Romayî 5 - Пәймана Ну (Инщил)

Бь Иса Мәсиһ әм тʼәви Хԝәде ль һәв һатьнә

¹ Аԝа кӧ әм бь баԝәрийе рʼаст һатьнә һʼәсабе, әʼдьлайийа мә тʼәви Хԝәде һәйә бь сайа Хӧдане мә Иса Мәсиһ.

² Пе Ԝи мә бь баԝәрийе мәщал дит тʼәви ԝе кʼәрәме бьн, кʼижанеда әм сәкьнинә. У бь ԝе гӧмана кӧ әме тʼәви рʼумәта Хԝәде бьн дьфьрʼьн.

³ У нә тʼәне бь ве йәке, ле әм бь тәнгасийед хԝә жи дьфьрʼьн, чьмки әм заньн кӧ тәнгаси сәбьре тинә,

⁴ сәбьр жи кʼәтьн-рʼабуне, кʼәтьн-рʼабун жи гӧмане.

⁵ У гӧман жи мә рʼурʼәш накә, чьмки һʼьзкьрьна Хԝәде сәр мәда бь ԝи Рʼӧһʼе Пироз барийә, Йе кӧ мәрʼа һатийә дайине.

⁶ Чьмки гава әмә һе бечʼарә бун, Мәсиһ бона мә нәпʼака ԝәхтда мьр.

⁷ Дәгмә бона мәрьвәки рʼаст йәк бьмьрә, бәлки бона мәрьвәки ԛәнщ йәке бьԝерә бьмьрә,

⁸ ле бәле Хԝәде һʼьзкьрьна Хԝә һьндава мәда һьнге да кʼьфше, гава әмә һе гӧнәкʼар бун, Мәсиһ бона мә мьр.

⁹ Ньһа әм кӧ бь хуна Ԝи ль бәр Хԝәде рʼаст һʼәсаб бунә, һе чьԛас зедә әме бь Ԝи жь хәзәбе хьлаз бьн.

¹⁰ Һәгәр әм тʼәви Хԝәде бь мьрьна Кӧрʼе Ԝи ль һәв һатьн, гава әмә нәйар бун, ле һе чьԛас зедә пе ԝе льһәвһатьне әме бь жийина Ԝи хьлаз бьн.

¹¹ У нә тʼәне һаԛас, ле бь Хԝәде жи әм дьфьрʼьн, сайа Хӧдане хԝә Иса Мәсиһ, бь Кʼижани әм тʼәви Хԝәде ль һәв һатьнә.

Адәм у Мәсиһ

¹² Аԝа бь мәрьвәки гӧнә кʼәтә дьне у жь гӧнә жи мьрьн һат. Бь ви аԝайи мьрьн сәр һʼәму мәрьва бәла бу, чьмки һʼәмуйа жи гӧнә кьр.

¹³ Бәри Ԛануне, дьнйайеда гӧнә һәбу, ле дәра кӧ ԛанун тʼӧнә, гӧнә найе һʼәсабе.

¹⁴ Ле бәле мьрьне жь Адәм гьрти һʼәта Муса һʼӧкӧм кьр, һʼәта сәр ԝан жи, йед кӧ мина Адәм гӧрʼа Хԝәде дәрнәкʼәтьн. Адәм мина тʼәрзәки Ԝи бу, Йе кӧ ԝе пәйрʼа бьһата.

¹⁵ Ле пʼешкʼеша Хԝәде мина нәһәԛийа Адәм нинә. Чьмки һәгәр бь нәһәԛийа мәрьвәки гәләк мьрьн, һе чьԛас зедә кʼәрәма Хԝәде у дайина кӧ бь кʼәрәма Мәрьвәки, йане йа Иса Мәсиһ сәр гәләка зедә бу.

¹⁶ У пʼешкʼеш нә ӧса йә, чаԝа һәԛе гӧне йәки, чьмки диԝане бь гӧнәки сущдари ани, ле пʼешкʼеше жь гәләк нәһәԛийа бесущ кьр.

¹⁷ Чьмки һәгәр бь нәһәԛийа мәрьвәки у рʼуйе ԝида мьрьне һʼӧкӧм кьр, чьԛас зедә әԝед кӧ кʼәрәма Хԝәдейә дәԝләмәнд у рʼастһʼәсаббуне пʼешкʼеш дьстиньн ԝе жийинеда бь сайа Йәки, аԝа готи Иса Мәсиһ пʼадшатийе бькьн.

¹⁸ Аԝа бь ви аԝайи пе нәһәԛике диԝана тʼәмамийа мәрьвайе бу, ӧса жи бь кьрьнәкә рʼаст һʼәму мәрьв ԝе рʼаст бенә һʼәсабе у жийине бьстиньн.

¹⁹ Чаԝа бь нәгӧһдарийа йәки гәләк бунә гӧнәкʼар, ӧса жи бь гӧһдарийа Йәки гәләк ԝе рʼаст бенә һʼәсабе.

²⁰ Ле бәле Ԛанун кʼәтә наве, кӧ нәһәԛи зедә бә, ле ль кʼидәре гӧнә зедә бу, кʼәрәм жи ль ԝьр һе зедә бу,

²¹ ԝәки чаԝа гӧнә бь мьрьне һʼӧкӧм кьр, ӧса жи кʼәрәма Хԝәде бь рʼастһʼәсабкьрьне һʼӧкӧм бькә, мә бьбә бәрбь жийина һʼәта-һʼәтайе бь сайа Хӧдане мә Иса Мәсиһ.