Tîmotʼêyo II 1 - Пәймана Ну (Инщил)

Сьлавкьрьн

¹ Жь Паԝлосе бь әʼмьре Хԝәде шандийе Мәсиһ Иса бона ԝи созе жийине, йа кӧ бь сайа Мәсиһ Иса йә,

² Тимотʼейойе лаԝе хԝәйи дәлалрʼа: Дә бьра рʼәʼм, кʼәрәм у әʼдьлайи жь Бав Хԝәде у Мәсиһ Исайе Хӧдане мә ль тә бә.

Рʼазибун у дьлшьдандьн

³ Әз жь Хԝәде рʼази мә, кӧ мина пешийед хԝә бь исафа рʼьһʼәт Ԝирʼа хӧламтийе дькьм, һәр гав шәв у рʼож нава дӧайед хԝәда тә бир тиньм.

⁴ Гава әз һесьред тә тиньмә бира хԝә, дькʼәвьмә дәмана дитьна тә, ԝәки шабун бькʼәвә дьле мьн.

⁵ Әз ԝе баԝәрийа тәйә дьле сах тиньмә бира хԝә, йа кӧ бәре щәм пирька тә Лойисе у дийа тә Әйньке һәбу у әз баԝәр ьм, кӧ йа тә жи һәйә.

⁶ Бона ԝе йәке әз дькьмә бира тә, кӧ тӧ агьре пʼешкʼеша Хԝәде һе гӧрʼ ки, йа кӧ бь дәстданина мьн тәрʼа һатә дайине.

⁷ Чьмки Хԝәде рʼӧһʼәки тьрсе нәда мә, ле Йе ԛәԝате, һʼьзкьрьне у хԝәгьртьне.

⁸ Аԝа шәрм нәкә, кӧ бона Хӧдане мә шәʼдәтийе бьди, нә жи бона мьн шәрм бькә, кӧ әз бона наве Ԝи гьрти мә. Ле тʼәви щәфайе Мьзгинийе бә, анәгори ԛәԝата Хԝәде.

⁹ Хԝәде әм хьлаз кьрьн, пирозийерʼа гази кьрьн, нә кӧ бона кьрьнед мә, ле ль гора ԛьрар у кʼәрәма Хԝә. Әва кʼәрәма бь сайа Мәсиһ Иса, әԝ һе дәԝред бәреда мәрʼа һатә дайине.

¹⁰ Ле ньһа бь хӧйабуна Хьлазкьре мә Мәсиһ Иса әʼйан бу, кӧ мьрьн бәтал кьр у жийина бе мьрьн, бь Мьзгинийе рʼонайи кьр.

¹¹ Ве Мьзгинийерʼа әз даннасинкьр, шанди у дәрсдар һатьмә кʼьфшкьрьне

¹² у ләма әз ви щәфайи дькʼьшиньм. Ле әз шәрм накьм, чьмки заньм мьн баԝәрийа хԝә Кʼе анийә у гӧман ьм жи, кӧ Әԝи чь кӧ спартийә мьн, ԝе һʼәта ԝе Рʼоже жи хԝәй кә.

¹³ Тӧ хԝә ль ԝи нәхше һинкьрьна сахләм бьгьрә, йа кӧ тә жь мьн бьһист у нава ԝе баԝәри у һʼьзкьрьнеда бьминә, кʼижан жь Мәсиһ Иса пʼара мә кʼәт.

¹⁴ Әԝ тьштед ԛәнщә кӧ ль тә һатьнә спартьне бь ԝи Рʼӧһʼе Пирози нава мәда хԝәй кә.

¹⁵ Тӧ зани әԝед кӧ ԛәза Асйайеда бун пьшта хԝә данә мьн, Фугәло у Һермохенис жи тʼәви ԝан.

¹⁶ Бьра Хӧдан рʼәʼма хԝә ль мала Онисифоро бькә, чьмки әԝи гәләк щара дьле мьн рʼьһʼәт кьр, жь гьртьна мьн шәрм нәдькьр,

¹⁷ ле гава һатә Рʼомайе, гәләки ль мьн гәрʼийа, һʼәта әз дитьм,

¹⁸ (дә бьра Хӧдан бьде, кӧ әԝ ԝе Рʼоже рʼәʼме жь Хӧдан бьбинә) у Әфәседа жи әԝи чьԛас мьнрʼа хьзмәткʼари кьр, тӧ рʼьнд зани.