Tîmotʼêyo II 4 - Пәймана Ну (Инщил)

¹ Аԝа ль бәр Хԝәде у ԝи Мәсиһ Исайе кӧ ԝе диԝана мьри у зендийа бькә, әз бь щамери дьбежьм, тӧ ль ԝе һатьн у Пʼадшатийа Ԝи ки:

² Хәбәре даннасин кә, сәр ԝе нет-фькьре бә, һәгәр ԝәхтда бә, йан бе ԝәхт бә, ль шашийа һьле, пешийа нәһәԛийе бьгьрә, дьл бьдә мәрьва, бь тʼәмамийа сәбьре һин кә.

³ Чьмки зәмане бе, кӧ мәрьв ԝе гӧһ нәдьнә һинкьрьна сахләм, ле ԝе хԝәстьнед дьле хԝәрʼа ԝан дәрсдара сәрһәв тʼоп кьн, йед кӧ тьштед ль гӧһе ԝан хԝәш те ԝе һин бькьн.

⁴ Ԝе гӧһе хԝә жь рʼастийе дагәрʼиньн у пәй чʼьловискийа кʼәвьн.

⁵ Ле тӧ һәр тьштида сәрхԝә бьминә, ль тәнгасийа сәбьр кә, кьре мьзгиндар бькә, ԛӧльхе хԝә бьԛәдинә.

⁶ Чьмки әз хԝәха ԛӧрбанбунерʼа иди сәр рʼож-рʼожа мә у ԝәхте чуйина мьн перʼа гьһиштийә.

⁷ Ләщеда әз ԛәнщ рʼәвим, мьн рʼийа хԝә ԛәданд, баԝәри хԝәй кьр.

⁸ У ньһа мьнрʼа дьминә кʼофийа һәԛийейә сәркʼәтьне, йа кӧ Хӧдан, Һʼакьме рʼаст ԝе бьдә мьн ԝе рʼоже у нә тʼәне мьн, ле ԝан һʼәмуйа жи, йед кӧ бь һʼьзкьрьне һʼәйра хӧйабуна Ԝида нә.

Сальх-сульх

⁹ Бькә кӧ зу бейи щәм мьн.

¹⁰ Димас кӧ дьнйа һʼьз кьр әз һьштьм у чу Тʼесалонике. Кьрәскис чу Галатйайе, Тито жи Далмәтйайе.

¹¹ Тʼәне Луԛа щәм мьн майә. Марԛос һьлдә тʼәви хԝә бинә, чьмки ви ԛӧльхида әԝ кери мьн те.

¹² Тьхико, мьн шандә Әфәсе.

¹³ Тӧ гава бейи, ԝи ԛапʼуте кӧ мьн Тройайеда щәм Карпос һьшт, тʼәви хԝә бинә, ӧса жи кʼьтебед гӧломатк, илаһи йед чʼәрм.

¹⁴ Скәндәре һʼәдад гәләк хьраби ль мьн кьр. Хӧдан ԝе ԝәкә кьрьнед ԝи бинә пешийа ԝи.

¹⁵ Тӧ жи һʼәвза хԝә жь ԝи бькә, чьмки гәләки ль бәр готьна мә рʼабу.

¹⁶ Щара пешьн, гава әз ль бәр диԝане сәкьним, кәсәки пьшта мьн нәгьрт, һʼәмуйа әз һьштьм чун. Бьра әв йәк ԝанрʼа гӧнә нәйе һʼәсабе!

¹⁷ Ле Хӧдан тʼәви мьн сәкьни у ԛәԝат да мьн, ԝәки пе мьн Мьзгинидайин мийасәр бә у һʼәму нәщьһу бьбьһен у әз жь дәве шер хьлаз бум.

¹⁸ Хӧдан ԝе мьн жь һәр кьред хьраб хьлаз кә у сах-сьламәт бьгьһинә Пʼадшатийа Хԝәйә әʼзмана. Шькьр жь Ԝирʼа һʼәта-һʼәтайе. Амин.

Сьлавед ахьрийе

¹⁹ Сьлаве бьдә Прьскилайе у Акила, ӧса жи мала Онисифоро,

²⁰ Ерасто ль Корьнтʼе ма, Трофимо жи, мьн ль Миләтосе нәхԝәш һьшт.

²¹ Бькә кӧ бәри зьвьстане бейи. Әйбуло, Пудес, Линос, Клаԝдийа у һʼәму хушк-бьра ль тә сьлав дькьн.

²² Хӧдан тʼәви рʼӧһʼе тә бә. Кʼәрәма Хԝәде ԝәрʼа бә.