Selanîkî II, 2 - Пәймана Ну (Инщил)

Кʼьфшбуна Мәрьве Нәһәԛийе у һатьна Хӧдан Иса Мәсиһ

¹ Әм һиви жь ԝә дькьн хушк-бьрано, бона һатьна Хӧдане мә Иса Мәсиһ у тʼопбуна мәйә щәм Ԝи,

² һун фькьре хԝәда зу шаш нәбьн у хԝә ӧнда нәкьн, нә пе пʼехәмбәртийе, нә пе готьне, нә жи пе нәʼма йанчийә мә ньвисибә: «Ва йә Рʼожа Хӧдан иди һатийә».

³ Бьра тʼӧ кәс ԝә тʼӧ тьштива нәхапинә, чьмки әԝ Рʼож найе, һʼәта кӧ рʼабәрибун пешда нәйе у әԝ Мәрьве Нәһәԛийейи пʼара щәʼньме кʼьфш нәбә.

⁴ Әԝе мьԛабьли һәр тьштед кӧ хԝәде тенә һʼәсабе йан тенә һʼәбандьне бьсәкьнә у хԝә сәр һәр тьштирʼа бьгьрә, һʼәта кӧ пʼарьстгәһа Хԝәдеда жи ԝе рʼуне у әʼлам кә, кӧ хԝәха Хԝәде йә.

⁵ Гәло найе бира ԝә, гава әзи һе щәм ԝә бум, мьн әв тьштана ԝәрʼа дьготьн?

⁶ У һун заньн кӧ ньһа чь наһелә әԝ хӧйа бә, ԝәки әԝ ԝәхте кʼьфшкьрида хӧйа бә.

⁷ Чьмки Сӧрʼа Нәһәԛийе иди йа хԝә дькә, ле әԝе кӧ ньһа наһелә, ԝе нәһелә һʼәта кӧ хԝәха жь наве бе һьлдане.

⁸ У паше Әԝе Нәһәԛийе ԝе кʼьфш бә, кӧ Хӧдан Исайе бь һӧлма дәве Хԝә ԝи ӧнда кә у бь хӧйабуна шәԝԛа Хԝәва ԝи кʼӧта кә.

⁹ Һатьна Йе Нәһәԛийе ԝе бь ԛәԝата мирещьн бә, һʼәта һʼӧнӧре ԝи һәбә ԝе нишан у кʼәрәмәтед дәрәԝ бькә

¹⁰ у йед кӧ ӧнда дьбьн бь һәр щурʼә нәһәԛийа бьхапинә. Әԝана ӧнда дьбьн, чьмки ԝана рʼасти һʼьз нәкьр у ԛәбул нәкьр кӧ хьлаз бьн.

¹¹ Ләма жи Хԝәде хальфандьнәкә зор сәр ԝанда дьшинә, кӧ әԝ дәрәԝийе баԝәр бькьн,

¹² ԝәки диԝана ԝан һәр кәси бьбә, йед кӧ рʼасти баԝәр нәкьрьнә, ле кʼефа ԝан нәһәԛийерʼа һат.

Хԝәде бона хьлазбуне гази ԝә кьрийә

¹³ Ле әм гәрәке һәр тʼьм бона ԝә жь Хԝәде рʼази бьн, хушк-бьрайед жь алийе Хӧданда һʼьзкьри. Чьмки Хԝәде сәре-серида һун бьжартьн, ԝәки бь Рʼӧһʼ бенә бӧһӧрти-жьбарәкьрьне, рʼастийе баԝәр бькьн у хьлаз бьн.

¹⁴ Ԝе йәкерʼа Әԝи бь Мьзгинидайина мә гази ԝә кьр, кӧ бь ви аԝайи һун рʼумәта Хӧдане мә Иса Мәсиһ бьстиньн.

¹⁵ Аԝа хушк-бьрано, ньг бьдьн әʼрде у ԝан рʼаԝ-рʼьзьма ԛәԝин бьгьрьн, йед кӧ һун һин бунә, һәгәр бь готьнед мә бә, йан бь нәʼмед мә бә.

¹⁶ Дә Хӧдане мә Иса Мәсиһ Хԝәха у Баве мә Хԝәде, Йе кӧ әм һʼьз кьрьн у бь кʼәрәме дьлдайинәкә һʼәта-һʼәтайе у гӧманәкә ԛәнщ да мә,

¹⁷ бьра дьл бьдә ԝә у ԝә нава һʼәму кьра у готьнед ԛәнщда бьшьдинә.