла бу, йане әԝ шагьрте нәмьрә. Ле бәле Иса бона ԝи нәготьбу, кӧ әԝ намьрә, ле готьбу: «Һәгәр Әз бьхԝазьм кӧ әԝ бьминә һʼәта Әз бем, чи тәрʼа йә?»

²⁴ Әва әԝ шагьрт ә, йе кӧ бона ван йәка шәʼдәтийе дьдә, ӧса жи әв йәк ньвисин. Әм заньн кӧ шәʼдәтийа ԝи рʼаст ә.

²⁵ Һе гәләк кьред дьн жи һәнә, йед кӧ Иса кьрьнә. Һәгәр әԝ бь һур-гьли бьһатана ньвисаре, бь тʼәхмина мьн, әԝ кʼьтебед ньвисар ԝе дьнйайеда щи нәбуна.