Yûhenna 13 - Пәймана Ну (Инщил)

Иса ньгед шагьрта дьшо

¹ Бәри Щәжьна Дәрбазбуне, Иса заньбу кӧ сьһʼәта Ԝи перʼа гьһиштийә кӧ жь ве дьнйайе дәре у һәрʼә щәм Баве. Әԝи һʼәмуйед Хԝәйә кӧ ве дьнйайеда һʼьз кьрьбун, һʼәта дәрәща һәрә бьльнд жи әԝ һʼьз кьрьн.

² Ԝәхте шивхԝарьне, мирещьн ԛәлпе хьраб авитә дьле Щьһудайе кӧрʼе Шьмһʼуне Исхәрйоти, кӧ нәмамийа Иса бькә.

³ Иса заньбу кӧ Баве һәр тьшт дайә дәсте Ԝи, Әԝ жь щәм Хԝәде һатийә у ԝе диса вәгәрʼә щәм Хԝәде.

⁴ Һьнге Әԝ жь сәр шиве рʼабу, пʼоте Хԝә дани алики у пʼешгирәк һьлда ль пьшта Хԝә гьреда.

⁵ Паше ав кьрә тʼәште у дәстпекьр ньгед шагьртед Хԝә шуштьн у бь пʼешгира гьредайи зьһа кьрьн.

⁶ Гава дор гьһиштә Шьмһʼун-Пәтрус, әԝи готе: «Хӧдан, Те ньгед мьн бьшойи?»

⁷ Иса ле вәгәрʼанд у готе: «Әз ньһа чь дькьм тӧ фәʼм наки, ле паше те фәʼм бьки».

⁸ Пәтрус жерʼа гот: «Тʼӧ щар Те ньгед мьн нәшойи!» Иса ле вәгәрʼанд у готе: «Һәгәр Әз ньгед тә нәшом, пʼара тә ԝе тʼәви Мьн тʼӧнәбә».

⁹ Шьмһʼун-Пәтрус Ԝирʼа гот: «Хӧдан, кӧ ӧса йә нә тʼәне ньгед мьн, ле дәст у сәре мьн жи бьшо!»

¹⁰ Иса готе: «Әԝе кӧ һатийә шуштьне, пештьри ньга, ԝәки майин нә һʼәԝщә йә дәрәкә дьн бе шуштьне. Әԝ хԝәха тʼәмам-пева паԛьж ә. Һун паԛьж ьн, ле нә кӧ һʼәму».

¹¹ Чьмки Иса заньбу кʼи ԝе нәмамийа Ԝи бькә, бона ԝе йәке гот: «Һун һʼәму нә паԛьж ьн».

¹² Гава ньгед ԝан шуштьн, пʼоте Хԝә авитә сәр Хԝә у диса ль сәр сьфре рʼуньшт. Жь ԝан пьрси: «Гәло һун заньн кӧ Мьн бона ԝә чь кьр?

¹³ Һун Мьн Дәрсдар у Хӧдан һʼәсаб дькьн, һун рʼаст дькьн, Әз һәма ӧса жи һәмә.

¹⁴ Аԝа һәгәр Мьн бь ве Хӧдан у Дәрсдарийа Хԝәва ньгед ԝә шуштьн, гәрәке һун жи ньгед һәвдӧ бьшон.

¹⁵ Мьн нәхшәк нишани ԝә кьр, ԝәки чаԝа Мьн бона ԝә кьр, һун жи ӧса бькьн.

¹⁶ Әз рʼаст бе хельф ԝәрʼа дьбежьм, хӧлам жь ахайе хԝә нә мәстьр ә, нә жи йе кӧ һатийә шандьне жь йе кӧ әԝ шандийә мәстьр ә.

¹⁷ Һәгәр һун ве йәке заньн, һуне хԝәзьли бьн һәгәр бьԛәдиньн.

Иса гьртьна хԝә дьдә әʼйанкьрьне

¹⁸ Әз бона ԝә һʼәмуйа набежьм, чьмки Әз заньм Мьн кʼижан бьжартьнә. Ле гәрәке ньвисар бе сери: ‹Йе кӧ нане Мьн хԝар пʼәһʼин авитә Мьн›.

¹⁹ Әз ньһава, һе бәри ԛәԝьмандьне ван тьшта ԝәрʼа дьбежьм, ԝәки, гава бьԛәԝьмьн һун баԝәр бькьн, кӧ ӘЗ ӘԜ ЬМ.

²⁰ Әз рʼаст бе хельф ԝәрʼа дьбежьм, әԝе кӧ ԝи ԛәбул кә, кʼижани кӧ Әз дьшиньм, әԝ Мьн ԛәбул дькә у әԝе кӧ Мьн ԛәбул дькә, Йе кӧ Әз шандьмә ԛәбул дькә».

²¹ Иса гава әва йәка гот, рʼӧһʼда гәләки ԛьлԛьли, Ԝи ашкәрә шәʼдәти да у гот: «Әз рʼаст бе хельф ԝәрʼа дьбежьм, йәки жь ԝә ԝе нәмамийа Мьн бькә».

²² Шагьрта шашмайи ль һәвдӧ ньһерʼи, гәло әԝ бона кʼе дьбежә.

²³ Йәки жь шагьртед Ԝи, йе кӧ Иса же һʼьз дькьр, хԝә авитьбу һʼәмеза Иса.

²⁴ Шьмһʼун-Пәтрус ԝирʼа бь чʼәʼва дькьр кӧ бьпьрсә: «Кʼа Әԝ бона кʼе дьбежә».

²⁵ Әԝи жи хԝә да бәр синге Иса пьрси: «Хӧдан, әԝ кʼи йә?»

²⁶ Иса щаб да у гот: «Әԝ ә, йе кӧ Әз ви пәʼрийе нан хԝарьнеда кьм бьдьме». У пәʼрийе нан хԝарьнеда кьр, да Щьһудайе кӧрʼе Шьмһʼуне Исхәрйоти.

²⁷ Әԝи һәма чаԝа пәʼри жь дест гьрт, мирещьн кʼәтә нава ԝи. Иса ԝирʼа гот: «Те чь бьки зу бькә».

²⁸ Ле йед кӧ ль сәр сьфре рʼуньштьбун, тʼӧ кәси фәʼм нәкьр, кӧ Әԝи чьма ԝирʼа аһа гот.

²⁹ Кʼиське пʼәра кӧ щәм Щьһуда бу, ләма һьнәка тʼьре, кӧ Иса ԝирʼа дьбежә: «Тьштед кӧ щәжьнеда мәрʼа лазьм ьн бькʼьрʼә», йан жи «тьштәки бьдә бәләнгаза».

³⁰ Әԝи жи гава әԝ пәʼри һьлда, перʼа-перʼа дәркʼәтә дәрва. Иди шәв бу.

Тʼәмийа ну: Жь һәвдӧ һʼьз бькьн

³¹ Гава әԝ дәркʼәтә дәрва, Иса гот: «Ньһа Кӧрʼе Мерьв һатә рʼумәткьрьне у Хԝәде жи бь Ԝи һатә рʼумәткьрьне.

³² Һәгәр Хԝәде пе Ԝи һатә рʼумәткьрьне, Хԝәде жи ԝе пе Хԝә Ԝи рʼумәт кә у зутьре ԝе Ԝи рʼумәт кә.

³³ Лаԝно! Әз гәләк ԝәхт тʼәви ԝә наминьм. Һуне ль Мьн бьгәрʼьн, ле ньһа Әз ԝәрʼа дьбежьм, чаԝа кӧ Мьн щьһуйарʼа жи гот, һун нькарьн бенә ԝи щийе кӧ Әз дьчьме.

³⁴ Әз тʼәмикә ну дьдьмә ԝә: Һәвдӧ һʼьз бькьн. Чаԝа кӧ Мьн һун һʼьз кьрьн, һун жи ӧса һәвдӧ һʼьз бькьн.

³⁵ Бь ве йәке һʼәмуйе заньбьн һун шагьртед Мьн ьн, һәгәр һун һәвдӧ һʼьз бькьн».

Иса дәрһәԛа инкʼарийа Пәтрусда дьбежә

³⁶ Шьмһʼун-Пәтрус готә Ԝи: «Хӧдан, Те кʼӧда һәрʼи?» Иса ле вәгәрʼанд у готе: «Ԝи щийе кӧ Әз дьчьме, тӧ ньһа нькари пәй Мьн бейи, ле паше те пәй Мьн бейи».

³⁷ Пәтрус готә Ԝи: «Хӧдан, чьма әз ньһа нькарьм пәй Тә бем? Әзе әʼмьре хԝә жи бона Тә бьдьм».

³⁸ Иса ле вәгәрʼанд у готе: «Те әʼмьре хԝә бона Мьн бьди? Әз рʼаст бе хельф тәрʼа дьбежьм, һе бәри бангдана дик те се щара Мьн инкʼар ки.