Romayî 9 - Пәймана Ну (Инщил)

Хԝәде у мьләте ԝи щьһуйе бьжарти

¹ Әз бь Мәсиһ бе хельф рʼаст дьбежьм у исафа мьн жи бь сайа Рʼӧһʼе Пироз мьнрʼа шәʼдәтийе дьдә,

² кӧ әз гәләки бәр хԝә дькʼәвьм у кӧла дьле мьн жи кʼур ә.

³ Чьмки мьн хԝәха дьхԝәст ньфьрʼ ль мьн бьбуйа, тʼела мьн жь Мәсиһ бьԛәтийа, бона мьләте мьни жь хун-гоште мьн,

⁴ кӧ исраели нә. Ль ԝан дькʼәвә бьбьнә лаԝед Хԝәде, Хԝәде рʼумәта Хԝә нишани ԝан да, пәйман тʼәви ԝан гьредан, ԛанунед Хԝә данә ԝан у кьрьнә хԝәйед һʼәбандьн у созед дайи.

⁵ Кал-бав жи жь ԝан ьн у Мәсиһ жи алийе хун у гоштда жь нав ԝан һат, кӧ сәр һʼәмуйарʼа Хԝәдейе һʼәта-һʼәтайейи һежайи шькьрийе йә. Амин.

⁶ Ле бәле наԛәԝьмә кӧ созе Хԝәде хельф дәре, чьмки нә кӧ әԝ һʼәму нә исраели, йед кӧ жь Исраел дьне кʼәтьнә

⁷ у нә жи һʼәмуйед жь бәдәна Бьраһим бунә зарʼед ԝийә һәԛ-һʼәлал ьн, ле һатийә готьне: «Зӧрʼәта тәйе Исһаԛда бе навкьрьне».

⁸ Аԝа готи зарʼед Хԝәде нә әԝ ьн, йед кӧ жь бәдәна тʼәбийәти нә, ле зарʼед создайи ԝе зӧрʼәт бенә һʼәсабе.

⁹ Чьмки созе готи әв бу: «Саләкә дьн ви чахи әзе ль сәр тәда бем у кӧрʼәке Сәрайерʼа бьбә».

¹⁰ Ле нә тʼәне әв бу, Рʼевека жи бь дӧ кӧрʼа жь бавәки һʼәмлә дәркʼәт, аԝа готи жь баве мә Исһаԛ.

^11-12 Гава кӧрʼьк һе нәбьбун, һе ԛәнщи-хьраби нәкьрьбун, Рʼевекайерʼа һатә готьне: «Йе мәзьн ԝе хӧламтийе ль йе бьчʼук бькә». Әв йәк бу, ԝәки ԛьрара Хԝәде ԝәкә бьжартьна Ԝи дәре, нә кӧ кьрава гьредайи бә, ле ль гора газийа Хԝәде бә.

¹³ Чаԝа ньвисар ә: «Мьн Аԛуб һʼьз кьр, ле жь Әсаԝ чум».

¹⁴ Әм иди чь бежьн? Гәло нәһәԛийа Хԝәде һәйә? На хер!

¹⁵ Чьмки Мусарʼа дьбежә: «Әз кʼижани бемә рʼәʼме, Әзе бемә рʼәʼме у дьле Мьн сәр кʼе бьшәԝьтә, ԝе бьшәԝьтә».

¹⁶ Әв йәк иди нә жь хԝәстьн йан хирәта мерьв ә, ле жь рʼәʼма Хԝәде йә.

¹⁷ Чьмки ньвисара пироз Фьрәԝьнрʼа дьбежә: «Бона ԝе йәке Мьн тӧ кьри пʼадша, ԝәки ԛәԝата Хԝә бь тә бьдьмә кʼьфше у наве Мьн тʼәмамийа дьнйайеда бе готьне».

¹⁸ Аԝа Хԝәде кʼижана дьхԝазә те рʼәʼме у кʼижана дьхԝазә ԝан сәрһʼьшк дькә.

Һерс у рʼәʼма Хԝәде

¹⁹ Кӧ ӧса йә те мьнрʼа бежи: «Ле иди чьма Хԝәде мә нәһәԛ дькә? Кʼи дькарә ль бәр ԛьрара Ԝи рʼабә?»

²⁰ Ле тӧ кʼи йи, әʼвдо, кӧ ль бәр готьна Хԝәде рʼадьби? Гәло щерʼ дькарә щерʼкәррʼа бежә: «Тә чьма әз аһа чекьрьмә?»

²¹ Чьма һʼӧкӧме щерʼкәр сәр ахе тʼӧнә кӧ жь ԝе һʼәрʼийа стьрайи һьн дәрданед бона рʼумәте чекә, һьн жи бона берʼумәте?

²² Ле чь ве йәкерʼа һәйә, һәгәр Хԝәде хԝәст бәри кʼьфшкьрьна һерс у ԛәԝата Хԝә, бь думька дьреж гәләки сәбьра Хԝә ль ԝан дәрданед һежайи һерсе бинә, йед кӧ ӧндабунерʼа һазьр сәкьни нә?

²³ Ԝи әв йәк кьр, ԝәки дәԝләмәндтийа рʼумәта Хԝә ԝан дәрданарʼа бьдә кʼьфше, йед кӧ бунә хԝәйе ве рʼәʼме, кʼижан кӧ Ԝи пешда һазьр кьрьбун, ԝәки әԝ тʼәви рʼумәта Ԝи бьбуна.

²⁴ У әԝ дәрданед газикьри әм ьн, нә кӧ тʼәне жь щьһуйа, ле жь нәщьһуйа жи,

²⁵ чаԝа кʼьтеба Һосейада Әԝ дьбежә: «Щьмәʼта кӧ нә щьмәʼта Мьн ә, Әзе бежьме: ‹Щьмәʼта Мьн› у йа нә дәлал Әзе бежьме: ‹Дәлал›».

²⁶ У «ԝе дәра кӧ ԝанрʼа һатә готьне: ‹Һун нә щьмәʼта Мьн ьн›, һәма ль ԝьр жи әԝе лаԝед Хԝәдейе сах бенә готьне».

²⁷ Ишайа жи бона Исраел дькә гази дьбежә: «Һәгәр һʼәсабе зарʼед Исраел ԝәкә ԛума бәʼре бә, тʼәне һьнәк ԝе же хьлаз бә.

²⁸ Чьмки Хӧдан ԝе кьн у кӧрт зутьре диԝана дьне бькә».

²⁹ У чаԝа Ишайа бәри ве йәке гот: «Һәгәр Хӧдане Зор мәрʼа зӧрʼәт нәһьшта, әме бькʼәтана рʼожа Содоме у бьбуна мина Гоморайе».

Исраел у Мьзгини

³⁰ Әм иди чь бежьн? Нәщьһуйед кӧ пәй рʼастһʼәсаббуне нәдьчун, гьһиштьнә рʼастһʼәсаббуне, ԝе рʼастһʼәсаббуна жь баԝәрийе,

³¹ ле Исраел кӧ пәй Ԛануне дьчу кӧ рʼаст бе һʼәсабе, нәгьһиштә ԝе йәке.

³² Чьма? Чьмки әԝ нә кӧ бь баԝәрийе бу, ле бь кьред хԝә. У әԝ сәр кәвьре лькʼӧмандьнеда кʼәт һол бу,

³³ чаԝа ньвисар ә: «Ва Әз кәвьрәки лькʼӧмандьне Сийонеда датиньм, зьнарәки же һолбуне ле һәр кәсе кӧ баԝәрийа хԝә Ԝи бинә, ԝе шәрми нәбә».