Tîmotʼêyo I 3 - Пәймана Ну (Инщил)

Бона сәрԝеред щьвине

¹ Ве готьнеда хельф тʼӧнә: Һәгәр тәме йәки ль сәрԝертийе һәйә, әԝ шьхӧләки ԛәнщ дьхԝазә.

² Аԝа сәрԝер гәрәке беԛӧсур бә, мере жьнәке бә, хԝәгьрти, аԛьлда гьран, маԛул, меванһʼьз, һинкьрьнеда сәрхԝә бә,

³ нә сәрхԝәш, нә сьрʼтук, ле бәрбьһер, нә шәрʼуд, нә пʼәрәһʼьз.

⁴ Бьра малхетийе рʼьнд ль мала хԝә бькә, зарʼед хԝә гӧрʼа хԝәда һәр алийава маԛулийеда мәзьн кә.

⁵ (Чьмки һәгәр йәк ньзанә малхетийе ль мала хԝә бькә, ԝе чаԝа бькарьбә щьвина Хԝәде хԝәй кә?)

⁶ Бьра нә жи баԝәрмәнде ну бә, кӧ нәбә кʼӧбар бә, диԝана ԝи жи мина йа мирещьн бе кьрьне.

⁷ Ԝәки дьн жи гәрәке ԛәдьре ԝи щәм йед жь щьвине дәр жи һәбә, кӧ нәбә бе рʼәзилкьрьне у бькʼәвә тʼәләка мирещьн.

Бона бәрдәстийед щьвине

⁸ Ӧса жи бьра бәрдәсти гьран бьн, хәбәрданеда дӧрʼутийе нәкьн, хԝә нәдьнә шәраве, пәй кʼәда һʼәрам нәкʼәвьн.

⁹ Рʼастийа баԝәрийейә әʼйанбуйи бь исафа рʼьһʼәт хԝәй кьн.

¹⁰ У әвана жи бьра пешда бенә щерʼьбандьне, һәгәр тьштәк сәр ԝан тʼӧнәбә, һьнге бьра бәрдәстийе бькьн.

¹¹ Ӧса жи бьра жьнед ԝан гьран, нә бӧхданбеж, ле хԝәгьрти, һәр тьштида амьн бьн.

¹² Бәрдәсти гәрәке мере жьнәке бә, ԛәнщ малхетийе ль зарʼ у мала хԝә бькә.

¹³ Әԝед кӧ рʼьнд бәрдәстийе дькьн, хԝәрʼа дәрәщәкә бьльнд ԛазьнщ дькьн у сәрбәстикә мәзьн дәст тиньн бона баԝәрийа Мәсиһ Иса.

Сӧрʼа хԝәденасийе

¹⁴ Әз кӧ ван тьшта тәрʼа дьньвисьм, гӧман һәйә әзе зутьрәке сәр тәда бем.

¹⁵ Ле һәгәр әз дәрәнги жи бькʼәвьм, те заньби гәрәке чаԝа мала Хԝәдеда рʼабьн-рʼунен, йа кӧ щьвина Хԝәдейе сах ә, стун у һʼиме рʼастийе йә.

¹⁶ Бе хәбәрдан, гәләки кʼур ә сӧрʼа хԝәдепʼарьстийа мә: Әԝ бь бәдәни хӧйа бу, бь Рʼӧһʼ рʼастийа Ԝи һатә избаткьрьне, мьлйакʼәтава һатә дитьне, нав мьләта һатә даннасинкьрьне, дьнйайеда һатә баԝәркьрьне у рʼумәтерʼа һатә һьлатьне.