Romayî 8 - Пәймана Ну (Инщил)

Жийина бь Рʼӧһʼе Хԝәде

¹ Ньһа иди диԝана ԝан набә, йед кӧ тʼәви Мәсиһ Иса бунә йәк.

² Чьмки ԛануна Рʼӧһʼе кӧ жийине дьдә, бь сайа Мәсиһ Иса әз жь ԛануна гӧна у мьрьне хьлаз кьрьм.

³ Бәле чь кӧ Ԛануне жь дәст бетʼаԛәтийа бьнйатʼа мәрьвайе нькарьбу бькьра, Хԝәде әԝ йәк кьр, Кӧрʼе Хԝә дьлԛе бьнйатʼа мәрьвайийә гӧнәкʼарда бона гӧна шанд. У аһа Әԝи ԝе бьнйатʼеда диԝана гӧнә кьр,

⁴ ԝәки рʼастбуна тʼәмийед Ԛануне нава мәда бе ԛәдандьне, әм кӧ бь бьнйатʼа мәрьвайи нажин, ле бь Рʼӧһʼ.

⁵ Йед кӧ ль гора бьнйатʼа мәрьвайе дьжин, әԝ сәр тьштед бьнйатʼа мәрьвайе дьфькьрьн, ле йед ль гора Рʼӧһʼ дьжин, әԝ сәр тьштед Рʼӧһʼ дьфькьрьн.

⁶ Ахьрийа фькьра бьнйатʼа мәрьвайе мьрьн ә, ле ахьрийа фькьра Рʼӧһʼ жийин у әʼдьлайи йә.

⁷ Чьмки фькьра бьнйатʼа мәрьвайе дьжмьне Хԝәде йә, әԝ бәр ԛануна Хԝәде хԝә нашкенә, нә жи дькарә.

⁸ Әԝед бь бьнйатʼа мәрьвайе дьжин, нькарьн ль Хԝәде хԝәш бен.

⁹ Ле һун бь бьнйатʼа мәрьвайи нажин, ле бь Рʼӧһʼ дьжин, һәгәр рʼаст Рʼӧһʼе Хԝәде нава ԝәда дьминә. Ле һәгәр Рʼӧһʼе Мәсиһ дьле йәкида тʼӧнә, әԝ нә пʼара Ԝи йә.

¹⁰ У һәгәр Мәсиһ дьле ԝәда йә, ԛальб мьри йә, чьмки ԝә гӧнә кьр, ле Рʼӧһʼ жийин ә бона ԝә, чьмки һун рʼаст һатьнә һʼәсабе.

¹¹ У һәгәр әԝ Рʼӧһʼе кӧ Иса жь мьрьне рʼакьр нава ԝәда дьжи, кӧ ӧса йә Әԝе Мәсиһ жь мьрьне рʼакьр, ԝе бь ԝи Рʼӧһʼе Хԝәйи нава ԝәда, жийине бьдә ԛальбе ԝәйи пʼучʼи-мьри жи.

¹² Бона ве йәке хушк-бьрано, әм дәйндар ьн, ле нә дәйндаред бьнйатʼа мәрьвайе, кӧ ль гора ԝе бьжин.

¹³ Чьмки һәгәр һун ль гора бьнйатʼа мәрьвайе бьжин, һуне бьмьрьн, ле һәгәр һун бь Рʼӧһʼ кьред бьнйатʼа мәрьвайе бькӧжьн, һуне бьжин.

¹⁴ Әԝед кӧ бь Рʼӧһʼе Хԝәде тенә рʼебәрикьрьне, әԝ ьн лаԝед Хԝәде.

¹⁵ Чьмки ԝә рʼӧһʼәки ӧса нәстандийә, кӧ ԝә диса бькә хӧлам бьтьрсьн, ле ԝә әԝ Рʼӧһʼ стандийә, Йе кӧ ԝә дькә лаԝед Хԝәде, бь Кʼижани гази Ԝи дькьн: «Абба!» аԝа готи «Баво!»

¹⁶ Һәма әԝ Рʼӧһʼ Хԝәха тʼәви рʼӧһʼе мә шәʼдәтийе дьдә, кӧ әм зарʼед Хԝәде нә.

¹⁷ У һәгәр зарʼ ьн, ӧса жи хԝәйиԝар ьн, ԝаре Хԝәде нә у тʼәви ԝартийа Мәсиһ ьн. Бәле һәгәр әм тʼәви щәфайе Мәсиһ бунә, әме тʼәви рʼумәта Ԝи бьн жи.

Рʼумәта создайи

¹⁸ Әз аһа тʼәхмин дькьм, кӧ щәфе мәйи ви зәмани, ль бәр рʼумәта ԝе мәва әʼйан бә, нә тʼӧ тьшт ә.

¹⁹ Һʼәму әʼфьрин жи бе сәбьр чʼәʼвньһерʼи хӧйабуна лаԝед Хԝәде нә.

²⁰ Бәле әʼфьрин жи бәр байе бәталийе кʼәтьн, нә кӧ бь һʼәмде хԝә, ле Хԝәде әԝ данә ве йәке. Ле бәле әԝ гӧман һәбу,

²¹ кӧ әʼфьрине хԝәха жи жь ԝе хӧламтийа пʼучʼ аза бьн у тʼәви азайи у рʼумәта зарʼед Хԝәде бьн.

²² Чьмки әм заньн кӧ һʼәму әʼфьрин һʼәта ньһа бь һәврʼа дькьнә зарә-зар у мина еша кʼӧлфәте дькʼьшиньн.

²³ У нә тʼәне әʼфьрин, ле әм хԝәха жи, кӧ мә чаԝа бәре дәрәмәта пешьн Рʼӧһʼе Пироз станд, нава хԝәда зарә-зар ьн у ԝе һивийе нә, һʼәта әм һәԛе лаԝтийа Хԝәде бьстиньн, аԝа готи әм бьгьһижьнә азайийа ԛальбе хԝә.

²⁴ Бәле ве гӧманеда әм хьлаз бун. Ле әԝ гӧмана кӧ те дитьне, әԝ нә гӧман ә, чьмки йәк чаԝа дькарә гӧмана ԝи тьшти бә, кʼижан ль бәр чʼәʼва йә?

²⁵ Ле һәгәр гӧмана мә ль тьште нәдити йә, әм бь сәбьре һивийе бьминьн.

²⁶ Ӧса жи Рʼӧһʼе Пироз те һәԝара бетʼаԛәтийа мә, чьмки әм ньзаньн гәрәке чаԝа дӧа бькьн, ле Рʼӧһʼе Пироз Хԝәха бь готьнед кʼәсәрә найенә сәр зар-зьмана, бона мә лава-навчетийе дькә.

²⁷ У Йе дьла әʼнәнә дькә занә фькьра Рʼӧһʼе Пироз чь йә, чьмки Әԝ ԝәкә ԛьрара Хԝәде бона мәрьвед Хԝәде лава-навчетийе дькә.

²⁸ Әм заньн кӧ һәр тьштида Хԝәде дькә кӧ ԝанрʼа бьбә ԛәнщи, йед кӧ Ԝи һʼьз дькьн у ль гора ԛаз-ԛӧдрәта Ԝи газикьри нә.

²⁹ Чьмки Хԝәде кʼижан пешда бьжартьн, әԝ жи пешда кʼьфш кьрьн, кӧ бьбьнә мина Кӧрʼе Ԝи, ԝәки Иса нава гәләк хушк-бьрада ньхӧри бә.

³⁰ Кʼижан пешда кʼьфш кьрьн, гази ԝан жи кьр у гази кʼижана кьр, әԝ жи бесущ кьрьн у кʼижан бесущ кьрьн, әԝ жи хԝәйирʼумәт кьрьн.

Һʼьзкьрьна Хԝәде: Һәгәр Иса йар ә, кʼи ԝе нәйар бә?

³¹ Аԝа әм чь бежьн бона ван тьшта? Һәгәр Хԝәде пьшта мә йә, кʼи дькарә мьԛабьли мә бә?

³² Әԝе кӧ һʼәйфа Ԝи Кӧрʼе Ԝи нәһат, ле бона мә һʼәмуйа да дәр, иди ԝе чаԝа һәр тьшти тʼәви Ԝи пʼешкʼеши мә нәкә?

³³ Кʼи дькарә бьжартийед Хԝәде гӧнәкʼар кә? Хԝәде йә, кӧ ԝан бесущ дькә.

³⁴ Кʼи дькарә ԝан нәһәԛ кә? Мәсиһ Иса йә кӧ бона ԝан мьр, ле бәле жь мьрьне рʼабу жи у кʼеләка Хԝәдейә рʼасте йә, бона мә лава-навчетийе дькә.

³⁵ Чь ԝе бькарьбә мә жь ԝе һʼьзкьрьна Мәсиһ бьԛәтинә? Дәрд-кӧл, тәʼли-тәнги, зерандьн, хәлайи-щәлайи, бесьтʼари, ԛәдә-бәла йан шур?

³⁶ Чаԝа ньвисар ә: «Бона Тә әм һәр рʼож бәр мьрьне нә, мина пәза сәржекьрьне һʼәсаб дьбьн».

³⁷ Ле әм нава ван һʼәму тьштада һе зедә сәрдькʼәвьн, бь сайа Әԝи кӧ әм һʼьз кьрьн.

³⁸ Чьмки әз әʼсәйи заньм кӧ нә мьрьн, нә жийин, нә мьлйакʼәт, нә шәхсәк, нә тьштед һазьр, нә тьштед ԝе бен, нә тʼӧ ԛәԝат,

³⁹ нә йед жорьн, нә йед жерьн у нә жи әʼфьринәки майин дькарә мә жь һʼьзкьрьна Хԝәде бьԛәтинә, йа кӧ бь дәсте Хӧдан Мәсиһ Иса пʼара мә кʼәтийә.