Yûhenna 14 - Пәймана Ну (Инщил)

Рʼийа кӧ дьбә бәрбь Баве

¹ Бьра дьле ԝә нәԛьлԛьлә. Баԝәрийа хԝә Хԝәде биньн у баԝәрийа хԝә Мьн жи биньн.

² Мала Баве Мьнда гәләк щийед майине һәнә, Әз ньһа дьчьм ԝәрʼа щи һазьр кьм. Һәгәр ӧса нибуйа, Мьн ԝәрʼа нәдьгот?

³ Гава Әз һәрʼьм у ԝәрʼа щи һазьр кьм, Әзе диса бем у ԝә бьбьмә щәм Хԝә, ԝәки Әз ль кʼӧ бьм, һун жи ль ԝе дәре бьн.

⁴ Һун рʼийа ԝи щийе кӧ Әз дьчьме заньн».

⁵ Тʼума жерʼа гот: «Хӧдан, әм ньзаньн Тӧ кʼӧда дьчи, әме чаԝа рʼе бьзаньбьн?»

⁶ Иса ԝирʼа гот: «Әз ьм, рʼе, рʼасти у жийин. Тʼәне пе Мьн йәк дькарә бе щәм Баве.

⁷ Һәгәр ԝә Әз нас кьрьмә, һуне Баве Мьн жи нас бькьн. Аԝа жь вьр шунда һун Ԝи нас дькьн у ԝә Әԝ дитийә».

⁸ Филипо жерʼа гот: «Хӧдан, кʼа Баве нишани мә кә, бәси мә йә!»

⁹ Иса жерʼа гот: «Филипо! Һаԛас ԝәхт Әз тʼәви ԝә мә у һе тӧ Мьн нас наки? Йе кӧ Әз дитьмә, Бав дитийә. Тӧ чаԝа дьбежи: ‹Баве нишани мә кә›?

¹⁰ Тӧ баԝәр наки кӧ Әз нава Баведа мә у Бав нава Мьнда йә? Әв хәбәред кӧ Әз ԝәрʼа дьбежьм, нә кӧ хԝәсәрихԝә дьбежьм, ле әԝ Баве кӧ нава Мьнда дьминә, Әԝ ә кӧ йа Хԝә дькә.

¹¹ Мьн баԝәр бькьн, кӧ Әз нава Баведа мә у Бав жи нава Мьнда йә. Ле һәгәр на, һәма пе ван кьред Мьн баԝәр бькьн.

¹² Әз рʼаст бе хельф ԝәрʼа дьбежьм, әԝе кӧ баԝәрийа хԝә Мьн бинә, әԝ кьред кӧ Әз дькьм, әԝе хԝәха жи бькә. У жь ван кьра мәстьр жи ԝе бькә, чьмки Әз дьчьмә щәм Баве Хԝә.

¹³ Пе наве Мьн һун чь бьхԝазьн, Әзе бькьм, ԝәки Бав пе Кӧрʼ бе рʼумәткьрьне.

¹⁴ Һәгәр һун пе наве Мьн тьштәки бьхԝазьн Әзе бькьм.

Иса соз дьдә кӧ Рʼӧһʼе Пироз бьшинә

¹⁵ Һәгәр һун Мьн һʼьз дькьн, һуне тʼәмийед Мьн хԝәй кьн.

¹⁶ Әзе жи жь Баве һиви кьм у Әԝе Пьштованәки дьн бьдә ԝә, ԝәки һʼәта-һʼәтайе тʼәви ԝә бьминә.

¹⁷ Әԝ ә әԝ Рʼӧһʼе кӧ рʼастийе әʼлам дькә у дьнйа нькарә Ԝи ԛәбул кә, чьмки нә Ԝи дьбинә у нә жи Ԝи нас дькә. Ле һун Ԝи нас дькьн, чьмки Әԝ тʼәви ԝә дьминә у ԝе нава ԝәда бә.

¹⁸ Әз ԝә сеԝи наһельм, Әзе диса сәр ԝәда бем.

¹⁹ Һьнәки шунда иди дьнйайе Мьн нәбинә, ле һуне Мьн бьбиньн. Чьмки Әз дьжим, һуне жи бьжин.

²⁰ Ԝе рʼоже һуне бьзаньбьн кӧ Әз нава Баве Хԝәда мә, һун нава Мьнда нә у Әз жи нава ԝәда мә.

²¹ Әԝе кӧ тʼәмийед Мьн ԛәбул дькә у ԝан хԝәй дькә, әԝ ә йе кӧ Мьн һʼьз дькә. У әԝе кӧ Мьн һʼьз дькә, әԝе жь алийе Баве Мьнда бе һʼьзкьрьне. Әзе жи ԝи һʼьз бькьм у Хԝә ԝива әʼйан кьм».

²² Щьһуда, нә йе Исхәрйоти готә Ԝи: «Хӧдан, әԝе чаԝа бә, кӧ Те Хԝә мәва әʼйан ки, ле дьнйайева на?»

²³ Иса ле вәгәрʼанд у готе: «Һәр кәсе кӧ Мьн һʼьз бькә, ԝе готьна Мьн хԝәй кә, Баве Мьне жи ԝи һʼьз бькә у Әме бенә щәм ԝи, тʼәви ԝи бьминьн.

²⁴ Әԝе кӧ Мьн һʼьз накә, әԝ готьнед Мьн хԝәй накә. Әве готьна кӧ һун дьбьһен нә йа Мьн ә, ле йа Баве Мьн ә, кӧ Әз шандьмә.

²⁵ Һәла һе кӧ Әз ль щәм ԝә мә, Мьн әв йәкана ԝәрʼа готьн.

²⁶ Ле Пьштован, аԝа готи Рʼӧһʼе Пироз, кӧ Бав ԝе бь наве Мьн бьшинә, Әԝе ԝә һини һʼәму тьшти кә у һәр тьштед кӧ Мьн ԝәрʼа готьнә, ԝе бинә бира ԝә.

²⁷ Әз әʼдьлайийе ԝәрʼа дьһельм, ԝе әʼдьлайийа Хԝә дьдьмә ԝә. Әз ӧса надьм чаԝа кӧ дьнйа дьдә ԝә. Бьра дьле ԝә нәԛьлԛьлә у нәтьрсьн!

²⁸ Ԝә бьһист кӧ Мьн ԝәрʼа гот: ‹Әзе һәрʼьм, ле диса сәр ԝәда бем!› Һәгәр ԝә Әз һʼьз бькьрама, һуне ша бьбуна кӧ Әз дьчьмә щәм Баве, чьмки Бав сәр Мьнрʼа йә.

²⁹ У ньһа әв йәкана Мьн бәри ԛәԝьмандьне ԝәрʼа готьн, ԝәки гава әԝ йәк бьԛәԝьмьн, һун баԝәр бькьн.

³⁰ Иди Әзе тʼәви ԝә гәләки хәбәр нәдьм, чьмки ва йә сәрԝере ве дьнйайе те. Һʼӧкӧме ԝи ԛәт сәр Мьн тʼӧнә,

³¹ ле бьра дьнйа бьзаньбә ԝәки Әз Баве һʼьз дькьм у Баве чаԝа тʼәми ль Мьн кьрийә Әз ӧса дькьм. Рʼабьн, әм жь вьр һәрʼьн.