Selanîkî I, 5 - Пәймана Ну (Инщил)

Һатьна Хӧданда һазьр бьн

¹ Ле бона ԝәхт у зәмана хушк-бьрано, нә һʼәԝщә йә әм тьштәки ԝәрʼа бьньвисьн,

² чьмки һун хԝәха пʼак заньн кӧ Рʼожа Хӧдан ԝе мина дьзе шәве бе.

³ Гава бежьн: «Дьне сәԛьрʼи у бехофи йә», һьнге хәзәбе ньшкева сәр ԝанда бе, мина еша кʼӧлфәта һʼәмлә у ԝе нькарьбьн ԛәт же хьлаз бьн.

⁴ Ле һун хушк-бьрано, тәʼрийеда ниньн кӧ әԝ Рʼож мина дьзәки сәр ԝәда бьгьрә.

⁵ Һун һʼәму жи зарʼед рʼонайийе нә у зарʼед рʼоже нә. Әм нә йед шәве нә, нә жи йед тәʼрийе нә.

⁶ Аԝа әм хәԝеда нәминьн мина йед майин, ле һʼьшйар у сәрхԝә бьн.

⁷ Чьмки әԝед кӧ рʼадьзен, шәве рʼадьзен у әԝед кӧ сәрхԝәш дьбьн, шәве сәрхԝәш дьбьн.

⁸ Ле әм кӧ йед рʼоже нә, гәрәке сәрхԝә бьн: Зьрьһʼа баԝәрийе у һʼьзкьрьне ль хԝә ԝәргьрьн, кʼӧмзьрьһʼе гӧмана хьлазбуне жи бьдьнә сәре хԝә.

⁹ Хԝәде әм бона хәзәбе кʼьфш нәкьрьнә, ле ԝәки хьлазбуне бьстиньн, бь дәсте Хӧдане мә Иса Мәсиһ.

¹⁰ Әԝ бона мә мьр, ԝәки әм һәгәр сах бьн йан мьри бьн, тʼәви Ԝи бьжин.

¹¹ Бона ве йәке дьл бьдьнә һәв у аликʼарийа һәвдӧ бькьн, чаԝа һун дькьн жи.

Тʼәми у сьлавед ахьрийе

¹² Әм һиви жь ԝә дькьн хушк-бьрано, ԛәдьре ԝан бьгьрьн, йед кӧ нава ԝәда дьхәбьтьн, жийина хԝәденасийеда сәʼвитийе ль ԝә дькьн у ԝә ширәт дькьн.

¹³ Ԛәдьре ԝана бь һʼьзкьрьне һе бьльнд бьгьрьн бона шьхӧле ԝан. Һәврʼа тʼьфаԛ бьн.

¹⁴ Әм һиви жь ԝә дькьн хушк-бьрано, йед бепʼәргалә бехирәт ширәт кьн, дьл бьдьнә бәр тьрсонәка, кери кʼәтийа ԝәрьн, һьндава һʼәмуйада сәбьра ԝә һәбә.

¹⁵ Һаш жь хԝә һәбьн, нәбә кӧ йәк жь бәр хьрабийева хьрабийе бькә, ле һәр гав сәр нета ԛәнщийе бьн, һьн бона һәв, һьн жи бона һʼәмуйа.

¹⁶ Һәр тʼьм ша бьн,

¹⁷ һәр гав дӧа бькьн,

¹⁸ һәр тьштида рʼазибуне бьдьн, чьмки әв ә хԝәстьна Хԝәде бь сайа Мәсиһ Иса бона ԝә.

¹⁹ Рʼӧһʼе Пироз нәтәмьриньн.

²⁰ Пʼехәмбәртийа берʼумәт нәкьн.

²¹ Һәр тьшти бьщерʼьбиньн, тьштед ԛәнщ ԛәԝин бьгьрьн.

²² Жь һәр щурʼә хьрабийе дур кʼәвьн.

²³ Дә бьра Хԝәдейе кӧ әʼдьлайийе дьдә, Хԝәха ԝә лап бӧһӧрти-жьбарә кә, тʼәмамийа рʼӧһʼ, ньфус у ԛальбе ԝә беԛӧсур хԝәй кә, һʼәта һатьна Хӧдане мә Иса Мәсиһ.

²⁴ Амьн ә Әԝи кӧ гази ԝә дькә, ԝе мийасәр кә жи.

²⁵ Хушк-бьрано, бона мә жи дӧа бькьн.

²⁶ Сьлаве бьдьнә һʼәму хушк-бьра, бь рʼамусана шире һʼәлал.

²⁷ Әз ль бәр Хӧдан дькьмә дәйне стуйе ԝә, кӧ һун ве нәʼме бәр һʼәму хушк-бьра бьхуньн.

²⁸ Кʼәрәма Хӧдане мә Иса Мәсиһ ԝәрʼа бә.