Romayî 3 - Пәймана Ну (Инщил)

¹ Иди щьһу чьва зедә йә? Йан жи чь фәйда сьнәтийе һәйә?

² Гәләки, бь һәр алийава. Бәре пешьн ԝе йәкева, кӧ готьнед Хԝәде ль ԝан һатьнә спартьне.

³ Аԝа һәгәр жь ԝан һьнәк амьн нәман, дьбә кӧ жь дәст беамьнийа ԝан Хԝәде ԝе беамьн дәре?

⁴ Тʼӧ щар! Дә бьра Хԝәде рʼаст бә у һʼәму мәрьв дәрәԝ, чаԝа ньвисар ә: «Ԝәки готьнед Хԝәда Тӧ бесущ дәрейи у диԝана Хԝәда Тӧ сәркʼәви».

⁵ Ле һәгәр нәһәԛийа мә һәԛийа Хԝәде дьдә кʼьфше, әм чь бежьн? Ԝәки ӧса йә Хԝәде нәһәԛ ә, кӧ хәзәбе тинә сәре мә? (Бь мәрьвайи хәбәр дьдьм).

⁶ Тʼӧ щар! Һәгәр нә ӧса бә, Хԝәде ԝе чаԝа диԝана дьне бькә?

⁷ Ле һәгәр рʼастийа Хԝәде, бона рʼумәта Ԝи, бь дәрәԝийа мьн һе кʼьфш дьбә, ле иди чьма ԝе диԝана мьн мина гӧнәкʼарәки бе кьрьне?

⁸ У гәло һәԛ ә кӧ әм аһа бежьн: «Хьрабийе бькьн, кӧ бьбә ԛәнщи», чаԝа һьнәк шәрʼа ль мә гьли дькьн, йане әм ӧса дьбежьн? Әԝ мәрьв ԝе рʼаст сәр бәла хԝә вәбьн.

Мәрьве рʼаст тʼӧнә, һʼәму гӧнәкʼар ьн

⁹ Аԝа әм иди чь бежьн? Әм щьһу тьштәкива жь нәщьһуйа четьр ьн? На хер! Чьмки мә иди жор да кʼьфше, чаԝа щьһу, ӧса жи нәщьһу, һʼәму жи бьн һʼӧкӧме гӧнәда нә.

¹⁰ Чаԝа ньвисар ә: «Йәки рʼаст тʼӧнә, тʼӧ кәс тʼӧнә,

¹¹ кәсәк тʼӧнә, кӧ фәʼм бькә, кәсәк тʼӧнә, ль Хԝәде бьгәрʼә.

¹² Һʼәму бәндә хальфи нә, бь һәврʼа тʼәвайи бекер бунә, йәки ԛәнщийе бькә тʼӧнә, тʼӧ кәс тʼӧнә.

¹³ Гәԝрийа ԝанә тʼьрба вәкьри йә, зьмане ԝанә дәрәԝин ә, жәʼра мәʼра бьн заре ԝан ә.

¹⁴ Дәве ԝана тʼьжи ньфьрʼ у тәʼли йә,

¹⁵ ньге ԝанә хунрʼетьнерʼа дьләзинә.

¹⁶ Рʼийа ԝанә ԛәдә у бәла нә.

¹⁷ Рʼийа әʼдьлайийе наснәкьри нә,

¹⁸ тьрса Хԝәде ль бәр чʼәʼва ԛәт тʼӧни нә».

¹⁹ Аԝа әм заньн Ԛанун чь кӧ дьбежә, ԝанарʼа дьбежә, йед кӧ бьн һʼӧкӧме Ԛанунеда нә, ԝәки һʼәму дәв бенә гьредане у тʼәмамийа дьнйайе ль бәр диԝана Хԝәде щабдар бә.

²⁰ Чьмки бь кьред Ԛануне тʼӧ ԛул-бәндә ԝе ль бәр Хԝәде рʼаст дәрнәйе, ле бь Ԛануне гӧнә те наскьрьне.

Инсан ль бәр Хԝәде бь баԝәрийе рʼаст те һʼәсабе

²¹ Ле ньһа бейи Ԛануне, рʼастһʼәсабкьрьна Хԝәде хӧйа буйә, бона кʼижане Ԛанун у пʼехәмбәр жи шәʼдәтийе дьдьн.

²² Әв ә рʼастһʼәсабкьрьна Хԝәде: Кʼи баԝәрийа хԝә Иса Мәсиһ тинә, Хԝәде ԝан һʼәмуйа ль бәр Хԝә рʼаст һʼәсаб дькә. Фьрԛи тʼӧнә,

²³ чьмки һʼәмуйа гӧнә кьр у нәгьһиштьнә рʼумәта Хԝәде.

²⁴ Ле жь кʼәрәма Ԝи, бь азакьрьна Мәсиһ Иса рʼастһʼәсаббуне пʼешкʼеш дьстиньн.

²⁵ Хԝәде Әԝ кʼьфш кьрьбу, кӧ Әԝ бь хуна Хԝә ль бәр гӧнед ԝан кʼәвә, йед кӧ ве йәке баԝәр бькьн. Хԝәде әв йәка кьр, кӧ рʼастһʼәсабкьрьна Хԝә бьдә кʼьфше, чьмки Ԝи бь сәбьра Хԝә гӧһ нәда ԝан гӧнед кӧ пешда һатьбунә кьрьне.

²⁶ Аԝа готи Хԝәде бь Иса әв йәк кьр, ԝәки рʼастһʼәсабкьрьна Хԝә ви зәманида бьдә кʼьфше, кӧ Хԝәха рʼаст ә у һәр кәсе кӧ баԝәрийа хԝә Иса тинә, ԝан рʼаст һʼәсаб дькә.

²⁷ Аԝа иди чь майә кӧ әм пе бьфьрʼьн? Һʼәму пʼучʼ бу чу. Чьма пʼучʼ бу? Чьмки әм Ԛануне дьԛәдиньн? На хер, ле чьмки әм баԝәр дькьн.

²⁸ Чьмки мәва фәʼмдари йә, кӧ мәрьв бь баԝәрийе рʼаст һʼәсаб дьбә, бейи кьред Ԛануне.

²⁹ Йан Хԝәде тʼәне Хԝәде щьһуйа йә? Нә йе нәщьһуйа йә? Бәле, йе нәщьһуйа йә жи,

³⁰ чьмки Хԝәде йәк ә у әԝ йед сьнәтбуйи бь баԝәрийе рʼаст һʼәсаб дькә у нәсьнәтбуйийа жи диса бь ԝе баԝәрийе.

³¹ Ԝәки ӧса йә әм бь баԝәрийе Ԛануне бәтал дькьн? Тʼӧ щар, ле әм Ԛануне мак дькьн.