Yûhenna 12 - Пәймана Ну (Инщил)

Иса Бәйтанйайеда те рʼункьрьне

¹ Шәш рʼож бәри Щәжьна Дәрбазбуне, Иса һатә Бәйтанйайе, ԝи щийе кӧ Лазар ле дьма, йе кӧ Иса әԝ жь нав мьрийа рʼакьрьбу.

² Ль ԝе дәре ԝана ԛәдьрәк жерʼа кьрьн. Мәртʼайе хьзмәткʼари дькьр, Лазар жи тʼәви Иса нава ԝанда ль сәр сьфре рʼуньшти бу.

³ Һьнге Мәрйәме литьрәки рʼомайи бь рʼуне нардейи сафи у бьһа һьлда, сәр ньгед Исада кьр у пе пʼорʼе хԝә ньгед Ԝи зьһа кьрьн. Бина рʼуне нарде мал һьлда.

⁴ Ле жь шагьртед Ԝи йәки, Щьһудайе Исхәрйоти, йе кӧ ԝе паше нәмамийа Ԝи бькьра гот:

⁵ «Чьма әв рʼуне нарде сесьд зиви нәһатә фьротане, кӧ ль бәләнгаза бьһата бәлакьрьне?»

⁶ Әԝи әв йәк дьгот, нә кӧ хәма ԝи бәләнгаз бун, ле чьмки әԝ дьз бу, кʼиське пʼәра щәм ԝи бу у чь кӧ дькʼәте, әԝи же дьчʼопанд.

⁷ Һьнге Иса готә ԝи: «Жь ԝе кʼӧлфәте вәгәрʼә. Иди чьма ви рʼуни һʼәта рʼожа дәфьнкьрьна Мьн хԝәй кә?

⁸ Фәԛире һәр гав тʼәви ԝә бьн, ле Әзе һәр гав тʼәви ԝә нибьм».

Шеԝьра кӧштьна Лазар

⁹ Жь щьһуйа гәләка бьһист кӧ Иса ль ԝе дәре йә һатьн. Әԝ нә кӧ тʼәне бона Иса һатьн, ле ԝәки Лазаре кӧ жь нав мьрийа рʼакьрийә жи бьбиньн.

¹⁰ Һьнге сәрәкед кʼаһина шеԝьрин кӧ Лазар жи бькӧжьн,

¹¹ чьмки рʼуйе ԝида гәләк щьһу дьчун баԝәрийа хԝә Иса данин.

Иса бь рʼумәт дькʼәвә Оршәлиме

¹² Рʼожа дьне әʼлаләтәкә гьран кӧ һатьбу щәжьне, гава бьһист кӧ Иса те Оршәлиме,

¹³ ԝана чʼьԛьлед хӧрме һьлдан чунә пешийа Ԝи у кьрьнә ԛирʼин: «Һосанна! Бьмбарәк ә Әԝе кӧ бь наве Хӧдан те, Пʼадше Исраеле!»

¹⁴ Иса щәʼшькәк дит у ле сийар бу, чаԝа ньвисар ә:

¹⁵ «Нәтьрсә бажаре Сийоне. Ва йә Пʼадше тә те, ль щәʼшька кʼәре сийар буйи».

¹⁶ Шагьртед Ԝи пешийе әва йәка фәʼм нәкьрьн, ле гава Иса кʼәтә рʼумәта Хԝә, һьнге һатә бира ԝан, кӧ әв йәк бона Ԝи һатьбу ньвисаре у бона Ԝи әва йәка кьрьн.

¹⁷ Әԝ щьмәʼта кӧ һьнге тʼәви Ԝи бу, гава Ԝи Лазар жь мьрьне рʼакьр у әʼмьр кьр кӧ жь горʼе дәре, шәʼдәтийа ԝе йәке дьда.

¹⁸ Бона ве йәке щьмәʼт пешийа Ԝида чу, чьмки ԝана бьһистьбу кӧ Әԝи әва нишана кьрийә.

¹⁹ Ферьсийа жи һәврʼа гот: «Һун дьбиньн әва йәка жь ԛәԝата мә дәр ә. Ва тʼәмамийа дьнйайе пәй Ԝи чу!»

Һьнәк йунан ль Иса дьгәрʼьн

²⁰ Нав ԝанда чәнд йунан жи һәбун, кӧ бона һʼәбандьне щәжьнеда һәвраз чубунә Оршәлиме.

²¹ Әвана һатьнә щәм Филипойе жь бажаре Бәйтсайда Щәлиле һиви же кьрьн у готьне: «Әм хӧлам, әм дьхԝазьн Иса бьбиньн».

²² Филипо чу әва йәка Әндраԝьсрʼа гот, Әндраԝьс у Филипо жи чун Исарʼа готьн.

²³ Иса ль ԝан вәгәрʼанд у гот: «Әԝ сьһʼәта кӧ Кӧрʼе Мерьв ԝе бе рʼумәткьрьне перʼа гьһишт.

²⁴ Әз рʼаст бе хельф ԝәрʼа дьбежьм, һәгәр һʼәба геньм нәкʼәвә әʼрде у нәмьрә, әԝе тʼәне бьминә, ле һәгәр әԝ бьмьрә, ԝе гәләк бәр бьдә.

²⁵ Йе кӧ әʼмьре хԝә һʼьз дькә, әԝе ӧнда кә, ле әԝе кӧ ль ве дьнйайе дьжәнә әʼмьре хԝә, әԝ ԝи бона жийина һʼәта-һʼәтайе хԝәй дькә.

²⁶ Әԝе кӧ бьхԝазә Мьнрʼа хьзмәткʼарийе бькә, бьра пәй Мьн бе. Әз ль кʼӧ дәре бьм, хьзмәткʼаре Мьн жи ԝе ль ԝе дәре бә. Һәгәр йәк Мьнрʼа хьзмәткʼарийе дькә, Бав жи ԝе ԛәдьре ԝи бьгьрә.

Иса мьрьна Хԝә әʼлам дькә

²⁷ Ньһа агьр дьле Мьн кʼәтийә. Әз чь бежьм? Бежьм: ‹Баво, Мьн жь ве сьһʼәте хьлаз кә›? Нә Әз бона ве сьһʼәте һатьмә?

²⁸ Баво, наве Хԝә бьльнд кә». Һьнге дәнгәк жь әʼзмен һат: «Мьн бьльнд кьр у Әзе диса бьльнд кьм!»

²⁹ Әԝ әʼлаләта кӧ ль ԝьр сәкьнибу дьбьһист гот: «Гӧрʼинийа әʼзмен бу». Һьнәка жи дьгот: «Мьлйакʼәтәки тʼәви Ԝи хәбәр да».

³⁰ Иса щаб да у гот: «Әва дәнга бона Мьн нәһат, ле бона ԝә.

³¹ Ньһа йә ԝәхте диԝана ве дьнйайе, ньһа сәрԝере ве дьнйайе ԝе бе авитьне дәрва.

³² Гава Әз жь әʼрде бәрбь жор бемә һьлдане, Әзе һʼәмуйа бәрбь Хԝә бькʼьшиньм».

³³ Әԝи бь ве готьне дьда фәʼмкьрьне, кӧ Әԝе бь чь щурʼәйи бьмьрә.

³⁴ Һьнге әʼлаләте ле вәгәрʼанд у готе: «Мә жь Ԛануне бьһистийә кӧ Мәсиһе һʼәта-һʼәтайе бьминә. Иди Тӧ чаԝа дьбежи: ‹Гәрәке Кӧрʼе Мерьв бәрбь жор бе һьлдане›? Кʼи йә әԝ ‹Кӧрʼе Мерьв›?»

³⁵ Иса ԝанрʼа гот: «Һьнәк ԝәхт жи рʼонайи ԝе тʼәви ԝә бә. Һʼәта кӧ рʼонайи тʼәви ԝә йә, бьмәшьн, нәбә кӧ тәʼри сәр ԝәда бе. Әԝе кӧ тәʼрийеда дьмәшә, әԝ ньзанә кʼӧда дьчә.

³⁶ Һʼәта кӧ рʼонайи тʼәви ԝә йә, баԝәрийа хԝә рʼонайе биньн, ԝәки һун бьбьнә зарʼед рʼонайе». Гава Иса әв йәкана готьн чу у Хԝә жь бәр ԝан вәшарт.

Нәбаԝәрийа щьһуйа

³⁷ Сәр һаԛас нишанарʼа кӧ Ԝи ль бәр ԝан кьрьн, ле ԝана диса баԝәрийа хԝә ль Ԝи нәданин.

³⁸ Әв йәк аһа бу, ԝәки әԝ готьна Ишайа пʼехәмбәр бе сери: «Хӧдан, кʼе әԝ готьна кӧ мә гот баԝәр кьр? У зәнда Хӧдан кʼева әʼйан бу?»

³⁹ Бона ԝе йәке ԝана нькарьбу баԝәр бькьрана, чьмки Ишайа аһа жи готийә:

⁴⁰ «Хԝәде чʼәʼвед ԝан кор кьрьн у ава рʼәш ани сәр һʼьше ԝан, ԝәки бь чʼәʼва нәбиньн, бь һʼьша фәʼм нәкьн у вәнәгәрʼьн кӧ Әз ԝан ԛәнщ кьм».

⁴¹ Ишайа аһа гот, чьмки ԝи рʼумәта Иса дит у ль сәр Ԝи хәбәр да.

⁴² Ле бәле диса жи жь сәрԝера гәләка баԝәрийа хԝә Ԝи ани. Ле жь тьрса ферьсийа, ль хԝә мӧкӧрʼ нәдьһатьн, кӧ жь кʼьниште нәйенә дәрхьстьне.

⁴³ Ль ԝан һе хԝәш дьһат кӧ мәрьв пәсьне ԝан бьдьн, нә кӧ Хԝәде.

Готьна Иса һʼакьме Рʼожа Ахрәте йә

⁴⁴ Һьнге Иса бь дәнгәки бьльнд гот: «Әԝе кӧ баԝәрийа хԝә Мьн тинә, әԝ баԝәрийа хԝә Мьн найнә, ле Йе кӧ Әз шандьмә.

⁴⁵ У әԝе кӧ Мьн дьбинә, йе кӧ Әз шандьмә дьбинә.

⁴⁶ Әз чаԝа рʼонайидар һатьмә дьнйайе, ԝәки һәр кәсе кӧ баԝәрийа хԝә Мьн бинә, тәʼрийеда нәминә.

⁴⁷ Һәгәр йәк готьна Мьн бьбьһе у нәԛәдинә, Әз диԝана ԝи накьм. Әз нәһатьмә кӧ диԝана дьнйайе бькьм, ле ԝәки дьнйайе хьлаз кьм.

⁴⁸ Әԝе кӧ Мьн тʼәхсир дькә у готьнед Мьн ԛәбул накә, йәк һәйә кӧ ԝе диԝана ԝи бькә, аԝа готи әԝ готьна кӧ Мьн готийә, әԝе Рʼожа Ахрәте диԝана ԝи бькә.

⁴⁹ Чьмки Мьн хԝәсәрихԝә нәготьн, ле Баве кӧ Әз шандьмә, Әԝи тʼәми дайә Мьн кӧ Әз чь бежьм у чь хәбәр дьм.

⁵⁰ У Әз заньм кӧ тʼәмийа Ԝи жийина һʼәта-һʼәтайе йә. Аԝа чь кӧ Әз дьбежьм, чаԝа Баве готийә Мьн Әз ӧса дьбежьм».