Tîmotʼêyo I 2 - Пәймана Ну (Инщил)

Дәрһәԛа дӧа у щьвинеда

¹ Аԝа әз һиви дькьм, бәри һәр тьшти бона һʼәму мәрьва дӧа бькьн, рʼәща кьн, лава кьн, рʼазибуне бьдьн,

² ӧса жи бона пʼадша у һʼәму сәрԝера, ԝәки әм жийинәкә әʼдьл у сәԛьрʼи дәрбаз кьн, бь тʼәмамийа хԝәденасийе у маԛулийе.

³ Ль бәр Хԝәдейе Хьлазкьре мә әв ә ԛәнщ у ль Ԝи хԝәш,

⁴ кӧ дьхԝазә һʼәму мәрьв хьлаз бьн у рʼастийе нас кьн.

⁵ Чьмки Хԝәдек һәйә у нава Хԝәде у мәрьвада жи навчетик, Мәсиһ Исайе Мәрьв,

⁶ кӧ Хԝә жь бәр кʼьрʼина гьшкава да. Әв йәк рʼаст ԝәхтда бу избати, кӧ Хԝәде дьхԝазә һʼәму хьлаз бьн.

⁷ У бона ве йәке әз даннасинкьр у шанди һатьмә кʼьфшкьрьне, (әз рʼаст дьбежьм, дәрәԝа накьм), нәщьһуйарʼа бумә дәрсдаре баԝәрийе у рʼастийе.

⁸ Аԝа әз дьхԝазьм кӧ мер һәр дәра дәстед хԝәйә һʼәлал бьльнд кьн, бе һерс у бе шәрʼ-дәʼԝ дӧа бькьн.

⁹ Ӧса жи бьра кʼӧлфәт бь кʼьнщед лайиԛ, шәрме у бәрбьһерийе хԝә бьхәмьлиньн, нә кӧ бь гӧли-гӧжанга, йан зерʼ, йан бь дӧрʼа, йан жи бь кʼьнщед бьһа,

¹⁰ ле бь кьред ԛәнщ, чаԝа ль ԝан кʼӧлфәта дькʼәвә, йед кӧ наве хԝәденасийе һьлданә сәр хԝә.

¹¹ Бьра кʼӧлфәт кәрʼ һин бә, бь тʼәмамийа гӧһдарийе.

¹² Әз изьне надьмә кʼӧлфәт, кӧ һин бькә, нә жи һʼӧкӧми сәр мер бькә, ле бьра дәнг нәкә.

¹³ Чьмки пешийе Адәм хӧльԛи, паше Һеԝа

¹⁴ у Адәм нәхапийа, ле жьн хапийа у нәһәԛи кьр.

¹⁵ Ле жьн һʼале зарʼанинеда жи ԝе хьлаз бә, һәгәр бь бәрбьһерийе нава баԝәрийе, һʼьзкьрьне у паԛьжайийеда бьминьн.