Selanîkî I, 4 - Пәймана Ну (Инщил)

Жийина кӧ Хԝәде хԝәш те

¹ Һәйнәсәр хушк-бьрано, әм бь наве Хӧдан Иса һиви у рʼәща жь ԝә дькьн, кӧ һун чаԝа жь мә һин бун ӧса бьмәшьн, кӧ ль Хԝәде хԝәш бен, чаԝа дьчьн жи у ԝе йәкеда һе пешда һәрʼьн.

² Чьмки һун заньн мә бь сайа Хӧдан Иса чь тʼәми данә ԝә.

³ Хԝәстьна Хԝәде әԝ ә, кӧ һун һʼәлал бьн, жь ԛавийе дур бьн.

⁴ Бьра жь ԝә һәр кәс жи заньбә ԛальбе хԝә һʼәлал у бь намуси хԝәй кә,

⁵ нә бь хԝәстьна тәме хьраб, мина пʼутпʼарьста, йед кӧ Хԝәде нас накьн.

⁶ Бьра нәбә кӧ йәк ԝе йәкеда жь әʼсьлтийе дәре у намуса хушк-бьрарʼа бьлизә. Хӧдане бона ван һʼәму тьшта һʼәйфе жь мәрьва һьлдә, чаԝа мә әв йәк пешда ԝәрʼа гот у бь мәʼрифәти тʼәми ль ԝә кьр.

⁷ Чьмки Хԝәде гази мә ль һʼәрамийе нәкьрийә, ле ль һʼәлалийе.

⁸ Аԝа кʼи ве тʼәмийа һʼәлалийе тʼәхсир дькә әԝ мерьв тʼәхсир накә, ле Хԝәде, Йе кӧ Рʼӧһʼе Хԝәйи Пироз жи дьдә ԝә.

⁹ Ле бона һʼьзкьрьна һьндава хушк-бьрада, тьштәки мә тʼӧнә ԝәрʼа бьньвисьн, чьмки һун хԝәха жь Хԝәде һин бунә, кӧ һәв һʼьз бькьн.

¹⁰ У һун иди ԝе һʼьзкьрьне һьндава һʼәму хушк-бьрайед тʼәмамийа Мәкәдонйайеда дьдьнә кʼьфше. Ле әм һиви жь ԝә дькьн хушк-бьрано, кӧ һун ԝе йәкеда һе пешда һәрʼьн.

¹¹ Бькьн кӧ һун гьран-сәԛьрʼи бьжин у жь ԝә һәр кәс шьхӧле хԝәва мьжул бә у бь дәсте хԝә бьхәбьтә, чаԝа мә тʼәми ль ԝә кьр,

¹² ԝәки пʼәргалийа ԝә тʼәви йед дәрва мәʼрифәти бә у һун һʼәԝще тьштәки нәбьн.

Һатьна Хӧдан у рʼабуна мьрийа

¹³ Хушк-бьрано, әм дьхԝазьн кӧ һун дәрһәԛа мьрийада заньбьн, ԝәки бәр хԝә нәкʼәвьн, мина әԝед бе гӧман.

¹⁴ Аԝа һәгәр әм баԝәр дькьн, кӧ Иса мьр у жь мьрьне рʼабу, ӧса жи Хԝәде ԝе мьрийед сәр баԝәрийа Иса тʼәви Ԝи вәгәрʼинә.

¹⁵ Әм ве йәке бь готьна Хӧдан ԝәрʼа дьбежьн: Әм кӧ һʼәта һатьна Хӧдан бьжин сах бьминьн, тʼӧ щар пешийа мьрийа накʼәвьн.

¹⁶ Хӧдане хԝәха бь әʼламәтикә фәрмани, бь дәнге сәрәкмьлйакʼәт у лехьстьна борʼийа Хԝәде жь әʼзмен бе хԝаре у әԝ мьрийед кӧ баԝәрийа хԝә Мәсиһ анибун, ԝе пешийе жь мьрьне рʼабьн,

¹⁷ паше, әм кӧ сах манә, тʼәви ԝан әʼԝрава бенә рʼаһьштьне, һәԝеда рʼасти Хӧдан бен у бь ви аԝайи әме һʼәта-һʼәтайе тʼәви Хӧдан бьн.

¹⁸ Аԝа бь ван хәбәра бәр дьле һәвда ԝәрьн.