Yûhenna 1 - Пәймана Ну (Инщил)

Пешготьна Йуһʼәнна: Дәстпебунеда Хәбәр һәбу

¹ Дәстпебунеда Хәбәр һәбу. Хәбәр тʼәви Хԝәде бу у Хәбәр Хԝәха Хԝәде бу.

² Әԝ дәстпебунеда тʼәви Хԝәде бу.

³ Һәр тьшт бь Ԝи әʼфьрин у бейи Ԝи тʼӧ тьшт нәԛәԝьми, чь кӧ ԛәԝьми.

⁴ Канийа жийине Әԝ бу у жийин жи рʼонайа мәрьва бу.

⁵ Рʼонайи тәʼристанийеда шәԝԛ дьдә у тәʼристанийе Пе нькарьбуйә.

⁶ Мәрьвәки жь алийе Хԝәдеда шанди һәбу, кӧ наве ԝи Йуһʼәнна бу.

⁷ Әԝ бона шәʼдәтийе һат, ԝәки бона Рʼонайе шәʼдәтийе бьдә, кӧ һʼәму пе ԝи баԝәр бькьн.

⁸ Әԝ хԝәха нә әԝ Рʼонайи бу, ле әԝ һат кӧ шәʼдәтийа Рʼонайе бьдә.

⁹ Рʼонайа рʼаст Әԝ ә, кʼижан кӧ те дьнйайе у һʼәму мәрьва рʼонайи дькә.

¹⁰ Әԝ дьнйайеда бу у дьнйа пе Ԝи әʼфьри, ле дьнйайе Әԝ нас нәкьр.

¹¹ Әԝ һатә сәр ԝаре Хԝә, ле щьмәʼта Ԝи Әԝ ԛәбул нәкьр.

¹² Ле әԝед кӧ Әԝ ԛәбул кьрьн у баԝәрийа хԝә наве Ԝи анин, Әԝи да, кӧ һәԛийа ԝан һәбә бьбьнә зарʼед Хԝәде.

¹³ Әвана нә жь хуне, нә жь хԝәстьна бәдәне у нә жи жь хԝәстьна мәрьвайе бунә, ле әԝ жь Хԝәде бунә.

¹⁴ У Хәбәр бу хун у гошт, бь кʼәрәм у рʼастийева тʼьжи нав мәда коне Хԝә дани. Мә рʼумәта Ԝи дит, әԝ рʼумәта Кӧрʼе Бавейи тайе тʼәне.

¹⁵ Йуһʼәнна бона Ԝи шәʼдәти да у бь дәнгәки бьльнд гот: «Әва йә, бона Кʼижани мьн готьбу: ‹Әԝе кӧ пәй мьн те Әԝ сәр мьнрʼа йә, чьмки Әԝ бәри мьн һәбу›».

¹⁶ Мә һʼәмуйа жь тʼер-тʼьжийа Ԝи кʼәрәм сәр кʼәрәмеда станд.

¹⁷ Чьмки Ԛанун бь дәсте Муса һатә дайине, кʼәрәм у рʼасти бь дәсте Иса Мәсиһ.

¹⁸ Тʼӧ кәси тʼӧ щар Хԝәде нәдитийә, ле Йе Тайе Тʼәнейи кӧ хут Хԝәде йә у һʼәмеза Баведа йә, Әԝи Әԝ да әʼйанкьрьне.

Шәʼдәтийа Йуһʼәннайе ньхӧмдар

¹⁹ Әв бу Шәʼдәтийа Йуһʼәнна: Гава щьһуйа жь Оршәлиме кʼаһин у леԝи шандьн, ԝәки жь Йуһʼәнна бьпьрсьн, кӧ әԝ кʼи йә, Йуһʼәнна һьлда сәр хԝә,

²⁰ инкʼар нәкьр у ашкәрә гот: «Әз нә Мәсиһ мә».

²¹ Ԝана же пьрси: «Ле тӧ кʼи йи? Елйас и?» Әԝи гот: «На». «Әԝ пʼехәмбәре создайи йи?» Щаб да: «На».

²² Һьнге жерʼа готьн: «Дә бежә, тӧ кʼи йи, ԝәки әм щабәке ԝанрʼа бьбьн, йед кӧ әм шандьнә. Тӧ бона хԝә чь дьбежи?»

²³ Әԝи гот: «Әз әԝ дәнг ьм кӧ бәрʼийеда дькә гази: ‹Рʼийа Хӧдан рʼаст бькьн!› чаԝа кӧ Ишайа пʼехәмбәр готийә».

²⁴ Әԝед кӧ һатьбунә шандьне жь ферьсийа бун.

²⁵ Ԝана же пьрси: «Ле иди чьма дьньхӧмини, һәгәр тӧ нә Мәсиһ и, нә Елйас у нә жи пʼехәмбәр?»

²⁶ Йуһʼәнна ль ԝан вәгәрʼанд у гот: «Әз бь аве дьньхӧминьм, ле Йәк нав ԝәда һәйә, кӧ һун Ԝи нас накьн.

²⁷ Әԝ ә, Йе кӧ пәй мьн те, кӧ әз нә һежа мә, ԝәки бәне чарьхед Ԝи жи вәкьм».

²⁸ Әв һʼәму ль ԝи бәри Урдӧне, ль Бәйтанйайе, ԝи щийе кӧ Йуһʼәнна ль ԝьр дьньхӧманд ԛәԝьмин.

Бәрхе Хԝәде

²⁹ Рʼожа дьне Йуһʼәнна дит кӧ Иса бәрбь ԝи те, әԝи гот: «Ва йә! Бәрхе Хԝәде, Йе кӧ гӧнед дьнйайе һьлдьдә!

³⁰ Әв ә бона Кʼижани мьн готьбу: ‹Пәй мьнрʼа Йәке бе, кӧ сәр мьнрʼа йә, чьмки Әԝ бәри мьн һәбу›.

³¹ Мьн ньзаньбу Әԝ кʼи йә, ле әз һатьмә бь аве дьньхӧминьм, ԝәки Ԝи Исраелева бьдьмә әʼйанкьрьне».

³² Йуһʼәнна әва шәʼдәтийа да у гот: «Мьн дит кӧ Рʼӧһʼ жь әʼзмен мина кәвоткәке һат сәр Ԝи дани у ма.

³³ Мьн ньзаньбу Әԝ кʼи йә, ле Әԝе кӧ әз шандьм, кӧ бь аве бьньхӧминьм, мьнрʼа гот: ‹Тӧ кʼижани бьбини кӧ рʼӧһʼ те сәр датинә у дьминә, Әԝ ә кӧ бь Рʼӧһʼе Пироз дьньхӧминә›.

³⁴ Мьн жи дит у шәʼдәти да кӧ Әв ә Кӧрʼе Хԝәде».

Шагьртед пешийе

³⁵ Рʼожа дьне Йуһʼәнна диса тʼәви дӧ шагьртед хԝә сәкьни бу.

³⁶ Дит кӧ Иса ԝьрарʼа дәрбаз дьбә, гот: «Ва йә Бәрхе Хԝәде!»

³⁷ Әв йәк кӧ бьһистьн, һәр дӧ шагьрт пәй Иса чун.

³⁸ Иса ль пьшт Хԝәва вәгәрʼийа у дит кӧ ԝана дайә пәй Ԝи тен, ԝанрʼа гот: «Һун чь дьхԝазьн?» Ԝана жерʼа гот: «Рʼабби», кӧ те фәʼмкьрьне: «Дәрсдар», «Тӧ ль кʼӧ дәре дьмини?»

³⁹ Әԝи ԝанрʼа гот: «Ԝәрьн һуне бьбиньн». Ԝана чу у дит кӧ Әԝ ль кʼӧ дьминә. Иди сьһʼәт незики чара бу у ԝе рʼоже әԝ ль щәм Ԝи ман.

⁴⁰ Жь ԝан һәр дӧйа, йед кӧ жь Йуһʼәнна бьһистьн у пәй Иса чун, йәк Әндраԝьсе бьре Шьмһʼун-Пәтрус бу.

⁴¹ Әԝи перʼа-перʼа бьре хԝә Шьмһʼун дит у жерʼа гот: «Мә Мәсиһ дит», кӧ те фәʼмкьрьне: «Йе Кʼьфшкьри».

⁴² Ԝи әԝ ани щәм Иса. Иса ль Шьмһʼун ньһерʼи у готе: «Тӧ, Шьмһʼуне кӧрʼе Йуһʼәнна, те Кифас бейи готьне» (аԝа готи «Пәтрус», кӧ те фәʼмкьрьне: «Ԛәйа»).

Иса гази Филипо у Натанйел дькә

⁴³ Рʼожа дьне Иса ԛьрар кьр кӧ һәрʼә Щәлиле. Ԝи Филипо дит у жерʼа гот: «Пәй мьн ԝәрә!»

⁴⁴ Филипо жь Бәйтсайдайе бу, жь бажаре Әндраԝьс у Пәтрус.

⁴⁵ Филипо чу Натанйел дит у жерʼа гот: «Мә Әԝ дит, бона кʼижани Муса Ԛанунеда у пʼехәмбәра жи ньвисаред хԝәда сальхе Ԝи дабун, Исайе Кӧрʼе Усьве жь Ньсрәте».

⁴⁶ Натанйел же пьрси: «Ԛәт дьбә кӧ тьштәки пʼак жь Ньсрәте дәркʼәвә?» Филипо жерʼа гот: «Ԝәрә у бьбинә!»

⁴⁷ Гава Иса дит кӧ Натанйел бәрбь Ԝи те, дәрһәԛа ԝида гот: «Ва йә исраелики һәԛи-һʼәлал кӧ дьле ԝида мьхәнәти тʼӧнә».

⁴⁸ Натанйел же пьрси: «Чаԝа мьн нас дьки?» Иса ле вәгәрʼанд у готе: «Һе Филипо гази тә нәкьрьбу, гава кӧ тӧ ль бьне дара һежире рʼуньшти буйи, Мьн тӧ дити».

⁴⁹ Натанйел жерʼа гот: «Дәрсдар, Тӧ Кӧрʼе Хԝәде йи! Тӧ Пʼадше Исраеле йи!»

⁵⁰ Иса ле вәгәрʼанд у готе: «Тӧ бона ве йәке баԝәр дьки, ԝәки Мьн тәрʼа гот: ‹Мьн тӧ ль бьне дара һежире дити?› Те тьштед жь ве мәстьр бьбини».

⁵¹ У жерʼа гот: «Әз рʼаст бе хельф ԝәрʼа дьбежьм, һуне бьбиньн әʼзман вәбуйә у мьлйакʼәтед Хԝәде чаԝа жь сәр Кӧрʼе Мерьв һьлдькʼьшьн, пәйа дьбьн».