Tîmotʼêyo I 5 - Пәймана Ну (Инщил)

Щабдарийа бона әʼмьре мәзьн у бьчʼука

¹ Дьле каләмера нәешинә, ле дьл бьдә ԝан, чаԝа баве хԝә. Щаһьла чаԝа бьрайед хԝә һʼәсаб кә,

² пира чаԝа дийа хԝә, кʼӧлфәтед щаһьл чаԝа хушкед хԝә, ԝәкә шире һʼәлал.

Жьнәбийед әʼдәти

³ Ԛәдьре жьнәбийа бьгьрә, йед кӧ бь әʼдәти жьнәби нә.

⁴ Ле һәгәр зарʼ йан нәвийед жьнәбике һәбьн, бьра әԝ зарʼ пешийе мала хԝәда һин бьн чаԝа хԝәденасийа хԝә бьдьнә кʼьфше у бь ви тьһәри дәйне де у баве хԝә вәгәрʼиньн, чьмки әв йәк ль Хԝәде хԝәш те.

⁵ Жьнәбийа әʼдәти әԝ ә, йа кӧ тʼәне майә у гӧмана хԝә данийә сәр Хԝәде, шәв у рʼожед хԝә бь дӧа у рʼәща дәрбаз дькә.

⁶ Ле йа кӧ кʼефа дьле хԝәрʼа йә, мьрийа нәчʼәʼлкьри йә.

⁷ Ван тьшта тʼәми кә, ԝәки беләкʼә бьн.

⁸ Ле һәгәр мәрьвәк бона хԝәхатийа хԝә, илаһи бона мала хԝә хәм накә, әԝи баԝәри инкʼар кьрийә у жь нәбаԝәра жи хьрабтьр ә.

⁹ Бьра наве ԝе дәфтʼәра жьнәбийада бе ньвисаре, кʼижан жь шест сали кемтьр нинә, щарәке жи меркьри буйә,

¹⁰ бь кьрьнед ԛәнщва жи бәрбьчʼәʼв ә: Мәсәлә, зарʼ мәзьн кьрьбьн, меван ԛәбул кьрьбьн, ньгед баԝәрмәнда шуштьбьн, дәст авитьбә кʼәтийа у бона һәр шьхӧле ԛәнщ жи һазьр сәкьни йә.

¹¹ Ле жьнәбийед щаһьл ԛәбул нәкә, чьмки гава әвана тәме хԝә хьраб дькьн, бәре хԝә жь Мәсиһ дьгӧһезьн, дьхԝазьн мер кьн

¹² у бь ви аԝайи әви сущи һьлтиньнә сәр хԝә, чьмки созе бәре данә алики.

¹³ Сәрда жи мал бь мал дьгәрʼьн, хԝәрʼанәдити һин дьбьн, нә тʼәне хԝәрʼанәдити нә, ӧса жи гьлигәрʼо, тʼәви шьхӧле хәлԛе дьбьн у тьштед нәщайиз хәбәр дьдьн.

¹⁴ Аԝа әз дьхԝазьм кӧ жьнәбийед щаһьл мер кьн, зарʼа биньн у малкьр бьн, ԝәки зьмен нәкьнә дәве нәйара.

¹⁵ Чьмки иди һьнәк жьнәбийед щаһьл хальфин, пәй мирещьн чун.

¹⁶ Һәгәр жьнәбийед баԝәрмәндәке һәбьн, бьра әԝ аликʼарийа ԝан бькә у щьвине баргьран нәкә, ԝәки щьвин бькарьбә аликʼарийа жьнәбийед әʼдәти бькә.

Бона бәрпьрсийара

¹⁷ Әԝ бәрпьрсийаред кӧ сәрԝертийе рʼьнд дькьн, бьра дӧбарә һежайи ԛәдьр бьн, илаһи әԝед кӧ хәбәрдан у һинкьрьнеда дьхәбьтьн.

¹⁸ Чьмки ньвисар дьбежә: «Дәве гайе бедәреда дьхәбьтә гьренәдә» у «Пʼалә һежайи һәԛе хԝә йә».

¹⁹ Хәйба һьндава бәрпьрсийарда баԝәр нәкә, һәгәр дӧ йан се шәʼдә тʼӧнәбьн.

²⁰ Бәрпьрсийаред кӧ нава гӧнада дьминьн, ль бәр һʼәмуйа ле һьле, ԝәки йед майин жи бьтьрсьн.

²¹ Әз ль бәр Хԝәде, Мәсиһ Иса у мьлйакʼәтед бьжарти дькьмә дәйне стуйе тә, кӧ тӧ ван ширәта бе тʼагери хԝәй ки, тьштәки бь фьрԛийе нәки.

²² Дәсте хԝә зу данәйнә сәр йәки бона хьзмәткʼарийа Хӧдан, нә жи тʼәви гӧнед йед майин би. Хԝә паԛьж хԝәй кә.

²³ Жь вьр шунда тʼәне аве вәнәхԝә, ле һьнәки жи шәраве тʼәв кә, бона щийе мәһʼандьна хԝарьне, кӧ зу-зу нәхԝәш дькʼәви.

²⁴ Һьнәк һәнә, кӧ гӧнед ԝан кʼьфш ьн у рʼаст ԝан дьбьнә бәр диԝане, ле гӧнед һьнәка жи паше ԝе кʼьфш бьн.

²⁵ Ӧса жи кьрьнед ԛәнщ кʼьфш ьн у әԝ кьрьнед кӧ нә кʼьфш ьн, әԝ жи вәшарти наминьн.