Yûhenna 16 - Пәймана Ну (Инщил)

¹ Мьн әв йәкана ԝәрʼа готьн, ԝәки һун пʼьшк нәбьн.

² Әԝе ԝә жь кʼьништа дәрхьнә дәрва. Ԝәхте жи бе, ԝәки кʼи кӧ ԝә бькӧжә жи, ԝе бьфькьрә йанчийә әԝ Хԝәдерʼа ԛӧльх дькә.

³ Ԝе ван тьшта бькьн, чьмки ԝана нә Бав нас кьр у нә жи Әз нас кьрьм.

⁴ Ле бәле Мьн әв йәкана ԝәрʼа готьн, ԝәки гава әԝ ԝәхт бе, һун биньнә бира хԝә кӧ Мьн әв йәкана ԝәрʼа готьнә. Мьн сәре серида әв тьшт ԝәрʼа нәготьн, чьмки Әз тʼәви ԝә бум.

Кʼаре Рʼӧһʼе Пироз

⁵ Ле ньһа Әз дьчьмә щәм Йе кӧ Әз шандьмә у жь ԝә тʼӧ кәс жь Мьн напьрсә: ‹Те кʼӧда һәрʼи?›

⁶ Мьн кӧ әв йәкана ԝәрʼа готьн, ләма дьле ԝә кʼәсәрева тʼьжи буйә.

⁷ Ле бәле Әз рʼастийе ԝәрʼа дьбежьм, бона ԝә һе рʼьнд ә кӧ Әз һәрʼьм. Һәгәр Әз нәчьм, Пьштован ԝе нәйе щәм ԝә, ле һәгәр Әз һәрʼьм, Әзе Ԝи бьшиньмә щәм ԝә.

⁸ Гава Әԝ бе, Әԝе гӧнед мәрьвед дьне бьдә рʼуйе ԝан, һәԛи-нәһәԛийе ль бәр ԝан вәкә у диԝана Хԝәде ԝанва әʼйан кә.

⁹ Бона гӧна ԝе әʼйан кә, чьмки әԝана баԝәрийа хԝә Мьн найньн.

¹⁰ Бона һәԛи-нәһәԛийе ԝе әʼйан кә, чьмки Әз дьчьмә щәм Баве Хԝә у иди һуне Мьн нәбиньн.

¹¹ Бона диԝана Хԝәде ԝе әʼйан кә, чьмки диԝана сәрԝере ве дьнйайе буйә.

¹² Һе гәләк тьшт һәнә кӧ Әз ԝәрʼа бежьм, ле ньһа һун нькарьн ԝан бьбьн.

¹³ Ле гава әԝ Рʼӧһʼе Рʼастийе бе, Әԝе ԝә бәрбь тʼәмамийа рʼастийе бьбә. Чьмки Әԝе нә кӧ хԝәсәрихԝә хәбәр дә, ле чь кӧ бьбьһе, Әԝе ԝе йәке бежә у тьштед кӧ һе нәԛәԝьминә ԝе ԝәрʼа гьли кә.

¹⁴ Әԝе рʼумәта наве Мьн бьльнд кә, чьмки Әԝе жь Мьн бьстинә у ԝәрʼа гьли кә.

¹⁵ Һәр тьштед Баве кӧ һәнә әԝ йед Мьн ьн. Ләма Мьн гот, кӧ Рʼӧһʼе жь Мьн бьстинә у ԝәрʼа гьли кә.

Бәрхԝәкʼәтьн у шабун

¹⁶ Һьнәки шунда һуне Мьн нәбиньн у диса һьнәки шунда һуне Мьн бьбиньн».

¹⁷ Һьнге шагьртед Ԝи һьнәка һәвдӧрʼа готьн: «Әва чь готьн ә кӧ Әԝ мәрʼа дьбежә? ‹Һьнәки шунда һуне Мьн нәбиньн› у диса ‹һьнәки шунда һуне Мьн бьбиньн›. Дьбежә жи: ‹Чьмки Әз дьчьмә щәм Баве Хԝә›?»

¹⁸ У ԝана дьгот: «Әв ‹һьнәк ԝәхт› кӧ дьбежә, әԝ чь йә? Әм фәʼм накьн кӧ Әԝ чь дьхԝазә бежә».

¹⁹ Иса заньбу кӧ әԝ дьхԝазьн же бьпьрсьн, һьнге ԝанрʼа гот: «Һун бона ве готьна Мьн жь һәв дьпьрсьн, кӧ Мьн гот: ‹Һьнәки шунда һуне Мьн нәбиньн› у диса ‹һьнәки шунда һуне Мьн бьбиньн›?

²⁰ Әз рʼаст бе хельф ԝәрʼа дьбежьм, һуне шин у гьри бьн, ле дьнйайе ша бә, һуне бәр хԝә кʼәвьн, ле бәрхԝәкʼәтьна ԝәйе бьбә шабун.

²¹ Гава жьнәк дькʼәвә бәр зарʼе, щәфе дькʼьшинә, чьмки сьһʼәта ԝе перʼа гьһиштийә. Ле гава зарʼ жерʼа дьбә, иди щәфа найе бире жь дәст ԝе шабуне, кӧ мәрик һатә дьне.

²² Рʼаст ә һун жи ньһа бәр хԝә дькʼәвьн, ле Әзе ԝә диса бьбиньм у дьле ԝәйе бь әшԛ у шабунева тʼьжи бә у тʼӧ кәсе ԝе шабуне жь ԝә нәстинә.

²³ Әԝе рʼоже һуне жь Мьн тʼӧ тьшти нәпьрсьн. Әз рʼаст бе хельф ԝәрʼа дьбежьм, кӧ һун пе наве Мьн чь жь Баве бьхԝазьн, Әԝе бьдә ԝә.

²⁴ Һʼәта ньһа ԝә пе наве Мьн тʼӧ тьшт нәхԝәстийә. Бьхԝазьн, һуне бьстиньн, ӧса ԝәки шабуна ԝә тʼәмам бә.

Мьн дьнйа бьндәст кьр

²⁵ Мьн әв йәкана ԝәрʼа бь мәсәла готьн. Ԝәхте бе Әзе иди бь мәсәла ԝәрʼа хәбәр нәдьм, ле ашкәрә дәрһәԛа Баведа ԝәрʼа бежьм.

²⁶ Ԝе рʼоже һуне пе наве Мьн бьхԝазьн. Әз ԝәрʼа набежьм кӧ Әзе бона ԝә һиви жь Баве бькьм.

²⁷ Бав Хԝәха ԝә һʼьз дькә, чьмки ԝә Әз һʼьз кьрьмә у баԝәр кьрийә кӧ Әз жь щәм Хԝәде һатьмә.

²⁸ Әз жь Баве ԛәтийам у һатьмә дьнйайе. Диса Әз дьнйайе дьһельм у дьчьмә щәм Баве».

²⁹ Шагьртед Ԝи готьне: «Ва йә Тӧ ньһа ашкәрә хәбәр дьди, нә кӧ пе мәсәла.

³⁰ Ньһа әм фәʼм дькьн, кӧ Тӧ һәр тьшти зани у нә һʼәԝщә йә кӧ жь Тә бьпьрсьн, Тӧ пешда щабе дьди. Бона ве йәке әм баԝәр дькьн, кӧ Тӧ жь щәм Хԝәде һатийи».

³¹ Иса ԝанрʼа гот: «Ньһа һун баԝәр дькьн?

³² Ва ԝәхте бе у һатийә жи, кӧ һуне бәла-бәлайи бьн, һәр кәсе һәрʼә щийе хԝә у Мьн тʼәне бьһелә. Ле Әз нә тʼәне мә, чьмки Бав тʼәви Мьн ә.

³³ Мьн әв йәкана ԝәрʼа готьн, ԝәки пе Мьн һун хԝәйе әʼдьлайийе бьн. Һуне дьнйайеда тәнгасийе бьбиньн, ле мерхас бьн! Мьн дьнйа кьрә бьндәсте Хԝә».