Romayî 7 - Пәймана Ну (Инщил)

Тʼәрзәки ԛәнщ жь ԛануна һʼал-зәԝаще

¹ Һун рʼьнд фәʼм дькьн хушк-бьрано, әзе ньһа дәрһәԛа чьда ԝәрʼа хәбәр дьм, чьмки әз тʼәви ԝан хәбәр дьдьм, йед кӧ һаш жь ԛануне һәнә: Ԛанун сәр мерьв һаԛас ԝәхт һʼӧкӧм дькә, һʼәта кӧ мәрьв сах ә.

² Мәсәлә, жьна меркьри бь ԛануне мере хԝәйи сахва гьредайи йә, ле һәгәр мер ле дьмьрә, әԝ һьнге жь ԝе ԛануна кӧ мерва гьредайи бу аза дьбә.

³ Аԝа һәгәр мере ԝе һе сах бә әԝ бьбә жьна мерәки дьн, ԝе зьнекʼар бе һʼәсабе, ле һәгәр мер ле бьмьрә, әԝ жь ԝе ԛануне аза дьбә у зьнекʼар набә, һәгәр бьбә жьна мерәки дьн.

⁴ Ӧса жи һун хушк-бьрайед мьн, бь бәдәна Мәсиһ һьндава Ԛанунеда мьрьн, кӧ бьбьнә пʼара йәки дьн, Йе кӧ жь мьрьне рʼабуйә, ԝәки һун Хԝәдерʼа бәр биньн.

⁵ Чьмки гава мә һе бь бьнйатʼа мәрьвайе дьжит, тәме гӧна, кӧ жь Ԛануне сәри һьлдьдан, нава ԛальбед мәда йа хԝә дькьрьн, кӧ әм бәре мьрьне бьдьн.

⁶ Ле ньһа әм һьндава Ԛанунеда мьрьн, жь ԝе хьлаз бун, бь кʼижане әм гьрти бун, кӧ әм бь жийина нуйә рʼӧһʼани хӧламтийе Хԝәдерʼа бькьн, нә кӧ бь рʼийа Ԛануна ньвисар.

Ԛанун у гӧнә

⁷ Аԝа әм чь бежьн? Гәло Ԛанун гӧнә йә? На хер! Ле бәле мьне гӧнә нас нәкьра, һәгәр Ԛануне нибуйа. Мәсәлә, дьлһавьжи жи мьне ньзаньбуйа гӧнә йә, һәгәр Ԛануне нәготьбуйа: «Дьлһавьжийе нәкә».

⁸ Ле гӧнә жь тʼәмийе мәщал станд, нава мьнда һәр щурʼә дьлһавьжи пешда анин. Чьмки бе ԛанун гӧнә мьри йә.

⁹ Әз хԝәха ԝәхтәке бейи ԛанун сах бум, ле гава тʼәми гьһиштә мьн, гӧнә сах бу

¹⁰ у әз мьрьм. Әԝ тʼәмийа кӧ ԝе жийин бьда мьн, һәма әԝ жи бу сәбәбе мьрьна мьн.

¹¹ Чьмки гӧнә жь тʼәмийе мәщал станд әз хапандьм у бь ԝе кӧштьм.

¹² Аԝа Ԛанун пироз ә у тʼәмийа ԝе пироз, рʼаст у ԛәнщ ә.

¹³ Ԝәки ӧса йә йа ԛәнщ мьнрʼа бу мьрьн? На хер! Ле әв кьре гӧнә бу, кӧ бь йа ԛәнщ мьрьн сәр мьнда ани. Әв йәк аһа бу, ԝәки һʼӧнӧре гӧнә кʼьфш бә у бь тʼәмийе һе гӧнәкʼарийа гӧнә кʼьфш бә.

Шәрʼе нәхӧйайи нава инсенда

¹⁴ Бәле әм заньн кӧ Ԛанун рʼӧһʼани йә, ле әз хун у гошт ьм, хӧламәки гӧнәрʼа фьроти.

¹⁵ Чьмки әз фәʼм накьм чь дькьм. Нә кӧ ԝи тьшти дькьм, чь кӧ дьхԝазьм, ле ԝи тьшти дькьм, чь кӧ бәр чʼәʼве мьн рʼәш ә.

¹⁶ Ле һәгәр әз тьште нә бь дьле хԝә дькьм, Ԛанунерʼа ԛайл ьм, кӧ әԝ ԛәнщ ә.

¹⁷ Ле аԝа нә кӧ әз ԝе йәке дькьм, ле бәле гӧне кӧ нава мьнда дьминә дькә.

¹⁸ Әз заньм кӧ нава мьнда, аԝа готи бьнйатʼа мьнда, тʼӧ тьште ԛәнщ наминә, чьмки хирәта мьн ԛәбул накә, ле әԝ йәк мьнрʼа ль һәв найе.

¹⁹ Бәле ԝе ԛәнщийа кӧ дьхԝазьм бькьм накьм, ле хьрабийа кӧ нахԝазьм ԝе дькьм.

²⁰ Һәгәр әз ԝи тьште нә бь дьле хԝә дькьм, иди нә кӧ әз дькьм, ле әԝ гӧне кӧ нава мьнда дьминә, әԝ дькә.

²¹ Аԝа әз ԛанунәке дьбиньм: Гава дьхԝазьм кӧ ԛәнщийе бькьм, бе һʼәмде мьн дьбә хьраби.

²² Әз бь кʼурайийа дьле хԝә ԛануна Хԝәде бәгәм дькьм,

²³ ле ԛанунәкә дьн нава хԝәда дьбиньм кӧ мьԛабьли ԝе ԛануна һʼьше мьн бәгәм кьрийә дькә шәрʼ у мьн дькә һесире ԛануна гӧна, йа кӧ нава мьнда йә.

²⁴ Әз чь мәрьвәки һесир-бәләнгаз ьм! Кʼи ԝе мьн жь дәсте ви ԛальбе пʼучʼи-мьри хьлаз кә?

²⁵ (Шькьр жь Хԝәдерʼа, бь сайа Хӧдане мә Иса Мәсиһ!) Бь ви аԝайи әз хԝәха бь һʼьш-аԛьле хԝә хӧламтийе ԛануна Хԝәдерʼа дькьм у бь ԛальбе хԝә хӧламтийе ԛануна гӧнарʼа дькьм.